ଅନେକ ସମୟରେ ନିଘୋଡ଼ ନିଦରେ ଶୋଇଥିବାବେଳେ ହଠାତ୍ ନିଦ ଭାଙ୍ଗିଥାଏ। ଉଠିବାକୁ ଚେଷ୍ଟା କଲେ ମଧ୍ୟ ଉଠି ହୁଏନି କି ଗୋଡ଼, ହାତ ହଲାଇବାକୁ ଚେଷ୍ଟାକଲେ ବି ହଲାଇ ହୁଏନି। ସେହି ସମୟରେ ପାଖରେ ଘଟୁଥିବା ପ୍ରତ୍ୟେକ ଘଟଣାକୁ ଅନୁଭବ କଲେ ମଧ୍ୟ ପାଟି ଖୋଲି କିଛି କହି ହୁଏନି। ମୁଣ୍ଡ ଭାରି ଭାରି ଲାଗିଥାଏ। ଏପରି ଲାଗିଥାଏ, ଯେପରି ଆପଣଙ୍କୁ କିଏ ମାଡ଼ି ବସୁଛି।
ଏହାକୁ ଲୋକେ ଭୂତ ପ୍ରେତ, ସ୍ବପ୍ନ ଦୋଷ ମଧ୍ୟ କହିଥା’ନ୍ତି। ଅନେକ ସମୟରେ ଯାହା ପାଇଁ ଆମେ ଅନେକ ଚିନ୍ତାରେ ପଡ଼ିଯାଉ। ଜ୍ୟୋତିଷଙ୍କୁ କହି ତାଙ୍କ କଥାନୁସାରେ ଉପଚାର ମଧ୍ୟ କରିଥାଉ। ମାତ୍ର ଏହାର ବୈଜ୍ଞାନିକ କାରଣ ରହିଛି। ବୈଜ୍ଞାନିକଙ୍କ ମତାନୁସାରେ ଏହାକୁ ସ୍ଲିପ୍ ପାରାଲାଇଜ୍ କୁହାଯାଏ। ଏହା ସେହି ସମୟରେ ସଂଘଠିତ ହୋଇଥାଏ, ଯେଉଁ ସମୟରେ କି ମସ୍ତିଷ୍କର କିଛି ଅଂଶ ଜାଗ୍ରତ ହୋଇଯାଏ, କିନ୍ତୁ ଶରୀରକୁ ନିୟନ୍ତ୍ରଣ କରୁଥିବା ଅଂଶ ଶୋଇ ରହିଥାଏ।
ସ୍ଲିପ୍ ପାରାଲାଇଜ ହିଁ ଶୋଇବାକୁ ଗଲାବେଳେ ବା ଉଠିବା ସମୟରେ ହୋଇଥାଏ। ଶୋଇବା ସମୟରେ ଏହା ହେଲେ, ଏହାକୁ ହିପ୍ପ୍ନୋଗୋଗିକ୍ କୁହାଯାଉଥିବା ବେଳେ ଉଠିଲାବେଳେ ହେଲେ ହାଇପ୍ନୋପୋପିକ୍ କୁହାଯାଏ। ଏହା ହେବା ପରେ ବ୍ୟକ୍ତି ଉଠି ପଡୁଥିବା ସହ କେତେକ ସମୟରେ ପୁଣି ଶୋଇ ଯାଇଥାଏ। ତେବେ ଏହି ସମସ୍ୟାରୁ ମୁକ୍ତି ପାଇବା ଲାଗି ନିଦ୍ରାଜନିତ ଅନେକ ସମସ୍ୟାରେ ପରିବର୍ତ୍ତନ ଆଣିବାକୁ ପଡ଼ିଥାଏ। ଯେପରିକି ଦିନକୁ ୮ ଘଣ୍ଟା ଶୋଇବା, ଚିନ୍ତାଠାରୁ ଦୂରେଇ ରହିବା। ମାନସିକ ସମସ୍ୟା କାରଣରୁ ନିଦରେ ହେଉଥିବା ସମସ୍ୟା ପାଇଁ ତୁରନ୍ତ ଡାକ୍ତରଙ୍କ ପରାମର୍ଶ କରନ୍ତୁ। ଯଦି କେବେ ଆପଣଙ୍କୁ ସ୍ଲିପ ପାରାଲାଇଜ ହେଉଥାଏ, ଭୂତ ପ୍ରେତ କିମ୍ବା କୌଣସି ଭୌତିକ ଚିନ୍ତା ନ କରି ଶୁଅନ୍ତୁ କିମ୍ବା ଅଧିକ ସମୟ ଏହି ସମସ୍ୟା ହେଉଥିଲେ ଡାକ୍ତରଙ୍କ ସହ ପରାମର୍ଶ କରନ୍ତୁ।