ନୂଆଦିଲ୍ଲୀ: ଲୋକେ ଭଲ ନିଦ୍ରାରେ ଶୋଇବାକୁ ଆରାମଦାୟକ ଖଟର ବ୍ୟବହାର କରିଥାନ୍ତି। ହେଲେ ଜଣେ ଯୁବତୀ ଏପରି ଏକ ସ୍ଥାନରେ ଶୁଅନ୍ତି, ଯାହା ଶୁଣିଲେ ବହୁତ ଅଜବ ଲାଗିବ। ଜଣେ ବ୍ୟକ୍ତି ମରିବା ପରେ ତାଙ୍କ ମରଶରୀରକୁ ଏକ କାଠବାକ୍ସ ଭିତରେ ରଖାଯାଇ କବର ଦିଆଯାଇଥାଏ। ହେଲେ ଯୁବତୀ ଜଣଙ୍କ ଛୋଟବେଳୁ ମୃତ ଲୋକଙ୍କ ପାଇଁ ଥିବା କାଠବାକ୍ସରେ ଶୋଇବାକୁ ସ୍ବପ୍ନ ଦେଖିଆସୁଥିବା କହିଛନ୍ତି। ସେ ଶୋଇବା ପାଇଁ ଏକ ଖାସ୍ ଶବାଧାର ପ୍ରସ୍ତୁତ କରିଛନ୍ତି। ରିପୋର୍ଟ ମୁତାବକ, ସ୍ୟାଡ୍ ସ୍ପାଇସ୍ ନାମକ ଟିକ୍ଟକ୍ ବ୍ୟବହାରକାରୀ ନିକଟରେ ତାଙ୍କ ଅଜବ ବେଡ୍ରୁମ୍ ଭିଡିଓ ସୋସିଆଲ ମିଡିଆରେ ଶେୟାର କରିଛନ୍ତି। ତାଙ୍କର ପ୍ରାୟ ୬ ଲକ୍ଷରୁ ଅଧିକ ଫଲୋୟର୍ସ ଅଛନ୍ତି। ଭିଡିଓରେ ଏକ କଫିନ(ଶବାଧାର) ଥିବା ଦେଖିବାକୁ ମିଳିଛି। ଟେଲିଭିଜନରେ ଦେଖିବାକୁ ମିଳୁଥିବା କାଳ୍ପନିକ ଚରିତ୍ର ରାକ୍ଷସୀ, ଯାହାର ୨ ପଟର ଦାନ୍ତ ବଡ଼ ଥିବ, ସେ ସେହିପରି ନିଜର ଦାନ୍ତକୁ ବଡ଼ କରିଛନ୍ତି। ଏଥିସହ ତାଙ୍କ ରୁମ୍କୁ ମଧ୍ୟ ସେହିପରି ସଜାଇଛନ୍ତି। ସେ ୬ ଫୁଟ ୮ ଇଞ୍ଚର କଫିନରେ ଶୋଉଛନ୍ତି। ସେହି କଫିନ ଦେଖିବାକୁ ଆରାମଦାୟକ ଲାଗୁ ନ ଥିଲେ ମଧ୍ୟ ଯୁବତୀ ତାକୁ ବେଶ୍ ଆରାମଦାୟକ ବୋଲି କହିଛନ୍ତି। ସେ ଶୋଇବା ସମୟରେ କଫିନକୁ ବନ୍ଦ କରନ୍ତିନି। ଯୁବତୀ ଜଣକ କହିଛନ୍ତି, ତାଙ୍କୁ ୧୪ ବର୍ଷ ହୋଇଥିବାବେଳେ ସେ କଫିନରେ ଶୋଇବାକୁ ସ୍ବପ୍ନ ଦେଖିଥିଲେ। ତାଙ୍କ କହିବା କଥା ଯେ ସେ ଏହି କଫିନ ଯୋଗୁ ଖରାପ ଜିନିଷରୁ ନିଜକୁ ବଞ୍ଚାଇପାରନ୍ତି।
