ବାହାନଗା, ୩୦ା୩(ଡି.ଏନ.ଏ.)- ବାଲେଶ୍ୱର ଜିଲା ବାହାନଗା ବ୍ଲକ ସାହାସପୁରା ପଞ୍ଚାୟତ ଝାଡତା ଗ୍ରାମରେ ଦୋଳ ଯାତ୍ରା ଅବସରରେ ହେଉଥିବା ସାଂସ୍କୃତିକ କାର୍ଯ୍ୟକ୍ରମରେ ଜଣେ ସଂଖ୍ୟାଲଘୁ ସମ୍ପ୍ରଦାୟ ଯୁବକଙ୍କ ଦେହରେ ସେହି ଗ୍ରାମର ଜଣେ ଯୁବକଙ୍କ କହୁଣୀ ବାଜିଯିବାରୁ ଉଭୟଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ଏହା ପରଦିନ ମାର୍ପିଟ ପର୍ଯ୍ୟନ୍ତ କଥା ଯାଇଥିଲା। ପରବର୍ତ୍ତୀ ସମୟରେ ପୋଡାଜଳା, ରାସ୍ତା ଅବରୋଧ ଆରମ୍ଭ ହୋଇଥିଲା। ପୋଲିସ୍ ସେଠାରେ ପହଞ୍ଚି ୨ ଜଣଙ୍କୁ ଗିରଫ କରିବା ପରେ ନିୟନ୍ତ୍ରଣକୁ ଆସିଥିଲା ପରିସ୍ଥିତି।
ଏହି ଘଟଣା ନେଇ ଗୋପାଳପୁର ଫାଣ୍ଡିରେ ଝାଡତା ଗ୍ରାମର ପ୍ରଶାନ୍ତ ଶିଅଳ ଅଭିଯୋଗ କରିବା ପରେ ଥାନାରେ ଏକ ମାମଲା(ନଂ.୯୮/୨୧) ରୁଜୁ କରାଯାଇଥିଲା। ଅଭିଯୋଗକୁ ଭିତ୍ତି କରି ପୋଲିସ ଆଉ ୩ ଜଣଙ୍କୁ ଗିରଫ କରିଥିଲେ। ପରବର୍ତ୍ତୀ ସମୟରେ ରାସ୍ତା ଅବରୋଧ ଓ ପୋଡାଜଳା, ଦୋକାନ ପୋଡି ବାବଦରେ ପୋଲିସ ନିଜ ଆଡୁ ଏକ ମାମଲା (ନଂ. ୯୯/୨୧) ରୁଜୁ କରି ୬ଜଣଙ୍କୁ ଗିରଫ କରି କୋର୍ଟଚାଲାଣ କରିଛି।
ଶନିବାର ଝାଡତା ଗ୍ରାମର ହନୁମାନ ମେଳନ ପଡିଆରେ ଦୋଳମେଳନ ପାଇଁ ଗହଳି ହୋଇଥିଲା। ସାହାସପୁରା ଗ୍ରାମର ସଂଖ୍ୟାଲଘୁ ସମ୍ପ୍ରଦାୟର କେତେଜଣ ଯୁବକ ଯାତ୍ରା ଦେଖିବା ପାଇଁ ଆସିଥିଲେ। ଏହି ସମୟରେ ଗ୍ରାମର ଶଶଧର ସେଠୀଙ୍କ କହୁଣି ସଂଖ୍ୟାଲଘୁ ଯୁବକଙ୍କ ଦେହରେ ବାଜିଯିବାରୁ ଗଣ୍ଡଗୋଳ ଆରମ୍ଭ ହୋଇଥିଲା।
