ଦୁବାଇ,୨୦।୯(ପି.ଟି.): ଅଧିନାୟକ ଷ୍ଟିଭ୍ ସ୍ମିଥ୍, ତାରକା ବୋଲର ଜୋଫ୍ରା ଆର୍ଚର ଓ ଜୋଶ ବଟଲର ବାଧ୍ୟତାମୂଳକ କୋଭିଡ୍-୧୯ ଟେଷ୍ଟରେ ନେଗେଟିଭ ବୋଲି କୁହାଯାଇଛି। ଫଳରେ ଏମାନେ ରାଜସ୍ଥାନ ରୟାଲ୍ସ ପାଇଁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ଦଳର ପ୍ରଥମ ମ୍ୟାଚ୍ ଖେଳିବା ସ୍ପଷ୍ଟ ହୋଇଛି। ଏଠାରେ ପହଞ୍ଚିବା ପରେ ଖେଳାଳିମାନଙ୍କର ପରୀକ୍ଷା କରାଯାଇଥିଲା। ୨୨ ତାରିଖରେ ଶାରଜା ଷ୍ଟାଡିୟମରେ ରାଜସ୍ଥାନ ତା’ର ପ୍ରଥମ ମ୍ୟାଚ୍ରେ ଚେନ୍ନାଇକୁ ଭେଟିବ। ଗତ ୧୭ ତାରିଖରେ ଅଷ୍ଟ୍ରେଲିଆ ଓ ଇଂଲଣ୍ଡର ୨୧ଜଣ ଖେଳାଳିଙ୍କୁ ନେଇ ଏକ ଚାର୍ଟାର୍ଡ ବିମାନ ଏଠାରେ ପହଞ୍ଚିଥିଲା।
ଶୁକ୍ରବାର ସ୍ମିଥ, ବଟଲର ଓ ଆର୍ଚର କୋଭିଡ୍-୧୯ ପରୀକ୍ଷା କରାଇଥିଲେ। ସମସ୍ତଙ୍କର ରେଜଲ୍ଟ ନେଗେଟିଭ୍ ଆସିଛି। ଏବେ ସେମାନେ ୩୬ ଘଣ୍ଟିଆ କ୍ୱାରାଣ୍ଟାଇନ୍ ଅବଧିରେ ରହିବେ ବୋଲି କୁହାଯାଇଛି। ହେଲ୍ମେଟ୍ରେ ବଲ୍ ବାଜିବାର କାରଣରୁ ସ୍ମିଥ୍ ଇଂଲଣ୍ଡ ବିପକ୍ଷ ଦିନିକିଆ ସିରିଜ ଖେଳିପାରି ନ ଥିଲେ। ଫଳରେ ସେ ଦଳର ପ୍ରାରମ୍ଭିକ ଆଇପିଏଲ ମ୍ୟାଚ୍ ଖେଳିବା ପାଇଁ ଫ୍ରାଞ୍ଚାଇଜ୍ ଓ କ୍ରିକେଟ ଅଷ୍ଟ୍ରେଲିଆର ମେଡିକାଲ ଟିମ୍ଠାରୁ ଅନୁମତି ଲୋଡିବେ। ଯଦି ସ୍ମିଥ୍ ପ୍ରଥମ ମ୍ୟାଚ୍ ନ ଖେଳନ୍ତି ତା’ହେଲେ ବଟଲର ଦଳର ନେତୃତ୍ୱ ନେଇପାରନ୍ତି। ତେବେ ସ୍ମିଥ୍ ପ୍ରଥମ ମ୍ୟାଚ୍ ପୂର୍ବରୁ ଏହି ବାଧ୍ୟତାମୂଳକ କନକସନ ଟେଷ୍ଟରେ ଉତୀର୍ଣ୍ଣ ହେବେ ବୋଲି ରାଜସ୍ଥାନ ତରଫରୁ ଆଶା କରାଯାଉଛି।
