ନୂଆଦିଲ୍ଲୀ,୨୦।୧: ଆଇପିଏଲ ଫ୍ରାଞ୍ଚାଇଜ ରାଜସ୍ଥାନ ରୟାଲ୍ସ ତା’ର ଅଧିନାୟକ ଷ୍ଟିଭ ସ୍ମିଥଙ୍କୁ ଦଳରୁ ବିଦା କରିଛି। ଦଳର ଉଇକେଟକିପର ବ୍ୟାଟ୍ସମ୍ୟାନ ସଞ୍ଜୁ ସାମସନଙ୍କୁ ଆଗାମୀ ଆଇପିଏଲ ପାଇଁ ଦିଆଯାଇଛି ନେତୃତ୍ୱ ଦାୟିତ୍ୱ। ସ୍ମିଥଙ୍କ ସମେତ ଗତବର୍ଷ ଭଲ ପ୍ରଦର୍ଶନ କରିବାରେ ବିଫଳ ହୋଇଥିବା କେତେକ ଖେଳାଳିଙ୍କୁ ମଧ୍ୟ ବିଦା କରିଛି ରାଜସ୍ଥାନ ଫ୍ରାଞ୍ଚାଇଜ।
ବିସିସିଆଇର ନିର୍ଦ୍ଦେଶ ଅନୁଯାୟୀ, ସମସ୍ତ ଫ୍ରାଞ୍ଚାଇଜ ବୁଧବାର ସୁଦ୍ଧା ଦଳରୁ ବିଦା ହେଇଥିବା ଓ ବଜାୟ ରଖୁଥିବା ଖେଳାଳିଙ୍କ ତାଲିକା ଦାଖଲ କରିଛନ୍ତି।
ରାଜସ୍ଥାନ ପକ୍ଷରୁ ଆଇପିଏଲ ପଦାର୍ପଣ କରିଥିବା ସଞ୍ଜୁ ୮ ବର୍ଷ ହେଲା ସମାନ ଦଳ ପାଇଁ ଖେଳୁଛନ୍ତି। ୨୦୨୧ ସିଜନରେ ଦଳର ନେତୃତ୍ୱ ନେବା ପାଇଁ ସେ ଉପଯୁକ୍ତ ଖେଳାଳି ବୋଲି ରାଜସ୍ଥାନ ଫ୍ରାଞ୍ଚାଇଜ ମାଲିକ ମନୋଜ ବାଦଲେ କହିଛନ୍ତି। ସ୍ମିଥଙ୍କ ସହ ଫ୍ରାଞ୍ଚାଇଜର ଚୁକ୍ତି ୨୦୨୦ ଅକ୍ଟୋବରରେ ଶେଷ ହୋଇଥିଲା
ଏହାବାଦ୍ କିଙ୍ଗ୍ସ ଏକାଦଶ ପଞ୍ଜାବ (କେଏକ୍ସଆଇପି) ଗ୍ଲେନ ମ୍ୟାକ୍ସଓ୍ବେଲ, ଶେଲଡନ କଟ୍ରେଲ, ମୁଜବୀ ଉର ରେହମାନ, ଜିମି ନିଶାମଙ୍କୁ ଛାଡ଼ିଥିବାବେଳେ ୫ ଥର ଆଇପିଏଲ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ୭ ଜଣ ଖେଳାଳିଙ୍କୁ ରିଲିଜ କରିଛି। ଆଉ ସିଏସ୍କେ ବରିଷ୍ଠ ସ୍ପିନର ହରଭଜନ ସିଂ, କେଦାର ଯାଦବ, ପିୟୂଷ ଚାଓ୍ବାଲା ଓ ମୁରଲି ବିଜୟଙ୍କୁ ଛାଡ଼ି ଦେଇଛି।