ବ୍ରିସବେନ,୧୮।୧: ସ୍ଥାନୀୟ ବ୍ରିସବେନ ଗ୍ରାଉଣ୍ଡରେ ଚାଲିଥିବା ଭାରତ-ଅଷ୍ଟ୍ରେଲିଆ ଟେଷ୍ଟ ମ୍ୟାଚ୍ରେ ଚତୁର୍ଥ ଦିନ କିଛି ଉଲ୍ଲେଖନୀୟ ଘଟଣା ଘଟିଛି। ସେଥି ମଧ୍ୟରୁ ମହମ୍ମଦ ସିରାଜଙ୍କ କ୍ୟାରିୟରର ପ୍ରଥମ ୫ ଉଇକେଟ ସଫଳତା ସବୁଠୁ ଗୁରୁତ୍ୱପୂର୍ଣ୍ଣ। ଏହି ମ୍ୟାଚ୍ରେ ଷ୍ଟିଭ ସ୍ମିଥ ଏକ ଭିନ୍ନ କାରଣରୁ ଡିଆରଏସ୍ ନେଇଥିଲେ, ଯାହାର ଖୁବ୍ ଆଲୋଚନା ହେଉଛି।
୫୫ତମ ଓଭରରେ ମହମ୍ମଦ ସିରାଜଙ୍କ ବଲ ଷ୍ଟିଭ ସ୍ମିଥଙ୍କ ଗ୍ଲୋଭ୍ସରେ ବାଜି ସିଧା ଯାଇଥିଲା ଗଲି ପଏଣ୍ଟରେ ଥିବା ଫିଲ୍ଡର ଅଜିଙ୍କ୍ୟ ରାହାନେଙ୍କ ହାତକୁ। ଭାରତୀୟ ଦଳର କାମଚଳା ଅଧିନାୟକ କ୍ୟାଚ୍ ଧରିବାରେ କୌଣସି ତ୍ରୁଟି କରି ନ ଥିଲେ। ଏହାସତ୍ତ୍ୱେ ସ୍ମିଥ ଡିଆରଏସ୍ ମାଗିଥିଲେ। ଏହାର କାରଣ ପ୍ରାୟତଃ ଫ୍ୟାନଙ୍କୁ ଜଣା ନ ଥାଇପାରେ। ସ୍ମିଥଙ୍କ ମତରେ ବଲ ତାଙ୍କ ଗ୍ଲୋଭ୍ସରେ ବାଜିବା ବେଳକୁ ସେ ବ୍ୟାଟ୍ ଛାଡ଼ି ଦେଇଥିଲେ। ହେଲେ ତୃତୀୟ ଅମ୍ପାୟର ସ୍ପଷ୍ଟ କରିଥିଲେ ଯେ, ବଲ ବାଜିବା ବେଳକୁ ବ୍ୟାଟ୍ର ହ୍ୟାଣ୍ଡେଲ ଓ ଗ୍ଲୋଭ୍ସ ମଧ୍ୟରେ ସଂଯୋଗ ଥିଲା। ଏଣୁ ଏହା ଆଉଟ୍। ବ୍ୟାଟ୍ ଓ ଗ୍ଲୋଭ୍ସ ମଧ୍ୟରେ ସଂଯୋଗ ନ ହୋଇଥିଲେ, ଏହା ନଟ୍ଆଉଟ୍ ହୋଇଥାନ୍ତା। ଏ ନେଇ ଆଇସିସିରେ ଏକ ସ୍ବତନ୍ତ୍ର ନିୟମ ରହିଛି।