ଲଣ୍ଡନ, ୨୯।୭: ଓଭାଲ ଗ୍ରାଉଣ୍ଡରେ ଚାଲିଥିବା ୫ମ ତଥା ଅନ୍ତିମ ଆଶେସ କ୍ରିକେଟ ଟେଷ୍ଟରେ ଷ୍ଟିଭେନ୍ ସ୍ମିଥଙ୍କ ଅର୍ଦ୍ଧଶତକ ଅଷ୍ଟ୍ରେଲିଆର ସମ୍ମାନ ରଖିଛି। ପ୍ରଥମ ଇନିଂସରେ ଇଂଲଣ୍ଡ ୨୮୩ ରନ କରିଥିବାବେଳେ ଶୁକ୍ରବାର ଦ୍ୱିତୀୟ ଦିବସରେ ରିପୋର୍ଟ ପ୍ରସ୍ତୁତ ବେଳକୁ ଅଷ୍ଟ୍ରେଲିଆ ୮ ଉଇକେଟ ହରାଇ ୨୩୯ ରନ ସଂଗ୍ରହ କରିଛି। ସ୍ମିଥ ୭୧ ରନକରି ଆଉଟ ହୋଇଥିବାବେଳେ ଅଧିନାୟକ ପ୍ୟାଟ୍ କୁମିନ୍ସ ୨୨ ରନରେ ଅପରାଜିତ ରହିଛନ୍ତି।
ପ୍ରଥମ ଦିବସର ଅସମାପ୍ତ ସ୍କୋର ୬୧/୧ରୁ ଖେଳ ଆରମ୍ଭ କରିଥିବା ଅଷ୍ଟ୍ରେଲିଆ ଦ୍ୱିତୀୟ ଦିବସରେ ଚା’ ବିରତି ପୂର୍ବରୁ ୧୮୫ ରନ ମଧ୍ୟରେ ୭ ଉଇକେଟ ହରାଇ ବିପଦରେ ପଡ଼ିଥିଲା। ମାର୍ନସ ଲାବୁସେନ ୯, ଉସମାନ ଖ୍ବାଜା ୪୭, ଟ୍ରାଭିସ ହେହ୍ ୪, ମିଚେଲ ମାର୍ଶ ୧୬, ଆଲକ୍ସ କାରେ ୧୦ ଓ ମିଚେଲ ଷ୍ଟାର୍କ ୭ ରନକରି ଆଉଟ ହୋଇଥିଲେ। ତେବେ ମିଡିଲ ଅର୍ଡରରେ ସ୍ମିଥ ଏବଂ ଲୋୟର ଅର୍ଡରରେ କୁମିନ୍ସ ସତର୍କତାର ସହ ବ୍ୟାଟିଂ କରିବାରୁ ଦଳ ଏକ ସମ୍ମାନଜନକ ସ୍କୋର କରିବାରେ ସକ୍ଷମ ହୋଇଥିଲେ। ସ୍ମିଥ ଓ କୁମିନ୍ସ ୮ମ ଉଇକେଟରେ ୧୦୩ ବଲ୍ରୁ ମୂଲ୍ୟବାନ ୫୪ ରନର ଭାଗୀଦାରି ଗଢ଼ିଥିଲେ। ୯୦ତମ ଓଭରର ଶେଷ ବଲ୍ରେ ଉଇକେଟ କିପର ଜନି ବେୟାରଷ୍ଟୋଙ୍କ ହାତରେ ସ୍ମିଥଙ୍କୁ କ୍ୟାଚ କରାଇ କ୍ରିସ୍ ଓ୍ବକ୍ସ ଇଂଲଣ୍ଡକୁ ପ୍ରତୀକ୍ଷିତ ବ୍ରେକ୍ ଥ୍ରୁ ଦେଇଥିଲେ।
ସଂକ୍ଷିପ୍ତ ସ୍କୋର
ଇଂଲଣ୍ଡ ପ୍ରଥମ ଇନିଂସ: ୨୮୩। ଅଷ୍ଟ୍ରେଲିଆ ପ୍ରଥମ ଇନିଂସ (ଅସମାପ୍ତ): ୨୩୯/୮ (ଷ୍ଟିଭ୍ ସ୍ମିଥ-୭୧, ଉସମାନ ଖ୍ବାଜା-୪୭, ପ୍ୟାଟ୍ କୁମିନ୍ସ-୨୨, ଷ୍ଟୁଆର୍ଟ ବ୍ରଡ୍-୨/୪୯, ମାର୍କ ଉଡ୍-୨/୪୦, କ୍ରିସ୍ ଓ୍ବକ୍ସ-୨/୪୦, ଜେମ୍ସ ଆଣ୍ଡରସନ-୧/୫୫, ଜୋ ରୁଟ୍-୧/୨୦)।