ନୂଆଦିଲ୍ଲୀ, ୧୮।୭- ଭାରତୀୟ ମହିଳା କ୍ରିକେଟ୍ ଦଳର ଷ୍ଟାର୍ ଖେଳାଳି ସ୍ମୃତି ମନ୍ଧାନା ଶନିବାର ୨୪ ବର୍ଷରେ ପାଦ ଥାପିଛନ୍ତି। ଏହି ଅବସରରେ କ୍ରିକେଟ୍ ଜଗତର ବହୁ ଜଣାଶୁଣା ଖେଳାଳି ମନ୍ଧାନାଙ୍କୁ ଜନ୍ମଦିବସର ଅଭିନନ୍ଦନ ଜଣାଇଛନ୍ତି। ସେମାନଙ୍କ ମଧ୍ୟରେ ଯୁବରାଜ ସିଂ, ଶିଖର ଧାଓ୍ବନ, ଆକାଶ ଚୋପ୍ରା, ଝୁଲଣ ଗୋସ୍ବାମୀ, ମହିଳା ଟିମ୍ର କୋଚ୍ ଡବ୍ଲ୍ୟୁଭି ରମନ, ରାହୁଲ ଶର୍ମା ଓ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ପ୍ରମୁଖ ରହିଛନ୍ତି।
ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିବା ମନ୍ଧାନା ଖୁବ୍ ଅଳ୍ପ ସମୟ ମଧ୍ୟରେ କ୍ରିକେଟ୍ ଜଗତରେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଥିଲେ। ନିଜର ବିସ୍ଫୋରକ ବ୍ୟାଟିଂ ପାଇଁ ଭାରତୀୟ ମହିଳା କ୍ରିକେଟ୍ ଦଳରେ ତାଙ୍କୁ ବୀରେନ୍ଦ୍ର ସେହ୍ବାଗଙ୍କ ସହ ତୁଳନା କରାଯାଏ। ୨୦୧୩ରେ ଏକଦିବସୀୟ ଓ ୨୦୧୪ରେ ଟେଷ୍ଟ କ୍ୟାରିୟର ଆରମ୍ଭ କରିଥିବା ଏହି ମୁମ୍ବାଇ ଜନ୍ମିତ ବାମହାତୀ ବ୍ୟାଟ୍ସଓମ୍ୟାନ ୨୦୧୬ରେ ‘ଆଇସିସି ଓମେନ୍ସ ଟିମ୍ ଅଫ୍ ଇୟର’ରେ ସ୍ଥାନ ପାଇଥିଲେ। ବର୍ତ୍ତମାନ ସୁଦ୍ଧା ସେ ୫୧ ଏକଦିବସୀୟ ଓ ୭୫ ଟି୨୦ ମ୍ୟାଚ୍ ଖେଳି ଯଥାକ୍ରମେ ୨୦୨୫ ଓ ୧୭୧୬ ରନ ସଂଗ୍ରହ କରିଛନ୍ତି। ଏକଦିବସୀୟ କ୍ରିକେଟ୍ରେ ତାଙ୍କ ନାମରେ ୪ଟି ଶତକ ଲିପିବଦ୍ଧ ରହିଛି, ଯାହା ମନ୍ଧାନାଙ୍କୁ ଜଣେ ନିର୍ଭିକ ବ୍ୟାଟ୍ସଓମ୍ୟାନର ପରିଚୟ ଦିଏ। ମନ୍ଧାନା ଦ୍ୱିତୀୟ ଦ୍ରୁତତ୍ତମ ମହିଳା କ୍ରିକେଟର୍ ଭାବେ ଟି୨୦ କ୍ରିକେଟ୍ରେ ଏକ ହଜାର ରନ୍ ପୂରଣ କରିଛନ୍ତି। ତେବେ ଏହି ଗ୍ଲାମରସ୍ ମହିଳା କ୍ରିକେଟର୍ ନିଜ ବିବାହ ପାଇଁ ଦୁଇଟି ସର୍ତ୍ତ ରଖିଛନ୍ତି। ନିକଟରେ ଜଣେ ପ୍ରଶଂସକ ସୋସିଆଲ ମିଡିଆ ଟୁଇଟର୍ ମାଧ୍ୟମରେ ତାଙ୍କୁ ବିବାହ ବିଷୟରେ ପଚାରିଥିଲେ। ‘ଆପଣଙ୍କୁ ବିବାହ କରିବାକୁ ଥିବା ବ୍ୟକ୍ତି ନିକଟରେ କେଉଁ ଗୁଣ ରହିବା ଉଚିତ୍’ ବୋଲି ପ୍ରଶଂସକ ଜଣଙ୍କ ପ୍ରଶ୍ନ କରିଥିଲେ। ୨୪ ବର୍ଷୀୟା ମନ୍ଧାନା ଉତ୍ତରରେ ୨ଟି ସର୍ତ୍ତ ରଖିଥିଲେ। ସେ କହିଥିଲେ, ଏକ ନମ୍ବରେ ସେହି ବ୍ୟକ୍ତି ମୋତେ ଭଲ ପାଉଥିବା ଏବଂ ଦ୍ୱିତୀୟରେ ଏକ ନମ୍ବର ସର୍ତ୍ତକୁ ସର୍ବଦା ମନେ ରଖିବା ଉଚିତ୍।
