ନୂଆଦିଲ୍ଲୀ, ୨୬।୦୭: ଭାରତୀୟ ମହିଳା କ୍ରିକେଟ୍ ଟିମ୍ରେ ଟି-୨୦ ଅନ୍ତର୍ଜାତୀୟ ଫର୍ମାଟ୍ରେ ସବୁଠାରୁ ଅଧିକ ରନ୍ କରିଥିବା ଖେଳାଳି ଭାବେ ବ୍ୟଟ୍ସମ୍ୟାନ୍ ହରମନ୍ପ୍ରୀତ କୌରଙ୍କ ନାମରେ ରେକର୍ଡ ରହିଥିଲା । ହେଲେ ବର୍ତ୍ତମାନ ଏହି ରେକର୍ଡ ଭାଙ୍ଗିଛି । ସ୍ମୃତି ମାନ୍ଧନା ଏହି ରେକର୍ଡ ଭାଙ୍ଗିଛନ୍ତି । କିନ୍ତୁ ଦୁହିଁଙ୍କ ମଧ୍ୟରେ ରନ୍ର ବ୍ୟବଧାନ ଅଧିକ ନାହିଁ । ତେଣୁ ପୁଣିଥରେ ଏକ ନମ଼୍ବରକୁ ଫେରିବା ପାଇଁ ହରମନ୍ପ୍ରୀତ୍ଙ୍କ ନିକଟରେ ସୁଯୋଗ ରହିଛି ।
ଭାରତ ପାଇଁ ହରମନ୍ପ୍ରୀତ୍ ୧୭୨ଟି ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି ଏବଂ ୩,୪୧୫ ରନ୍ ସଂଗ୍ରହ କରିଛନ୍ତି । ସେ ଗୋଟିଏ ଶତକ ଏବଂ ୧୨ ଅର୍ଦ୍ଧ ଶତକ ହାସଲ କରିଛନ୍ତି । ଅନ୍ୟପଟେ ସ୍ମୃତି ୧୪୦ ଟି ଟି-୨୦ ମ୍ୟାଚ୍ ଖେଳି ୩,୪୩୩ ରନ୍ କରିଛନ୍ତି । ସେ ଗୋଟିଏ ବି ଶତକ କରିନଥିବା ବେଳେ ୨୫ଟି ଅର୍ଦ୍ଧ ଶତକ ହାସଲ କରିଛନ୍ତି ।
ସୂଚନା ଥାଉକି, ବାଂଲାଦେଶକୁ ୧୦ ୱିକେଟ୍ରେ ହରାଇ ଭାରତୀୟ ଟିମ୍ ମହିଳା ଏସିଆ କପ୍ର ଫାଇନାଲ୍ରେ ପ୍ରବେଶ କରିଛି । ଫାଇନାଲ୍ରେ ଇଣ୍ଡିଆ ଟିମ୍ ପାକିସ୍ତାନକୁ ଭେଟିପାରେ । ସେମିଫାଇନାଲରେ ପାକିସ୍ତାନୀ ଦଳ ଆୟୋଜକ ଶ୍ରୀଲଙ୍କାକୁ ଭେଟିବ । ବାଂଲାଦେଶର ୮୧ ରନର ଲକ୍ଷ୍ୟକୁ ପିଛାକରି ଭାରତ ବିନା କୌଣସି ୱିକେଟ୍ରେ ୧୧ ଓଭରରେ ୮୩ ରନ କରି ମ୍ୟାଚ ଜିତିଛି । ଓପନର୍ ସ୍ମୃତି ମାନ୍ଧନା ୫୫ ରନର ଅପରାଜିତ ଇନିଂସ ଖେଳିଥିବା ବେଳେ ଶେଫାଲୀ ଭର୍ମା ୨୬ ରନ ସ୍କୋର କରି ଅପରାଜିତ ରହିଥିଲେ ।
ବାଂଲାଦେଶର ଡାମ଼୍ବୁଲା ଇଣ୍ଟରନ୍ୟାସନାଲ କ୍ରିକେଟ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ପ୍ରଥମେ ବ୍ୟାଟିଂ କରି ୮ ୱିକେଟରେ ୮୦ ରନ ସଂଗ୍ରହ କରିଥିଲା ବାଂଲାଦେଶ । ଭାରତର ରେଣୁକା ସିଂ ଏବଂ ରାଧା ଯାଦବ ୩ଟି ଲେଖାଏଁ ୱିକେଟ ନେଇଥିଲେ। ଏହାର ଜବାବରେ ଭାରତ ୬୬ ବଲରେ ୮୩ ରନ କରି ମ୍ୟାଚ ଜିତିଥିଲା । ଏଥିସହିତ ଟିମ ଇଣ୍ଡିଆ ଫାଇନାଲ ପାଇଁ ଟିକେଟ ହାସଲ କରିଛି।