ଯାଜପୁର ଟାଉନ,୮।୧୧(ଡି.ଏନ.ଏ.): ଯାଜପୁର ସହରସ୍ଥ ଶିତଳେଶ୍ୱର ଅଞ୍ଚଳର ରାଧା କବାଡ଼ିଆ ଦୋକାନରେ ଚୋରା ଗାଡ଼ି କଟାଯାଇ ରାଜ୍ୟ ବାହାରେ ବିକ୍ରି କରାଯାଉଥିଲା। ଏକଥା ଜଣାପଡ଼ିବା ପରେ ହଇଚଇ ସୃଷ୍ଟି ହୋଇଛି। ଯାଜପୁର, କଟକ, ଭଦ୍ରକ ଓ କେନ୍ଦ୍ରାପଡ଼ା ଅଞ୍ଚଳରୁ ଚୋରି ହୋଇଥିବା ଗାଡ଼ିର ମାଲିକମାନେ ନିଜ ଗାଡ଼ି ଖୋଜିବା ପାଇଁ ରବିବାର ଯାଜପୁର ଟାଉନରେ ପହଞ୍ଚିଛନ୍ତି। ପୋଲିସ ଉକ୍ତ କବାଡ଼ିଆ ଦୋକାନରେ ଛାନଭିନ୍ କରି ଏପର୍ଯ୍ୟନ୍ତ ୬ରୁ ଊର୍ଦ୍ଧ୍ୱ ଗାଡ଼ି ଚିହ୍ନଟ କରିଛି, ଯାହାକି ସମ୍ପୂର୍ଣ୍ଣ କଟା ସରିଛି। ଏହି ଘଟଣାରେ କବାଡ଼ିଆ ଦୋକାନ ମାଲିକ ରାଧା ବେହେରା, ଗାଡ଼ି ଚୋରିକରି ଆଣିଥିବା ନୂଆ ଗୋବିନ୍ଦପୁରର ମାନସ ପାଲ ଓ ଗାଡ଼ି କଟାଳି ଜୁମା ଖାଁଙ୍କୁ ପୋଲିସ ଅଟକ ରଖି ପଚରାଉଚରା କରୁଛି।
ଗତ ଶନିବାର କଟକ ଜଗତପୁର ଅଞ୍ଚଳର ପ୍ରତାପ ବାରିକଙ୍କ ଏକ ପିକ୍ଅପ୍ ଭ୍ୟାନ୍ ଚୋରି ହୋଇଥିଲା। ଏହି ଗାଡ଼ିରେ ଜିପିଏସ୍ ଲାଗିଥିବାରୁ ମାଲିକ ଟ୍ରାକିଂ କରି ଗାଡ଼ିଟି ଯାଜପୁର ଟାଉନରେ ଥିବା ଜାଣିବାକୁ ପାଇଥିଲେ। ତେଣୁ ସେ ଯାଜପୁର ଟାଉନ ଥାନାରେ ପହଞ୍ଚତ୍ ପୋଲିସ ସହାୟତା ଲୋଡ଼ିଥିଲେ। ପୋଲିସ ଟ୍ରାକିଂ କରି ରାଧା କବାଡ଼ିଆ ଦୋକାନରେ ଗାଡ଼ି ଥିବା ଜାଣିବାକୁ ପାଇଥିଲା। ପୋଲିସ ଚଢ଼ାଉ କରିବା ସମୟରେ ଉକ୍ତ ଗାଡ଼ିକୁ କଟାଯିବା ପାଇଁ ବନ୍ଦୋବସ୍ତ କରାଯାଇଥିଲା। ମାତ୍ର ପୋଲିସର ହସ୍ତକ୍ଷେପ ଫଳରେ ଗାଡ଼ିଟିକୁ ଉଦ୍ଧାର କରାଯାଇଥିଲା। ଏହି ଚୋରାଗାଡି ର଼୍ୟାକେଟ୍ ଖବର ପାଇବା ପରେ ଯାଜପୁର ଜିଲାର ୬ଟି ଥାନା ପୋଲିସ ଗାଡ଼ିଚୋରିର ଶିକାର ମାଲିକଙ୍କ ସହ ପହଞ୍ଚତ୍ ଖାନ୍ତଲାସ କରିଥିଲେ। ଶହଶହ ଚୋରାଗାଡ଼ି ଅତ୍ୟାଧୁନିକ ମେଶିନ୍ ଓ ଗ୍ୟାସ କଟର୍ ଯୋଗେ ଖୁବ କମ୍ ସମୟରେ କଟାଯାଇ ରାଜ୍ୟ ବାହାରକୁ ପଠାଯାଉଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଏଠାରେ ଚୋରା ଗାଡ଼ି ଆସିବା ପରେ ତୁରନ୍ତ ଇଞ୍ଜିନ୍, ଚେଚିସ୍, ଡୋର, କାଚ ଓ ଅନ୍ୟାନ୍ୟ ଜିନିଷକୁ ଅଲଗାଅଲଗା କରି ରଖାଯାଇଥିବାରୁ ଏହାକୁ ମାଲିକମାନେ ଚିହ୍ନିବା କଷ୍ଟକର ହୋଇପଡୁଛି। ଚୋରା ଟ୍ରକ୍, ବୋଲେରୋ, ଟାଟା ମ୍ୟାଜିକ୍ ଓ ପିକ୍ଅପ୍ ଭ୍ୟାନ୍ ଆଦି ଶହଶହ ଗାଡ଼ି କଟାଯାଇଥିବା ଯାଜପୁର ପୋଲିସକୁ ସୂଚନା ମିଳିଛି। ପୋଲିସ କବାଡ଼ିଆ ଦୋକାନରେ ଲାଗିଥିବା ସିସିଟିଭି ଫୁଟେଜକୁ ଆଧାର କରି ଅନେକ ତଥ୍ୟ ଯୋଗାଡ଼ କରିସାରିଛି। ଏହି କାରବାରରେ ରାଜ୍ୟ ଏବଂ ରାଜ୍ୟ ବାହାରର ଅନେକ ଲୋକଙ୍କ ସମ୍ପୃକ୍ତି ରହିଛି। ତଦନ୍ତରେ ବାଧା ଉପୁଜିବ ବୋଲି ପୋଲିସ ଅଧିକ ସୂଚନା ଦେଉନାହିଁ। ତେବେ ସହରରେ ଏପରି କାରବାର ଚାଲୁଥିଲେ ମଧ୍ୟ ପୋଲିସ କିପରି ଜାଣି ପାରୁ ନ ଥିଲା ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।