ବାରିପଦା ଅଫିସ,୩ା୧୨: ମୟୂରଭଞ୍ଜ ଜିଲାରେ ବିଷାକ୍ତ ସାପ ଧରିବା ବାହାନାରେ ବିଷ ସଂଗ୍ରହ ର଼୍ୟାକେଟ ସକ୍ରିୟ ହୋଇପଡ଼ିଛନ୍ତି। ସାପ ଧରିବା ପରେ ବନ ବିଭାଗକୁ ନ ଜଣାଇ ବିଷ ଚୋରାଚାଲାଣ କରାଯାଉଛି। ଏ ନେଇ ବିଭାଗୀୟ କର୍ତ୍ତୃପକ୍ଷଙ୍କ ନିକଟରେ କୌଣସି ସୂଚନା ନ ରହିବା ଆଶ୍ଚର୍ଯ୍ୟଚକିତ କରିଛି। ଗୁରୁବାର ଏକ ଅଜଗର ଉଦ୍ଧାର ପରେ ଏହାକୁ ସୁରକ୍ଷିତ ସ୍ଥାନରେ ଛଡ଼ା ନ ଯାଇ ଜନଗହଳିପୂର୍ଣ୍ଣ ବାରିପଦା ସହରରେ ପ୍ରଦର୍ଶନ କରାଯିବା ଘଟଣାରୁ ଏହା ସ୍ପଷ୍ଟ ହୋଇଛି। ନିୟମ ଉଲ୍ଲଂଘନ କରିଥିବା ସାପ ଧରାଳି ପରିବାର ବିରୋଧରେ ବିଭାଗ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ବିଭାଗ ଦ୍ୱାରା ସାର୍ଟିଫିକେଟ ହାସଲ କରି ନିଜକୁ ବିଭାଗୀୟ କର୍ମଚାରୀ ବୋଲାଉଥିବା ବନ୍ୟପ୍ରାଣୀ ଉଦ୍ଧାରକାରୀ ସଦସ୍ୟମାନେ ନିୟମର ଦୁରୁପୋଯୋଗ କରୁଛନ୍ତି। ଫଳରେ ଶିମିଳିପାଳରେ ଥିବା ବନ୍ୟପ୍ରାଣୀ ମୁତ୍ୟୁମୁଖରେ ପଡ଼ୁଛନ୍ତି।
ଅଭୟାରଣ୍ୟ ପାଦଦେଶରେ ଥିବା ଗଁା ଗଣ୍ଡା ଓ ସହର ମଧ୍ୟରେ ବିଷାକ୍ତ ସାପ ଦେଖିବାକୁ ମିଳିଥାଏ ା
ନାଗ, ଚିତି, ଅହିରାଜ, ଚନ୍ଦ୍ରବୋଡ଼ା, ରଣା ଭଳି ବିଷାକ୍ତ ସାପଗୁଡ଼ିକ ଅଧିକାଂଶ ସମୟରେ ଲୋକଙ୍କ ଘର ମଧ୍ୟରେ ପ୍ରବେଶ କରିଥାନ୍ତି। ସାପକୁ ଦେଖି ଲୋକେ ଭୟଭୀତ ହେବା ସହ ସାପଧରାଳିଙ୍କ ସହାୟତା ନେଇଥାନ୍ତି। ବେସରକାରୀ ସଂସ୍ଥା ସ୍ନେକ ହେଲ୍ପଲାଇନ୍ର ସଦସ୍ୟ ବୋଲାଉଥିବା କେତେଜଣ ସାପଧରାଳି ବିଷଧର ସାପକୁ ଧରି ନିଜ ଘରକୁ ନେଇ ଆସନ୍ତି। ପରେ ଏହି ସାପକୁ ନିକଟସ୍ଥ ଶିମିଳିପାଳ ଅଭୟାରଣ୍ୟ ଅଞ୍ଚଳରେ ଛାଡ଼ି ଦେଇଥିବା ପ୍ରକାଶ କରନ୍ତି। ସାପକୁ ଧରିବା ପରେ ଉପଯୁକ୍ତ ପରିବେଶରେ ନ ଛାଡ଼ିଲେ ତା’ର ବଞ୍ଚତ୍ବା କଷ୍ଟକର ହୋଇପଡ଼େ ବୋଲି ଅବସରପ୍ରାପ୍ତ ଉପ ବନ ସଂରକ୍ଷକ ବଟକୃଷ୍ଣ ପାଢ଼ୀ କହିିଛନ୍ତି। କେତେଜଣ ସାପ ଧରାଳି ଘରେ ପଶିଥିବା ସାପକୁ ଧରିବା ପାଇଁ ୫ଶହ ଟଙ୍କା ଲେଖାଏ ଆଦାୟ କରୁଛନ୍ତି। ସାପ ଧରିବା ପରେ ଟଙ୍କା ନେଇ ସାପକୁ ଛାଡ଼ିବା ପରିବର୍ତ୍ତେ ବିଷାକ୍ତ ସାପର ବିଷକୁ ସଂଗ୍ରହ କରୁଛନ୍ତି। ରୋଜଗାର ଲୋଭରେ ବିଲୁପ୍ତପ୍ରାୟ ସାପକୁ ଧରିବା ସମୟରେ ନିୟମାବଳୀ ପ୍ରତି ଦୃଷ୍ଟି ନ ଦେଇ ସେମାନେ ବାହାବା ନେବାକୁ ଦୁଃସାସହିକ କାର୍ଯ୍ୟ କରୁଛନ୍ତି। ବିଷଧର ସାପ ବାହାର ରାଜ୍ୟକୁ ଚାଲାଣ ହେଉଥିବା ନେଇ କିଛି ଅବସରପ୍ରାପ୍ତ କର୍ମଚାରୀ ନାମ ଗୋପନ ରଖି ପ୍ରକାଶ କରିଛନ୍ତି। ଏଭଳି ର଼୍ୟାକେଟକୁ ଧରି ବନ୍ୟପ୍ରାଣୀଙ୍କୁ ସୁରକ୍ଷା ଯୋଗାଇ ଦେବାକୁ ଜିଲାବାସୀ ଦାବି କରୁଛନ୍ତି। ବିଲୁପ୍ତପ୍ରାୟ ପ୍ରଜାତିର ବନ୍ୟପ୍ରାଣୀଙ୍କୁ ଧରିବା ପୂର୍ବରୁ ବନବିଭାଗ କର୍ମଚାରୀଙ୍କ ଉପସ୍ଥିତି ଓ ଆବଶ୍ୟକ ସରଞ୍ଜାମ ସହିତ ଉଦ୍ଧାର କରିବାର ନିୟମ ରହିଥିଲେ ମଧ୍ୟ ଏହାକୁ ଉଲ୍ଲଂଘନ କରାଯାଉଛି। ଜିଲାରେ କେତେଜଣ ସାପ ଧରାଳି ଅଛନ୍ତି ଓ କେତେ ସଂଖ୍ୟକ ସାପ ଧରି ଜଙ୍ଗଲରେ ଛାଡୁଛନ୍ତି ତାର କୌଣସି ତଥ୍ୟ ବିଭାଗ ନିକଟରେ ନାହିଁ। ଏ ସଂକ୍ରାନ୍ତରେ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର ଉପ ନିର୍ଦ୍ଦେଶକ ସମ୍ରାଟ ଗୌଡ଼ା କୁହନ୍ତି, ଜିଲାରେ ସାପ ଧରିବା ପାଇଁ କୌଣସି ସରକାରୀ କର୍ମଚାରୀ ନିୟୋଜିତ ହୋଇ ନ ଥିବା ବେଳେ ସ୍ବୀକୃତିପ୍ରାପ୍ତ ସାପ ଧରାଳି ମଧ୍ୟ ନାହାନ୍ତି। ସରକାରୀ ବ୍ୟବସ୍ଥା ନ ଥିବାରୁ ସାପ ଧରାଳିମାନଙ୍କୁ କେବଳ ସାର୍ଟିଫିକେଟ ଖଣ୍ଡେ ଦେଇ ସନ୍ତୁଷ୍ଟ କରିବାକୁ ପଡୁଛି। ତେବେ ବିଷ ସଂଗ୍ରହ ଓ ସାପ ଚାଲାଣ ଘଟଣା ଜଣାପଡ଼ିଲେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏପରିକି ସାପ ଧରି ଘରେ ରଖୁଥିବା ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ତେବେ ବଣଜଙ୍ଗଲ ପରିବେଷ୍ଟିତ ଅଞ୍ଚଳଗୁଡ଼ିକରେ ସାପ ବାହାରୁଥିବାରୁ ଅଭିଜ୍ଞ ସାପ ଧରାଳି ନିଯୁକ୍ତି କରିବା ପାଇଁ ଜିଲାବାସୀ ଦାବି କରିଛନ୍ତି।