ପୁରୀ ଅଫିସ,୩୦ା୫: ଜୁନ ୪ତାରିଖରେ ମହାପ୍ରଭୁଙ୍କ ସ୍ନାନଯାତ୍ରା ଅନୁଷ୍ଠିତ ହେବାକୁ ଯାଉଛି। ଫଳରେ ଶ୍ରୀମନ୍ଦିର ପ୍ରଶାସନଠାରୁ ଜିଲା ପ୍ରଶାସନ ଏବଂ ସେବାୟତମାନଙ୍କ ପକ୍ଷରୁ ବିଭିନ୍ନ ପ୍ରସ୍ତୁତି ଆରମ୍ଭ ହୋଇଛି। ଏ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ ଏବଂ ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ତଥା ଜିଲାପାଳ ସମର୍ଥ ବର୍ମା ସୋମବାର ମଧ୍ୟାହ୍ନରେ ଶ୍ରୀମନ୍ଦିର ଯାଇ ବିଭିନ୍ନ କାର୍ଯ୍ୟର ଅନୁଧ୍ୟାନ କରିଛନ୍ତି। ଏସମ୍ପର୍କରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ କହିଛନ୍ତି, ରଥଯାତ୍ରା ଜୁନ ୨୦ରେ ଅନୁଷ୍ଠିତ ହେବ କିନ୍ତୁ ଜୁନ ୪ରେ ମହାପ୍ରଭୁଙ୍କ ସ୍ନାନଯାତ୍ରା ରହିଛି। ବର୍ତ୍ତମାନ ମହାପ୍ରଭୁଙ୍କ ସ୍ନାନଯାତ୍ରା ଯେପରି ଶୃଙ୍ଖଳିତ ହେବ ସେନେଇ ସବୁ ବ୍ୟବସ୍ଥା କରାଯାଉଛି। ତେବେ ମଙ୍ଗଳବାର ରାଜେନ୍ଦ୍ର ଅଭିଷେକ ରହିଛି। ସେହିପରି ବୁଧବାର ଋୁକ୍ମଣୀ ବିବାହ ରହିଛି। ତେବେ ମହାପ୍ରଭୁଙ୍କ ନୀତିରେ ଯାହା ସବୁ ବ୍ୟବହାର ସେସବୁ କଢାଯାଉଛି। ଅପରପକ୍ଷେ ସ୍ନାନବେଦିରେ ଠାକୁର ଓ ସେବାୟତ ଯେଉଁଠାରେ ବସିବେ ତାହାର ସମୀକ୍ଷା କରାଯାଇଛି। ରଥଖଳାରେ ରଥ ନିର୍ମାଣ କାର୍ଯ୍ୟ ମଧ୍ୟ ଦ୍ରୁତ ଗତିରେ ଆଗେଇ ଚାଲିଛି। ସମସ୍ତ କାର୍ଯ୍ୟ ଆଖି ଆଗରେ ରଖି ସେବାୟତମାନଙ୍କ ସହ ଆଲୋଚନା କରାଯାଇଛି। ସମସ୍ତଙ୍କ ସମନ୍ବୟରେ କାର୍ଯ୍ୟ ହେବ। ବିଭିନ୍ନ ନିଯୋଗ ସହ ଆଲୋଚନା କରାଯାଇଛି। ଶ୍ରୀମନ୍ଦିର ଚାରିପାଖରେ ଚାଲିଥିବା ପରିକ୍ରମା ପ୍ରକଳ୍ପ କାର୍ଯ୍ୟ ଉପରେ ପ୍ରଶାସନ ନଜର ରଖିଛି। ରେଗୁଲାର କାର୍ଯ୍ୟ ନେଇ ସମୀକ୍ଷା କରାଯାଉଛି। ବରିଷ୍ଠ ଅଧିକାରୀମାନେ କାର୍ଯ୍ୟ ଦେଖି ଯାଇଛନ୍ତି। ଡେଡ୍ ଲାଇନ ସମ୍ପର୍କରେ ସେମାନଙ୍କୁ ସଚେତନ କରାଯାଇଛି। ନିର୍ଦ୍ଧାରିତ ସମୟ ମଧ୍ୟରେ କାର୍ଯ୍ୟ ସରିବ। ତେବେ ସ୍ନାନପୂଣ୍ଣିମାରେ ଲକ୍ଷାଧିକ ଭକ୍ତଙ୍କ ସମାଗମ ହେବ ତେଣୁ ଗ୍ରୀଷ୍ମ ପ୍ରବାହକୁ ନଜରରେ ରଖି ପାଣି ସିଞ୍ଚନ କରାଯିବ। ସେହିଭଳି ରୋଡରେ ମ୍ୟାଟ ପକାଯିବା ସହ ବିଭିନ୍ନ ପଦକ୍ଷେପ ନିଆଯିବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଦାସ କହିଛନ୍ତି। ସେହିପରି ଜିଲାପାଳ ସମର୍ଥ ବର୍ମା କହିଛନ୍ତି, ମହାପ୍ରଭୁଙ୍କ ସ୍ନାନଯାତ୍ରା ନେଇ ପ୍ରଶାସନ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଉଛି। ଗତବର୍ଷଠାରୁ ଚଳିତବର୍ଷ ଆହୁରି ଭଲ କରିବା ପାଇଁ ଚେଷ୍ଟା କରାଯାଉଛି। ପ୍ରବଳ ଖରା ହେଉଥିବାରୁ ଅଧିକାଂଶ ଲୋକଙ୍କୁ ଶେଡ୍ ଭିତରେ ରଖିବାର ବ୍ୟବସ୍ଥା କରାଯାଉଛି। ପର୍ଯ୍ୟାପ୍ତ ପରିମାଣରେ ପିଇବା ପାଣିର ବ୍ୟବସ୍ଥା କରାଯାଉଛି। ଭକ୍ତଙ୍କ ପାଇଁ ବ୍ୟାରିକେଡ ବ୍ୟବସ୍ଥା କରାଯିବ। ଶୃଙ୍ଖଳିତ ଦର୍ଶନ ଉପରେ ଧ୍ୟାନ ଦିଆଯାଉଛି। ମହାପ୍ରଭୁଙ୍କ ଆଶୀର୍ବାଦରୁ ଓ ସମସ୍ତଙ୍କ ସହଯୋଗରେ ମହାପ୍ରଭୁଙ୍କ ନୀତି ଶୃଙ୍ଖଳିତ ହେବା ସହ ଭଲରେ ସ୍ନାନଯାତ୍ରା ସମ୍ପନ୍ନ ହେବ ବୋଲି ଜିଲାପାଳ ବର୍ମା ଆଶା କରିଥିବା କହିଛନ୍ତି।