ଆମ ପୃଥିବୀ ଅଜବ ଜିନିଷରେ ପରିପୂର୍ଣ୍ଣ। ଅନେକ ଥର ଆମେ ବିଶ୍ୱର ବିଭିନ୍ନ ପ୍ରାନ୍ତରୁ ଅଜବ ଘଟଣା ଶୁଣିବାକୁ ପାଇଥାଉ, ସେଥିରୁ କେତେକ ଆମକୁ ଆଶ୍ଚର୍ଯ୍ୟ କରିଦେଇଥାଏ। ଆଜି ଏପରି ଏକ ଘଟଣା ବିଷୟରେ କହିବୁ, ଯାହା ଜାଣିଲେ ଆଶ୍ଚର୍ଯ୍ୟ ହେବେ। ମରୁଭୂମି ପ୍ରାୟତଃ ପ୍ରବଳ ଗରମ ଆଉ ବର୍ଷା ବିହୀନ ସ୍ଥାନ ଭାବେ ଜଣାଶୁଣା। ଏଠାରେ ଗରମ ପବନ ପ୍ରବାହିତ ହୁଏ। କିନ୍ତୁ ଦଶନ୍ଧି ପରେ ଏଠାରେ ତୁଷାରପାତ ହୋଇଛି। ଯାହା ଦେଖି ସାରା ବିଶ୍ୱର ବୈଜ୍ଞାନିକମାନେ ଆଶ୍ଚର୍ଯ୍ୟ ହୋଇଯାଇଛନ୍ତି।
ଆଶ୍ଚର୍ଯ୍ୟ ଲାଗିଲେ ମଧ୍ୟ ସତ। ଉତ୍ତର ଆମେରିକାର ସୋନୋରାନ ମରୁଭୂମିରେ ଏପରି ଘଟଣା ଦେଖିବାକୁ ମିଳିଛି। ପ୍ରାୟ ୧ ଲକ୍ଷ ବର୍ଗ ମାଇଲ ପର୍ଯ୍ୟନ୍ତ ବରଫ ପଡ଼ିଛି। ଏହି ମରୁଭୂମିରେ ତାପମାତ୍ରା ୪୮ ଡିଗ୍ରୀ ସେଲ୍ସିୟସ୍ ପର୍ଯ୍ୟନ୍ତ ରହିଥାଏ। ଏଠାରେ ଚାରିଆଡ଼େ ବାଲି ଦେଖିବାକୁ ପାଇବେ। ଏଠାରେ ରହିବା କାହା ପାଇଁ ସହଜ ନୁହେଁ । କାରଣ କୌଣସି ସ୍ଥାନରେ ଜଳ ନାହିଁ। କିନ୍ତୁ କିଛି ଦିନ ପୂର୍ବରୁ ଏଠାରେ ପ୍ରବଳ ତୁଷାରପାତ ହୋଇଥିଲା। ପୁଲିଟର-ପୁରସ୍କାର ପ୍ରାପ୍ତ ଲ୍ୟାଣ୍ଡସ୍କେପ ଫଟୋଗ୍ରାଫର ଜ୍ୟାକ୍ ଡାଇକିଙ୍ଗା ଏହି ଐତିହାସିକ ଦୃଶ୍ୟକୁ କଏଦ କରିଥିଲେ। ଫଟୋଗୁଡ଼ିକରେ ବରଫ ଆଚ୍ଛାଦିତ କାକ୍ଟସ୍ ଦେଖିବାକୁ ମିଳିଛି। ୧୯୭୬ରୁ ସୋନୋରାନ ମରୁଭୂମିର ଫଟୋଗ୍ରାଫି କରୁଥିବା ଡାଇକିଙ୍ଗା କହିଛନ୍ତି, ଦଶନ୍ଧି ଧରି ଏହି ଅଞ୍ଚଳରେ ତୁଷାରପାତ ଦେଖାଯାଇ ନ ଥିଲା। ଏଠାରେ ତୁଷାରପାତ ଦେଖିବା ଏକ ଯାଦୁ ପରି।
ଆମେରିକାର ଜାତୀୟ ପାଣିପାଗ ସେବା ପାଣିପାଗ ବିଜ୍ଞାନୀ ବିୟାଙ୍କା ଫେଲଡକିଚର୍ ଏହାକୁ ଏଲ୍ ନିନୋର ପ୍ରଭାବ ବୋଲି କହିଛନ୍ତି। ସେ କହିଛନ୍ତି, ପ୍ରଶାନ୍ତ ଅଞ୍ଚଳରେ ଢାଞ୍ଚା କ୍ରମାଗତ ଭାବେ ବଦଳୁଛି। ଆର୍କଟିକଠାରୁ ଦକ୍ଷିଣକୁ ଯାଉଥିବା ପବନ ବୁଲି ଏହି ଅଞ୍ଚଳରେ ପହଞ୍ଚିଥିଲା, ଯେଉଁ କାରଣରୁ ଏପରି ଅବସ୍ଥା ସୃଷ୍ଟି ହେଲା। ଶୀତରେ ପଶ୍ଚିମ ଆମେରିକାରେ ପ୍ରବଳ ତୁଷାରପାତ ହୋଇଥିଲା। ଉତ୍ତର ଆରିଜୋନାରେ ଫ୍ଲାଗଷ୍ଟାଫ୍ରେ ୧୧ ଫୁଟରୁ ଅଧିକ ବରଫ ପଡ଼ିଥିଲା। ୭୦ ବର୍ଷ ଭିତରେ ଏହା ସବୁଠାରୁ ଅଧିକ ତୁଷାରପାତ।
କହିରଖୁଛୁ, ଦୁନିଆରେ କେବଳ ଗୋଟିଏ ମରୁଭୂମି ଅଛି, ଯେଉଁଠାରେ ତୁଷାରପାତ ହେଉଛି। ଏହି ଅନନ୍ୟ ମରୁଭୂମି କାନାଡାର ୟୁକୋନ ସହରରେ ଅଛି। ଏହାର ନାମ କାରକ୍ରସ। ଏହି ମରୁଭୂମି କେବଳ ୧ ବର୍ଗ ମାଇଲ ପର୍ଯ୍ୟନ୍ତ ବ୍ୟାପିଛି। ଏଠାରେ ଶୀତ ଋତୁରେ ଅଧିକ ଥଣ୍ଡା ହୋଇଥାଏ। ପାଣିପାଗର ପରିବର୍ତ୍ତନ ସହିତ ଏଠାରେ ତୁଷାରପାତ ମଧ୍ୟ ଦେଖାଯାଏ।