ଆପଣ କେବେ କାଠର ବୁଲେଟ୍ ଦେଖିଛନ୍ତି? କିନ୍ତୁ କେରଳର ଜଣେ ଯୁବକ ଏମିତି ନିଆରା ବୁଲେଟ୍ ତିଆରି କରି ଚର୍ଚ୍ଚାକୁ ଆସିଛନ୍ତି। ବୁଲେଟ୍ଟି ସମ୍ପୂର୍ଣ୍ଣ କାଠରେ ତିଆରି। ଏହାକୁ ଯିଏ ଦେଖୁଛି ଘଡ଼ିଏ ଅଟକି ରହିଯାଉଛି।
କାରୁଲଇ କଲାମ ଅଞ୍ଚଳ ଶାଗୁଆନ ଗଛରେ ପୂର୍ଣ୍ଣ। ଏଠାରେ ରହୁଥିବା ଜିଧିନ କାରୁଲାଇ ଶାଗୁଆନ କାଠରେ ଏକ ବୁଲେଟ୍ ତିଆରି କରିଛନ୍ତି। ଯାହାକୁ ଦେଖି ଲୋକେ ଆଶ୍ଚର୍ଯ୍ୟ ହେବା ସହ ତାଙ୍କୁ ପ୍ରଶଂସାରେ ପୋତି ପକାଉଛନ୍ତି। ଜିଧିନ କୁହନ୍ତି, ଏହି ବୁଲେଟ୍ ତିଆରିରେ ଯେତିକି ଟଙ୍କା ଖର୍ଚ୍ଚ ହୋଇଛି ତାହା ଅସଲ ବୁଲେଟ୍ ଦାମ୍ଠାରୁ ଅଧିକ। ଏହାକୁ ଦେଖିବା ପାଇଁ ଦୂର ଦୂରାନ୍ତରୁ ଲୋକେ ଆସୁଛନ୍ତି।
ପେସାରେ ଇଲେକ୍ଟ୍ରିସିଆନ ଜିଧିନଙ୍କୁ କାଠର ବୁଲେଟ ତିଆରି କରିବାକୁ ୨ ବର୍ଷରୁ ଅଧିକ ସମୟ ଲାଗିଛି। ଏଥିପାଇଁ ତାଙ୍କୁ କଠିନ ପରିଶ୍ରମ କରିବାକୁ ପଡ଼ିଛି। ଏହି ବୁଲେଟରେ ଦୁଇଟି ବଡ଼ ଶାଗୁଆନ ଗଛର କାଠ ବ୍ୟବହାର ହୋଇଛି। ଖାଲି ଏତିକି ନୁହେଁ, ଜିଧିନ ବୁଲେଟ୍ ତିଆରି ପାଇଁ ମାଲେସିଆରୁ ମଧ୍ୟ କାଠ ମଗାଇଥିଲେ। ତେଲ ଟାଙ୍କି ତିଆରି ପାଇଁ ସେ ଶିଶୁ କାଠ ମଗାଇଥିଲେ। ବାକି ସବୁ ପାର୍ଟ ଶାଗୁଆନ କାଠରେ ତିଆରି ହୋଇଛି। ସବୁଠୁ ଆଶ୍ଚର୍ଯ୍ୟର କଥା ହେଉଛି ଜିଧିନ ଏହି ବୁଲେଟ୍ ତିଆରି ପାଇଁ କାହାର ସାହାଯ୍ୟ ନେଇନାହାନ୍ତି। ନିଜେ ଏକା ସବୁ କାମ କରିଛନ୍ତି।