ନୂଆଦିଲ୍ଲୀ,୨୨।୩: ଇଣ୍ଡିଆନ ପ୍ରିମିୟର ଲିଗ (ଆଇପିଏଲ) ଇତିହାସର ସବୁଠାରୁ ସଫଳ ଅଧିନାୟକଙ୍କ କଥା ଆସିଲେ, ପ୍ରଥମେ ରୋହିତ ଶର୍ମା ଏବଂ ମହେନ୍ଦ୍ର ସିଂ ଧୋନୀଙ୍କ ନାମ ଶୀର୍ଷରେ ଆସେ। ରୋହିତ ମୁମ୍ବାଇ ଇଣ୍ଡିଆନ୍ସ (ଏମ୍ଆଇ) ଏବଂ ଧୋନୀ ନିଜ ଅଧିନାୟକତ୍ୱରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)କୁ ୫-୫ ଥର ଚାମ୍ପିୟନ କରିଛନ୍ତି। କିନ୍ତୁ ଆଇପିଏଲ ୨୦୨୪ରେ ଲାଗୁଛି ଯେପରି ଏକ ଯୁଗ ଶେଷ ହୋଇଛି, କାରଣ ଗୋଟିଏ ପଟେ ମୁମ୍ବାଇ ଇଣ୍ଡିଆନ୍ସର ଅଧିନାୟକତ୍ୱ ହାର୍ଦ୍ଦିକ ପାଣ୍ଡ୍ୟାଙ୍କୁ ହସ୍ତାନ୍ତର କରାଯାଇଛି। ଅନ୍ୟପକ୍ଷରେ ଏମଏସ ଧୋନୀ ଚେନ୍ନାଇର ଅଧିନାୟକତ୍ୱ ଛାଡି ଦଳର ଅଧିନାୟିକତ୍ୱକୁ ଋତୁରାଜ ଗାଇକ୍ୱାଡଙ୍କୁ ଦେଇଛନ୍ତି। ବର୍ତ୍ତମାନ ରୋହିତ ସୋସିଆଲ ମିଡିଆରେ ଏକ ଷ୍ଟାଟସ୍ ଅପଡେଟ କରିଛନ୍ତି। ଏଥିରେ ଧୋନୀ ଅଧିନାୟକତ୍ୱ ଛାଡିବା ବିଷୟରେ ଏକ ହୃଦୟସ୍ପର୍ଶୀ ଇମୋଜି ଶେୟାର କରିଛନ୍ତି।
ରୋହିତ ଶର୍ମା ଏକ ଫଟୋ ସୋସିଆଲ ମିଡିଆରେ ଶେୟାର କରିଛନ୍ତି। ଏଥିରେ ସେ ଏମଏସ ଧୋନୀଙ୍କ ସହ ହାତ ମିଳାଉଛନ୍ତି। ଏହା ସହିତ ସେ କ୍ୟାପସନରେ ଏକ ହ୍ୟାଣ୍ଡସ୍ୟାକ ଇମୋଜି ମଧ୍ୟ ଶେୟାର କରିଛନ୍ତି। ଅଧିନାୟକତ୍ୱରେ ଏହି ଦୁଇ ଖେଳାଳିଙ୍କ ଯାତ୍ରା ଚମତ୍କାର ହୋଇଛି, କିନ୍ତୁ ସେମାନଙ୍କ ପ୍ରଶଂସକଙ୍କ ପାଇଁ ଏହା ଏକ ଖୁସି ଖବର ହୋଇପାରେ ଯେ ଅଧିନାୟକତ୍ୱ ଛାଡିବା ପରେ ମଧ୍ୟ ରୋହିତ ଏବଂ ଧୋନୀ ଖେଳୁଥିବା ଦେଖିବାକୁ ମିଳିବ। କିନ୍ତୁ ଏହା ମଧ୍ୟ ସୂଚାଇ ଦେଉଛି ଯେ ଧୋନୀ ଆସନ୍ତା ସିଜନରେ କ୍ରିକେଟ ପାଇଁ ବିଦାୟ ନେଇପାରନ୍ତି ଏବଂ ବୋଧହୁଏ ସେଇ କାରଣରୁ ସେ ଅଧିନାୟକତ୍ୱର ଦାୟିତ୍ୱ ଗାଇକ୍ୱାଡଙ୍କୁ ଦେଇଛନ୍ତି।