କେନ୍ଦୁଝର,୨୪ା୧(ସ୍ବ.ପ୍ର.): ସମାଜିକକର୍ମୀ ନୈନା ସାହୁ ମୃତ୍ୟୁ ଘଟଣା ଦିନକୁ ଦିନ ଭିନ୍ନମୋଡ଼ ନେଉଛି। ପ୍ରଥମେ ଦୁର୍ଘଟଣା ପରେ ପରିବାର ଲୋକେ ହତ୍ୟା ଅଭିଯୋଗ ଆଣିଥିଲେ। ଏନେଇ ଏସ୍ପିଙ୍କ ନିକଟରେ ଅଭିଯୋଗ କରି ନ୍ୟାୟ ଭିକ୍ଷା କରିବା ସହ ଅଭିଯୁକ୍ତଙ୍କୁ ଧରିବାକୁ ଦାବି କରିଥିଲେ। ଏବେ ଘଟଣାରେ ଭାଜପା ନେତା ପ୍ରକାଶ ମଲ୍ଲିକଙ୍କ ନାମ ଉଠିବା ବିବାଦକୁ ଅଧିକ ଘନିଭୂତ କରିଛି। ଏଥିସହ ଭାଜପା ଜଣଙ୍କୁ ନିଲମ୍ବନ କରିବା ଓ ଅନ୍ୟକୁ ଘଣ୍ଟ ଘୋଡ଼ାଇବା ନେଇ ଚର୍ଚ୍ଚା ହେଉଛି।
ଯେ, ସଦର ଥାନାରେ ଅଭିଯୋଗ ପରେ ଭାଜପା ଯୁବ ମୋର୍ଚ୍ଚା ଜିଲା ସାଧାରଣ ସମ୍ପାଦକ ଅକ୍ଷୟ ମହାରଣାଙ୍କୁ ଦଳରୁ ନିଲମ୍ବନ କରାଯାଇଥିଲା। ତେବେ ହତ୍ୟା ଭଳି ସଙ୍ଗୀନ ଅଭିଯୋଗରେ ଫସିଥିବା ପ୍ରକାଶଙ୍କ ପ୍ରତି ଭିନ୍ନ ଆଭିମୁଖ୍ୟକୁ ନେଇ ଦଳରେ ଅସନ୍ତୋଷ ଦେଖାଦେଇଛି। ପ୍ରକାଶ ରାଜ୍ୟ ସଭାପତିଙ୍କ ଅତି ଘନିଷ୍ଠ ଜଣେ ନେତାଙ୍କ ଅନୁଗତ ହୋଇଥିବାରୁ ଜିଲା ଭାଜପା କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ଚର୍ଚ୍ଚା ହେଉଛି। ଏଭଳି ସମ୍ବେଦଳଶୀଳ ଘଟଣା ସମ୍ପର୍କରେ ରାଜ୍ୟ ନେତୃତ୍ୱଙ୍କୁ ଜଣାଇ ଦିଆଯାଇଥିବା ଜିଲା ସଂଗଠନ କହୁଛି। ରାଜ୍ୟ ସଂଗଠନ ଏହାକୁ ହାଲୁକା ଭାବେ ଗ୍ରହଣ କରି ପଦକ୍ଷେପ ନେଉ ନ ଥିବାରୁ ଦଳର ପକ୍ଷପାତିତା ନୀତି ପଦାରେ ପଡ଼ିଛି। ଦଳର ଭାବମୂର୍ତ୍ତି କ୍ଷୂର୍ଣ୍ଣ ହେଉଥିବାବେଳେ ତାଙ୍କୁ ସୁରକ୍ଷା ଦିଆଯାଉଥିବା ଦଳୀୟ କର୍ମୀ ମହଲରେ ଆଲୋଚନା ହେଉଛି। ଏଥିସହ ନୈନା ସାହୁଙ୍କ ମୃତ୍ୟୁ ବାଇକ୍ ଦୁର୍ଘଟଣା ଯୋଗୁ ହୋଇଥିବା ନେଇ ପୋଲିସ ମାମଲା ରୁଜୁ କରି ହାଲୁକା ଭାବେ ନେଇଥିବାରୁ ଅସନ୍ତୋଷ ପ୍ରକାଶ ପାଇଛି। ପୋଲିସ ଦୁର୍ଘଟଣା ମାମଲା ଦର୍ଶାଇବା ପାଇଁ ପ୍ରମାଣ ଖୋଜି ପରୋକ୍ଷରେ ଅଭିଯୁକ୍ତଙ୍କୁ ସୁରକ୍ଷା ଦେଉଥିବା ମୃତ ନୈନାଙ୍କ ମା’ ରେବତୀ ସାହୁ ଅଭିଯୋଗ କରିଛନ୍ତି। ଏଣୁ ଥାନାରେ ନ୍ୟାୟ ନ ମିଳିବାରୁ ନୈନାଙ୍କ ମାତା ପିତା ଜାନୁୟାରୀ ୧୨ରେ ଏସ୍ପିଙ୍କ ଦ୍ୱାରସ୍ଥ ହୋଇଥିଲେ। ଏସ୍ପି ଏହାର ତଦନ୍ତ ପାଇଁ କ୍ରାଇମ୍ ଡିଏସ୍ପିଙ୍କୁ ତଦନ୍ତ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି।
ଉଭୟ ଭାଜପା ଓ ବିଜେଡି ନାରୀଙ୍କ ସମ୍ମାନର କଥା କହୁଥିବା ବେଳେ ନୈନାଙ୍କ ମୃତ୍ୟୁ ଘଟଣାରେ ଚୁପ୍ ବସିବା ଭିତ୍ତିରି ସମ୍ପର୍କକୁ ନେଇ ଚର୍ଚ୍ଚା ଚାଲିଛି। ଏଣୁ ତୁରନ୍ତ ଏହାର ତଦନ୍ତ କରି ପୋଲିସ ସତ୍ୟ ପଦାକୁ ଆଣୁ ବୋଲି ଜିଲା କଂଗ୍ରେସ ସଭାପତି ବିପ୍ଲବ ମିଶ୍ର କହିଛନ୍ତି।