ଆଜିକାଲି ମୃଦୁ ପାନୀୟର ଚାହିଦା କାହିଁରେ କେତେ। ବିଶେଷଭାବରେ ଯୁବପିଢ଼ିଙ୍କ ଦ୍ୱାରା ଏପରି ପାନୀୟ କେତେ ଆଦୃତ ତାହା କହିବା ଅନାବଶ୍ୟକ। ଏବେ ତ ବିବାହ, ଭୋଜି କିମ୍ବା କୌଣସି କାର୍ଯ୍ୟକ୍ରମରେ ମୃଦୁପାନୀୟ ପରିବେଷଣ ସାଧାରଣ କଥା ପାଲଟି ଗଲାଣି। ହେଲେ ଏହାକୁ ଯଦି ଜଣେ ନିୟମିତ ପିଅନ୍ତି ତେବେ ତାହା ପରବର୍ତ୍ତୀ ସମୟରେ ମେଦବହୁଳତା ପରି ସମସ୍ୟାର କାରଣ ସାଜିପାରେ ବୋଲି ୟୁନିଭର୍ସିଟି ଅଫ ଲଣ୍ଡନ ପୁଷ୍ଟିବିଜ୍ଞାନୀମାନେ ସତର୍କ କରାଇ ଦେଇଛନ୍ତି। ନିୟମିତ ମୃଦୁପାନୀୟ ପିଉଥିବା କିଛି ବ୍ୟକ୍ତିଙ୍କର ଓଜନ ମାପି ତାହାକୁ ସାଧାରଣ ବ୍ୟକ୍ତିଙ୍କ ଓଜନ ସହ ତୁଳନା କରିବା ପରେ ସେମାନେ ଏକଥା ଜାଣିପାରିଥିଲେ। ବେଳେବେଳେ ମୃଦୁ ପାନୀୟରେ ମିଠାର ପରିମାଣ ଅଧିକ ହୋଇଗଲେ ଏହା ମସ୍ତିଷ୍କ ବୃଦ୍ଧିରେ ବାଧା ଉପୁଜାଏ। ରକ୍ତରେ ମଧ୍ୟ ଶର୍କରାର ମାତ୍ରା ଅଧିକ ହେଲେ, ଏହା ଶରୀରର ଓଜନ ବଢ଼ାଇବା ସହ ବିଭିନ୍ନ ରୋଗ ସୃଷ୍ଟି କରେ। ତେଣୁ ଏଥିପ୍ରତି ଆମେ ଯେତେ ସତର୍କ ହେବା ତାହା ଆମ ସ୍ବାସ୍ଥ୍ୟ ପାଇଁ ସେତେ ଉପକାରୀ ସାବ୍ୟସ୍ତ ହେବ।