ପଟ୍ଟାମୁଣ୍ଡାଇ,୨୮।୨(ସ୍ବ.ପ୍ର.): କେନ୍ଦ୍ରାପଡା ଜିଲା ପଟ୍ଟାମୁଣ୍ଡାଇ ବ୍ଲକ ଦେଇ ପ୍ରବାହିତ ବ୍ରାହ୍ମଣୀ ନଦୀ ପଠାରୁ ପରିବେଶ କ୍ଲିୟରାନ୍ସ ପ୍ରମାଣ ପତ୍ର ନ ଥାଇ ବାଲି ଓ ମାଟି ଉଠାଣ ଚାଲିଛି। ପ୍ରତିଦିନ ଶତାଧିକ ଟ୍ରକରେ ବାଲି ଓ ମାଟି ଉଠାଯାଇ ବିଭିନ୍ନ ସ୍ଥାନକୁ ଯାଉଛି।ଏ ସମ୍ପର୍କରେ ଜାତୀୟ ଗ୍ରୀନ ଟ୍ରିବ୍ୟୁନାଲଙ୍କ ନିକଟରେ ସ୍ଥାନୀୟ ଲୋକେ ଓ ସାମାଜିକ କର୍ମୀ ଅଭିଯୋଗ କରିଥିଲେ। ଟ୍ରିବ୍ୟୁନାଲ ଏହି ଅଭିଯୋଗରେ ଜିଲାପାଳ, ଜିଲା ମାଇନିଂ ଅଫିସର ଓ ଏସ୍ପିଙ୍କଠାରୁ ତଦନ୍ତ ରିପୋର୍ଟ ମାଗିଥିଲେ। ଏହି ରିପୋର୍ଟ ସତ୍ୟପାଠ ଜରିଆରେ ଗ୍ରୀନ ଟ୍ରିବ୍ୟୁନାଲଙ୍କ ନିକଟରେ ଦାଖଲ କରାଯାଇଥିଲା। ମାତ୍ର ଏହି ସତ୍ୟପାଠ ଭୁଲ ଥିବା ଗ୍ରୀନ ଟ୍ରିବ୍ୟୁନାଲଙ୍କ ହୃଦବୋଧ କରିଥିଲେ। ଜିଲା ମାଜିଷ୍ଟ୍ରେଟ ଓ ଏସପି ତାଙ୍କର ଦାୟିତ୍ୱ ଠିକଣା ଭାବେ ନିର୍ବାହ କରିନାହାନ୍ତି ବୋଲି ଗ୍ରୀନ ଟ୍ରିବ୍ୟୁନାଲ ବିଚାର କରି ଆଉ ଏକ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ। ତେବେ ଜିଲାପାଳ ଓ ଏସ୍ପିଙ୍କ ସତ୍ୟପାଠ ଆଧାରରେ ବେଆଇନ ବାଲି ଉଠାଣ ବନ୍ଦ କରିବାକୁ ଗ୍ରୀନ ଟ୍ରିବ୍ୟୁନାଲ ନିର୍ଦ୍ଦେଶ ଦେଇଥିଲେ। ଏଥିସହିତ ବେଆଇନ ବାଲି ଉଠାଣକାରୀଙ୍କଠାରୁ ୫କୋଟି ଟଙ୍କା ଜରିମାନା ଆଦାୟ କରିବାକୁ ରାଜ୍ୟ ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦେଇଥିଲେ। ଏହି ଜରିମାନା ଆଦାୟ ହୋଇ ନ ଥିବା କୁହାଯାଉଥିବା ବେଳେ ଅଳଭା ନିକଟ ବାଲି ଓ ମାଟି ଖାଦାନ ବନ୍ଦ ରହିଥିଲା। ତେବେ ଗତ ୫ ଦିନ ହେବ ପାରାଦୀପ ଭୁତମୁଣ୍ଡାଇର ଜଣେ ବାଲି ମାଫିଆ ଅଳଭା ପାଳକୁ ଯିବାକୁ ଥିବା ଏକ ପାଟନାଳିକୁ ବନ୍ଧାଇ ମାଟିବାଲି ଉଠାଣ କରୁଛନ୍ତି। ଏଥିଯୋଗୁ ଉତିକଣ ବନ୍ୟା ନିୟନ୍ତ୍ରଣ ବନ୍ଧପ୍ରତି ବିପଦ ସୃଷ୍ଟି ହୋଇଛି। ସେହିପରି ବ୍ରାହ୍ମଣୀ ଜଳ ପ୍ରବେଶ କରୁଥିବା ନାଳିରୁ ପାଣି ଉଠାଇ ଚାଷୀମାନେ କରିଥିବା ପନିପରିବା ଫସଲ ମରିବାକୁ ବସିଲାଣି। ପାଣି ବିନା ଫସଲ ନଷ୍ଟ ହୋଇଯିବା ଦେଖି ଚାଷୀମାନେ ମୁଣ୍ଡରେ ହାତଦେଇ ବସିଛନ୍ତି। ଏ ସଂକ୍ରାନ୍ତରେ ତହସିଲଦାରଙ୍କ ନିକଟରେ ବାରମ୍ବାର ଅଭିଯୋଗ କଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ ବୋଲି ସ୍ଥାନୀୟ ଗ୍ରାମବାସୀ କହିଛନ୍ତି। ପଟ୍ଟାମୁଣ୍ଡାଇ ତହସିଲଦାର ଦିଲ୍ଲୀପ ସେଠୀ ଓ ସଦର ଆରଆଇ ଅଭିରାମ ସେଠୀ ମାଟି ଉଠାଣ ସ୍ଥଳକୁ ଯାଇଥିଲେ ମଧ୍ୟ ଜେସିବି,ହାଇଓ୍ବା, ଟ୍ରାକ୍ଟର ଓ ଟ୍ରକରେ ବାଲିଉଠାଣ ଚାଲିଥିବା ଦେଖି ଫେରି ଆସିଥିଲେ। ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। କାହା ନିର୍ଦ୍ଦେଶରେ ବାଲିମାଟି ଉଠାଣ ଚାଲିଛି ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ନେଇ ତହସିଲଦାର ସେଠୀ କହିଛନ୍ତି, ମାଟି, ବାଲି ଚାଲଣ ବନ୍ଦ ହେବ। ଆବଶ୍ୟକ ପଡିଲେ ପୋଲିସ ଦ୍ୱାରା ଏହି ଗାଡ଼ିଗୁଡିକୁ ଜବତ କରାଯିବ।