ନାଉଗାଁ,୪।୪(ସ୍ବ.ପ୍ର.): ନାଉଗାଁ ବ୍ଲକରେ ପୂର୍ତ୍ତ ଓ ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା ବିଭିନ୍ନ ଅଞ୍ଚଳକୁ ସଂଯୋଗୀକରଣ ରାସ୍ତାଗୁଡ଼ିକର ପୁନଃ ନିର୍ମାଣ ଓ ସମ୍ପ୍ରସାରଣ କାର୍ଯ୍ୟ ଜାରି ରହିଛି। ଏହିସବୁ ରାସ୍ତାପାର୍ଶ୍ୱ ହେଉ ବା ନୂତନ ଭାବେ ନିର୍ମିତ ରାସ୍ତା ପୋତିବା ପାଇଁ ମାଟି ଆବଶ୍ୟକ ହେଉଛି। ହେଲେ ଏଠାରେ ଗ୍ରାମ୍ୟ ଜଙ୍ଗଲରୁ ୬ ଫୁଟ୍ ଖୋଳି ମାଟି ଉଠାଯାଇଛି। ସରକାରୀ ନିୟମାନୁସାରେ ଯେଉଁ ବିଭାଗ ଦ୍ୱାରା ରାସ୍ତା ନିର୍ମାଣ କରାଯାଉଛି ଉକ୍ତ ବିଭାଗ ସ୍ଥାନୀୟ ତହସିଲ କାର୍ଯ୍ୟାଳୟକୁ ଆବଶ୍ୟକ ମାଟି ପାଇଁ ଚିଠି କରିବେ। ଉକ୍ତ ଚିଠି ଅନୁସାରେ ସ୍ଥାନୀୟ ତହସିଲଦାର କେଉଁ ସ୍ଥାନରୁ କେତେ ମାଟି ଉଠାଇବେ ଓ ଉକ୍ତ ମାଟି ପାଇଁ କେତେ ଟଙ୍କା ରୟାଲ୍ଟି ଦେବାକୁ ପଡ଼ିବ ସେ ବିଷୟରେ ଅବଗତ କରାଇବେ। ରାସ୍ତା ନିର୍ମାଣ ଦାୟିତ୍ୱରେ ଥିବା ଠିକାଦାର ଉକ୍ତ ରୟାଲ୍ଟି ଜମା କରି ସେହି ସ୍ଥାନରୁ ମାଟି ଉଠାଇ ପାରିବେ। କିନ୍ତୁ ବ୍ଲକରେ ସରକାରୀ ନିୟମକୁ ଖୋଲାଖୋଲି ଭାବେ ଉଲ୍ଲଂଘନ କରାଯାଉଛି। ସ୍ଥାନୀୟ ରାଜସ୍ବ ନିରୀକ୍ଷକଙ୍କୁ ହାତ କରି ବିନା ରୟାଲ୍ଟିରେ ଶହ ଶହ ଟ୍ରିପ ମାଟି ଉଠାଇବାକୁ ଠିକାଦାର ସକ୍ଷମ ହେଉଛନ୍ତି। ଉକ୍ତ ଖବର ଗଣମାଧ୍ୟମରେ ପ୍ରକାଶ ପାଇବା ପରେ ମାଟି ପାଇଁ ପୂର୍ତ୍ତ ଓ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ତହସିଲଦାରଙ୍କୁ ଚିଠି କରାଯାଇଛି। ଉକ୍ତ ଚିଠି କେବଳ କାଗଜକଲମରେ ହୋଇଥିବା ବେଳେ ଠିକାଦାରମାନେ ମନଇଚ୍ଛା ଗ୍ରାମ୍ୟ ଜଙ୍ଗଲ, ଗୋଚର ଜମିକୁ ଖୋଳି ପୋଖରୀ କରିଥିବାର ଦେଖିବାକୁ ମିଳିଛି।
ନାଉଗଁା ପଞ୍ଚାୟତ ଗୋଠଦା-ଇଚ୍ଛାପୁର ରାସ୍ତା ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ କାର୍ଯ୍ୟ କରାଯାଉଛି। ଉକ୍ତ ରାସ୍ତା ପାଇଁ ଶହ ଶହ ଟ୍ରିପ ମାଟି ଦରକାର ଥିବା ବେଳେ ସ୍ଥାନୀୟ ଲୋକଙ୍କ ସୂଚନା ମୁତାବକ ଉକ୍ତ ରାସ୍ତା ପାର୍ଶ୍ୱରେ ଥିବା ଗ୍ରାମ୍ୟ ଜଙ୍ଗଲକୁ ଠିକାଦାର ମନଇଚ୍ଛା ଖୋଳି ମାଟି ଉଠାଇ ନେଉଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଏ ବିଷୟରେ ସ୍ଥାନୀୟ ରାଜସ୍ବ ନିରୀକ୍ଷକ ଜାଣିନାହାନ୍ତି। ସରକାରଙ୍କ ନିୟମାନୁସାରେ ସରକାରୀ କିମ୍ବା ଗୋଚର ଜମିରୁ ମାତ୍ର ୩ ଇଞ୍ଚ ଗଭୀର ପର୍ଯ୍ୟନ୍ତ ଖୋଳା ଯାଇପାରିବ। କିନ୍ତୁ ଏଠାରେ ୬ ଫୁଟ୍ ପର୍ଯ୍ୟନ୍ତ ଖୋଳା ହୋଇଥିବା ବେଳେ ବର୍ତ୍ତମାନ ମଧ୍ୟ ଖୋଳା ଜାରି ରହିଛି। ଏହି ସ୍ଥାନଟି ଗ୍ରାମ୍ୟ ଜଙ୍ଗଲ ଥିବା ବେଳେ ଗୋଠଦା, ଇଚ୍ଛାପୁର, ନରଣପୁର, ଅରିଓଦା ଆଦି ଗ୍ରାମଗୁଡ଼ିକର ଗୃହପାଳିତ ପଶୁ ଚରାବୁଲା କରିଥାନ୍ତି। ମାଟିଖୋଳା ଦ୍ୱାରା ଗୃହପାଳିତ ପଶୁ ବେଶ୍ ପ୍ରଭାବିତ ହେବାର ଆଶଙ୍କା ରହିଛି। ଏ ସମ୍ପର୍କରେ ସ୍ଥାନୀୟ ରାଜସ୍ବ ନିରୀକ୍ଷକ ବିଶ୍ୱଜିତ୍ ସ୍ବାଇଁଙ୍କୁ ପଚାରିବାରେ ମାଟିଖୋଳା ହେବା ବିଷୟରେ ଜାଣିନାହିଁ। ତଦନ୍ତ କରିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।