କେନ୍ଦୁଝର, ୭।୬ (ସ୍ବ.ପ୍ର.) ଅନ୍ଧାରରେ କେହି ରହିବେ ନାହିଁ। ଏଣୁ ସମସ୍ତ ଗ୍ରାମକୁ ବିଭିନ୍ନ ଯୋଜନାରେ ବିଦ୍ୟୁତ୍ ବ୍ୟବସ୍ଥା କରୁଛନ୍ତି। ଦୁର୍ଗମ ଅଞ୍ଚଳରେ ଯେଉଁଠି ବିଦ୍ୟୁତ ଯୋଗାଣ ହୋଇ ପାରୁନାହିଁ ସେଠାରେ ସୋଲାର ଲାଇଟ ବ୍ୟବସ୍ଥା କରୁଛନ୍ତି। ତେବେ ଉପଯୁକ୍ତ ରକ୍ଷଣାବେକ୍ଷଣ ଯୋଗୁ ଅନେକ ଗ୍ରାମରେ ସୋଲାର ଲାଇଟ କାମ କରୁ ନ ଥିବାରୁ ଅନ୍ଧାରରେ ରାତି କାଟୁଛନ୍ତି ଓ ଲୋକ ମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି।
ସମସ୍ୟା ଦେଖିବାକୁ ମିଳିଛି ହରିଚନ୍ଦନପୁର ବ୍ଲକର ବଡ଼ପଳାଶପାଳ ପଞ୍ଚାୟତର ବଣପାହାଡ଼ ଘେରା କହ୍ନେଇଗୋଳା ଗ୍ରାମରେ। ଜୁଆଙ୍ଗ ଜନଜାତିର ଲୋକ ମାନେ ଦୀର୍ଘ ବର୍ଷ ହେଲା କଷ୍ଟ ଭୋଗୁଥିଲେ ହେଁ କେହି ଶୁଣୁ ନ ଥିବାରୁ ଜିଲା ପ୍ରଶାସନ ନିକଟରେ ଲିଖିତ ଅଭିଯୋଗ କରିଛନ୍ତି। ଉକ୍ତ ଗ୍ରାମରେ ପାଖପାଖି ୧୩୦ ଘର ରହିଛି। ଦୀନ ଦୟାଲ ଉପାଧ୍ୟାୟ ଗ୍ରାମ୍ୟ ଜ୍ୟୋତି ଯୋଜନାରେ ୨୦୧୬ ମସିହାରେ ଲକ୍ଷାଧିକ ଟଙ୍କା ବ୍ୟୟରେ ୩୦ କିଲୋଓ୍ବାଟ କ୍ଷମତା ବିଶିଷ୍ଟ ସୋଲାର ପ୍ରକଳ୍ପ ସ୍ଥାପନା କରାଯାଇଥିଲା। ଗ୍ରାମ ମୁଣ୍ଡରେ ସୋଲାର ପ୍ୟାନେଲ ବସାଯାଇ ସାୈରଶକ୍ତି ସଂରକ୍ଷଣ କରି ଖୁଣ୍ଟ ଓ ତାର ଜରିଆରେ ସାହିର ପ୍ରତ୍ୟେକ ଘରକୁ ବିଦ୍ୟୁତ ଯୋଗାଣ ହୋଇଛି। ତେବେ ଦୁଇ ବର୍ଷ ପରେ ଏହା ଆଉ କାର୍ଯ୍ୟକ୍ଷମ ହେଲା ନାହିଁ। ଏହାର ମରାମତି କରିବା ପାଇଁ କେହି ଗଲେ ନାହିଁ। ଏଣୁ ବାଧ୍ୟ ହୋଇ ପୂର୍ବ ପରି ଅନ୍ଧାରରେ ରାତି କାଟୁଛୁ। ସନ୍ଧ୍ୟା ହେଲେ ପଦାକୁ ବାହାରି ପାରୁନାହୁଁ କାରଣ ବନ୍ୟଜନ୍ତୁଙ୍କ ଭୟ ରହୁଛି। ପିଲାମାନେ ପାଠ ପଢିପାରୁନାହାନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏଣୁ ତୁରନ୍ତ ମରାମତି କରି ଆଲୁଅ ଯୋଗାଇବାକୁ ସେମାନେ ନିବେଦନ କରିଛନ୍ତି।