ଅମରପାଲି,୪ା୩(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ହିଲୁଙ୍ଗ ପଞ୍ଚାୟତ ଅନ୍ତର୍ଗତ କର୍ଣ୍ଣପାଲି ଗ୍ରାମରେ ଏବେ ଘୋର ପାନୀୟ ଜଳ ସମସ୍ୟା ଦେଖାଦେଇଛି। ଗ୍ରୀଷ୍ମ ଆରମ୍ଭରୁ ଜଳକଷ୍ଟରେ ଥିବା ଏକ ଓ୍ବାର୍ଡ ବିଶିଷ୍ଟ ଏହି ଗାଁର ସମସ୍ୟା ପ୍ରତି କାହାର ଦଷ୍ଟି ପଡୁନାହିଁ। ପାରମ୍ପରିକ ଜଳାଶୟର ପାଣି କମିଗଲାଣି। ନିଜସ୍ବ ବାଡିରେ ଥିବା କୂଅର ପାଣି କେଉଁ ତଳକୁ ଚାଲିଗଲାଣି। ବୀରମହାରାଜପୁରରୁ ୨କି.ମି ଦୂରରେ ଅବସ୍ଥିତି ଏହି ଗାଁର ଜନସଂଖ୍ୟା ଏକ ହଜାରରୁ ଊର୍ଦ୍ଧ୍ୱ । ଏତେ ସଂଖ୍ୟକ ଲୋକଙ୍କ ପାଇଁ ଗ୍ରାମରେ ଦୁଇଟି ନଳକୂପ ରହିଛି। ସ୍ନାନଶୌଚଠାରୁ ପାନୀୟ ଯାଏ ଗ୍ରାମବାସୀ ଉକ୍ତ ନଳ ଉପରେ ନିର୍ଭର କରନ୍ତି। ହେଲେ ଗ୍ରୀଷ୍ମ ପ୍ରବାହ ଆରମ୍ଭ ହୋଇ ଯାଇଥିବାରୁ ନଳକୂପଗୁଡିକରୁ ଏବେ ଆବଶ୍ୟକତାଠାରୁ କମ୍ ପାଣି ବାହାରୁଛି। ଫଳରେ ଲୋକେ ପାଣି ପାଇଁ ହନ୍ତସନ୍ତ ହେଉଛନ୍ତି। ଯେଉଁ କେତେଜଣଙ୍କ ନିଜସ୍ବ କୂଅ ରହିଛି ତାହାର ପାଣି ପର୍ଯ୍ୟାପ୍ତ ହେଉନାହିଁ ।
ଜଳଭାବକୁ ଆଖି ଆଗରେ ରଖି ୨୦୨୦-୨୧ ମସିହାରେ ପାନୀୟ ଉପଯୋଗୀ ପାଣି ବାହାରୁଥିବା ସ୍ଥାନରେ ବୋରିଙ୍ଗରୁ ସୋଲାର ସାହାଯ୍ୟରେ ଗାଁକୁ ପାନୀୟ ଜଳ ଯୋଗାଣ ପାଇଁ ବ୍ୟବସ୍ଥା କରାଯାଇଥିଲା। କିନ୍ତୁ ପ୍ରକଳ୍ପ ନିର୍ମାଣ ପାଇଁ ନିୟୋଜିତ ଠିକାଦାର ଏବଂ ବିଭାଗୀୟ କର୍ମଚାରୀଙ୍କ ଖାମଖିଆଲି ମନୋଭାବ ପାଇଁ ପ୍ରକଳ୍ପ ଅସମ୍ପୂର୍ଣ୍ଣ ରହିଛି। ପାଣି ଟାଙ୍କି, ସୋଲାର ପ୍ଲେଟ ଅପରିତ୍ୟକ୍ତ ଭାବେ ପଡି ରହିଛି। ଏ ନେଇ ବିଭାଗୀୟ ଯନ୍ତ୍ରୀ ମଞ୍ଜୁଲତା ଗୌଡଙ୍କୁ ପଚାରିବାରୁ ପ୍ରକଳ୍ପରେ କିଛି ତ୍ରୁଟି ନେଇ ଗ୍ରାମବାସୀ ଅଭିଯୋଗ କରିବା ପରେ କାମ ବନ୍ଦ ରହିଥିଲା। କିନ୍ତୁ ଏବେ ଖୁବ୍ଶୀଘ୍ର ପ୍ରକଳ୍ପ କାର୍ଯ୍ୟକାରୀ କରାଯିବ ବୋଲି ସେ କହିଥିଲେ।