ଅମରାବତୀ,୩୧।୩: ଆନ୍ଧ୍ରପ୍ରଦେଶ ବିଜୟଓ୍ବାଡାରେ ଜଣେ ତିନିମାସର ଶିଶୁକନ୍ୟାକୁ ୨ ମାସରେ ୭ ଥର ବିକ୍ରି କରାଯାଇଛି। ପୋଲିସ ୧୧ ଜଣଙ୍କୁ ଗିରଫ କରିଛି। କନ୍ୟା ସନ୍ତାନର ବାପା ମନୋଜ ମୁଖ୍ୟ ଅଭିଯୁକ୍ତ ବୋଲି ପୋଲିସ କହିଛି। ଲଗାତର ୩ କନ୍ୟା ଜନ୍ମ ହେବାରୁ ମନୋଜ କନିଷ୍ଠ ଝିଅଙ୍କୁ ବିକ୍ରି କରିଥିଲେ। ମନୋଜଙ୍କ ସ୍ତ୍ରୀ ଓ ତାଙ୍କ ମା’ ଥାନାରେ ଅଭିଯୋଗ କରିବା ପରେ ସତ ପଦାକୁ ଆସିଥିଲା। ଏହି ସମ୍ବେଦନଶୀଳ ଘଟଣା ନେଇ ଆନ୍ଧ୍ର ପୋଲିସ ପକ୍ଷରୁ ଗଠିତ ସ୍ବତନ୍ତ୍ର ଟିମ୍ ଘଟଣାର ଯାଞ୍ଚ ଆରମ୍ଭ କରିଥିଲା। ଏଥିରେ ଏକାଧିକ ଲୋକଙ୍କ ସମ୍ପୃକ୍ତି ଥିବାବେଳେ ଶିଶୁ କନ୍ୟାକୁ ୭ ଥର ବିକ୍ରି କରାଯାଇଥିବା ପୋଲିସ ଜାଣିବାକୁ ପାଇଥିଲା। ମନୋଜ ସ୍ଥାନୀୟ ମହିଳା ମିକିଲି ନାଗାଲକ୍ଷ୍ମୀଙ୍କ ସହାୟତାରେ କୋଣ୍ଡାପ୍ରୋଲୁ ଗ୍ରାମର ମେଘାଓ୍ବାନ୍ତ ଗାୟତ୍ରୀଙ୍କୁ ପ୍ରଥମେ ୭୦ ହଜାର ଟଙ୍କାରେ ବିକ୍ରି କରିଥିଲେ। ପରେ ଗାୟତ୍ରୀ ୧ ଲକ୍ଷ ୨୦ ହଜାର ଟଙ୍କାରେ କନ୍ୟାଟିକୁ ଦିକ୍ସୁଖ ନଗରର ଭୁକ୍ୟା ଭାରଟିରାଜୁଙ୍କୁ ବିକ୍ରି କରିଥିଲେ। ପରେ ୧ଲକ୍ଷ ୮୭ ହଜାର ଟଙ୍କାରେ ଭୁକ୍ୟା ନୂର ଜାହାନଙ୍କୁ କନ୍ୟାଟିକୁ ବିକ୍ରି କରିଥିଲେ। ୧ଲକ୍ଷ ୯୦ ହଜାର ଟଙ୍କାରେ ନୂର ଜାହାନ ବୋମାଡା ଉମାଦେବୀଙ୍କୁ ଓ ଉମାଦେବୀ ୨ ଲକ୍ଷ ୨୨ ହଜାରରେ ବିଜୟାଲକ୍ଷ୍ମୀ ଗୋଲାପୁଡର ଗରିକାମୁକୁଙ୍କୁ ଶିଶୁ କନ୍ୟାକୁ ବିକ୍ରି କରିଥିଲେ। ପରିଶେଷରେ ଗରିକାମୁକୁଙ୍କଠାରୁ ୨ଲକ୍ଷ ୫୦ ହଜାର ଟଙ୍କାରେ ଇଲୁରୁର ଭରେ ରମେଶ କନ୍ୟା ସନ୍ତାନଟିକୁ କିଣିଥିଲେ। ପୋଲିସ ଶିଶୁକୁ ଉଦ୍ଧାର କରି ପରିବାର ଲୋକଙ୍କୁ ହସ୍ତାନ୍ତର କରିଛି।