ରସୁଲପୁର,୧୦ା୧୨(ଡି.ଏନ.ଏ.):ଯାଜପୁର ଏମ୍ପି ଶର୍ମିଷ୍ଠା ସେଠୀ ସଂସଦର ଶୀତକାଳୀନ ଅଧିବେଶନରେ ଭାରତ ସଞ୍ଚାର ନିଗମ ଲିମିଟେଡ୍ (ବିଏସ୍ଏନ୍ଏଲ୍)ର ଦୁର୍ବଳ ସେବାକୁ ନେଇ ଆପତ୍ତି ଉଠାଇଛନ୍ତି। ନିଗମ ଉନ୍ନତ ସେବା ଯୋଗାଇବା ପାଇଁ ଭିତ୍ତିଭୂମିରେ ସୁଧାର ଆଣିବାକୁ ସେ ଦାବି କରିଛନ୍ତି। ଦୁର୍ବଳ ସେବା ଦୂର ପାଇଁ ଘରକୁ ଘର ଫାଇବର ସଂଯୋଗ (ଏଫ୍ଟିଟିଏଚ)କୁ ଗୁରୁତ୍ୱ ଦେବା ସହ ଆବଶ୍ୟକ ସ୍ଥଳେ ଅଧିକ ଟାୱାର ସ୍ଥାପନ ପାଇଁ ନିବେଦନ କରିଛନ୍ତି। ନିଗମର ଦୁର୍ବଳ ଭିତ୍ତିଭୂମି ଯୋଗୁ ଜିଲାରେ ସରକାରୀ ଓ ବେସରକାରୀ କାର୍ଯ୍ୟ ବାଧାପ୍ରାପ୍ତ ହେଉଛି। ଗ୍ରାହକ ଅକଥନୀୟ ଅସୁବିଧାର ସମ୍ମୁଖୀନ ହେଉଛନ୍ତି। ବ୍ୟାଙ୍କଠାରୁ ଆରମ୍ଭ କରି ଗ୍ରାମାଞ୍ଚଳର ଡାକ ସେବାରେ ବ୍ୟାଘାତ ଘଟୁଛି। ବିଶେଷକରି କରୋନା କାଳରେ ବିଦ୍ୟାର୍ଥୀଙ୍କ ପାଠପଢ଼ାରେ ସର୍ବାଧିକ ବାଧା ସୃଷ୍ଟି ହେଉଛି। ତେଣୁ ଏଦିଗରେ ଗୁରୁତ୍ୱ ଦିଆଯାଇ ବିଏସ୍ଏନଏଲ୍ ସେବାକୁ ବ୍ୟବସ୍ଥିତ କରିବାକୁ ସେ ଲୋକ ସଭା ବାଚସ୍ପତି ଓମ୍ ବିର୍ଲାଙ୍କ ଧ୍ୟାନ ଆକର୍ଷଣ କରିଛନ୍ତି। ଏମ୍ପିଙ୍କ ଦାବି ମୁତାବକ ଯାଜପୁର ଜିଲା ଖଣିଜ ସମ୍ପଦରେ ଭରପୂର ରହିଛି। ଜିଲାର ଶିକ୍ଷା, କଳା, ସଂସ୍କୃତିରେ ରାଜ୍ୟର ଏକ ଅଗ୍ରଣୀ ଜିଲା ଭାବରେ ଖ୍ୟାତି ରହିଛି। ମାତ୍ର ଟେଲି ସଂଯୋଗର ଆବଶ୍ୟକ ଭିତ୍ତିଭୂମିର ଅଭାବ ଯୋଗୁ ବହୁ ଉନ୍ନୟମୂଳ କାର୍ଯ୍ୟରେ ବାଧା ଉପୁଜୁଛି। ଲଗାତାର ଦୁର୍ବଳ ସେବା ପ୍ରଦାନ କରାଯାଉଥିବାରୁ ଏମ୍ପି ସେଠୀ ବିଏସ୍ଏନ୍ଏଲ୍ କର୍ତ୍ତୃପକ୍ଷଙ୍କୁ ଅବଗତ କରାଇଥିଲେ। ଏହା ସତ୍ତ୍ୱେ ବି ସେବାରେ ସୁଧାର ଆସିପାରୁ ନାହିଁ ବୋଲି ସେ ଦର୍ଶାଇଛନ୍ତି।
ସେହିପରି ଏମ୍ପି ସେଠୀ ଜିଲାରେ ସୈନିକ ସ୍କୁଲ ସ୍ଥାପନ ପାଇଁ ସଂସଦରେ ସ୍ବର ଉଠାଇଛନ୍ତି। ଜିଲାରେ ୨ଟି କେନ୍ଦ୍ରୀୟ ବିଦ୍ୟାଳୟ ରହିଛି। ହେଲେ ଗୋଟିଏ ହେଲେ ସୈନିକ ସ୍କୁଲ ସ୍ଥାପନ ହୋଇନାହିଁ। ଏହାଦ୍ୱାରା ସେନାକର୍ମଚାରୀ ପିଲାଙ୍କ ପାଠପଢ଼ାରେ ବାଧା ସୃଷ୍ଟି ହେଉଛି। ଏହି ବର୍ଗର ପିଲାଙ୍କୁ ଉନ୍ନତ ଓ ଅତ୍ୟାଧୁନିକ ଶିକ୍ଷା ପ୍ରଦାନ ଲାଗି ଜିଲାରେ ଏକ ସୈନିକ ସ୍କୁଲ ତୁରନ୍ତ ପ୍ରତିଷ୍ଠା ପାଇଁ ସେ ଲୋକସଭା ବାଚସ୍ପତିଙ୍କ ଜରିଆରେ କେନ୍ଦ୍ର ସରକାରଙ୍କୁ ନିବେଦନ କରିଛନ୍ତି। ଏମ୍ପି ସେଠୀଙ୍କ ଦାବି ମୁତାବକ ଦେଶ ସୁରକ୍ଷା ଦିଗରେ କାର୍ଯ୍ୟରତ ସୈନିକ ଓ ସୈନ କ୍ଷେତ୍ରରେ ଜିଲାର ଗୌରବମୟ ପରମ୍ପରା ଯୋଡ଼ି ହୋଇ ରହିଛି। ଦେଶ ମାତୃକା ପାଇଁ ଜିଲାରୁ ବହୁ ବୀର ସୈନିକ ଶହୀଦ ହୋଇଛନ୍ତି। ସେ ଶହୀଦ ଶଶାଙ୍କ ଶେଖର ସାମଲଙ୍କ ଉଦାହରଣ ଦେଇ କହିଛନ୍ତି ଯେ, ସେ ଲଦାଖରେ କର୍ତ୍ତବ୍ୟରତ ଥିବା ବେଳେ ଦେଶମାତୃକା ପାଇଁ ଲଢ଼େଇ କରି ଶହୀଦ ହୋଇଛନ୍ତି। ତେବେ ସୈନିକ ବିଦ୍ୟାଳୟ ନ ଥିବାରୁ ସେନାକର୍ମଚାରୀଙ୍କ ପିଲା ଘରୋଇ ବିଦ୍ୟାଳୟରେ ପଢିବାକୁ ବାଧ୍ୟ ହେଉଛନ୍ତି ବୋଲି ସେ ଦର୍ଶାଇଛନ୍ତି।