ନୂଆଦିଲ୍ଲୀ,୧୦।୨: ଅଷ୍ଟ୍ରେଲିଆରେ ୨୦୨୦-୨୧ରେ ଭାରତ ଐତିହାସିକ ସିରିଜ୍ ଜିତିଥିଲା। ପ୍ରଥମ ମ୍ୟାଚ୍ରେ ୩୬ ରନ୍ରେ ଅଲଆଉଟ୍ ହେବା ପରେ ଟିମ୍ ଇଣ୍ଡିଆ ଅଷ୍ଟ୍ରେଲିଆକୁ ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରେ ୨-୧ରେ ହରାଇ ଦେଇଥିଲା। ଅଷ୍ଟ୍ରେଲିଆରେ ଐତିହାସିକ ବିଜୟ ହାସଲ କରିଥିବା ଦଳର ଉପ ଅଧିନାୟକ ଅଜିଙ୍କ୍ୟ ରାହାନେ ଗୁରୁବାର କହିଛନ୍ତି, “ଅଷ୍ଟ୍ରେଲିଆରେ ମୁଁ ନେଇଥିବା ନିଷ୍ପତ୍ତିର ଶ୍ରେୟ ଅନ୍ୟ ଜଣେ ନେଇଗଲେ”।
ଆଡିଲେଡ୍ ଟେଷ୍ଟରେ ଭାରତୀୟ ଦଳର ଶୋଚନୀୟ ପରାଜୟ ପରେ ଅଧିନାୟକ ବିରାଟ କୋହଲି ସ୍ବଦେଶ ଫେରି ଯାଇଥିଲେ। ତାଙ୍କ ଅନୁପସ୍ଥିତିରେ ଟିମ୍ ଇଣ୍ଡିଆର ମଙ୍ଗ ସମ୍ଭାଳିଥିଲେ ରାହାନେ। ତା’ ପରେ ଯାହା ଘଟିଲା ତାହା ଉଲ୍ଲେଖ ରହିଛି ଟେଷ୍ଟ କ୍ରିକେଟ ଇତିହାସରେ। ମେଲବୋର୍ନରେ ଖେଳାଯାଇଥିବା ଦ୍ୱିତୀୟ ମ୍ୟାଚ୍କୁ ଜିତି ଭାରତ ସିରିଜ୍କୁ ପ୍ରତ୍ୟାବର୍ତ୍ତନ କରିଥିଲା।
“ମୋତେ ଜଣାଅଛି, ମୁଁ ସେଠାରେ କ’ଣ କରିଛି। ମୋତେ କାହାକୁ କହିବାର ଆବଶ୍ୟକତା ନାହିଁ। ସଫଳତାର ଶ୍ରେୟ ପାଇଁ ପଚାରିବା ମୋ ସ୍ବଭାବ ନୁହେଁ। କିନ୍ତୁ ସେଠାରେ ଫିଲ୍ଡ ମଧ୍ୟରେ ଏବଂ ଡ୍ରେସିଂ ରୁମ୍ରେ ମୁଁ ଯେଉଁ ନିଷ୍ପତ୍ତି ନେଇଥିଲି, ତାହାର ଶ୍ରେୟ ଅନ୍ୟ ଜଣେ ନେଇଗଲେ” ବୋଲି ରାହାନେ ‘ବ୍ୟାକଷ୍ଟେଜ ଓ୍ବିଥ ବୋରିଆ’ର ଏକ ଏପିସୋଡ୍ରେ କହିଛନ୍ତି।
“ଆମେ ସିରିଜ୍ ଜିତିଲୁ, ତାହା ମୋ ପାଇଁ ଗୁରୁତ୍ୱପୂର୍ଣ୍ଣ। ତାହା ଏକ ଐତିହାସିକ ସିରିଜ୍ ଥିଲା। ମୋ ପାଇଁ ମଧ୍ୟ ଏହା ସ୍ବତନ୍ତ୍ର। କିନ୍ତୁ ମୋ ସଫଳତାର ଶ୍ରେୟ ନେଇଥିବା ବ୍ୟକ୍ତି ଗଣମାଧ୍ୟମରେ ‘ମୁଁ ଏହି ନିଷ୍ପତ୍ତି ନେଇଥିଲି’ ବୋଲି କହୁଛନ୍ତି। ମୋ କଥା ହେଲା ମୁଁ ଫିଲ୍ଡରେ କେଉଁ ନିଷ୍ପତ୍ତି ନେଇଥିଲି, ତାହା ମୋତେ ଜଣା” ବୋଲି ୩୩ ବର୍ଷୀୟ ବ୍ୟାଟର କହିଛନ୍ତି। ପୂର୍ବତନ ମୁଖ୍ୟ କୋଚ୍ ରବି ଶାସ୍ତ୍ରୀଙ୍କ ନାମ ନେଇ ନ ଥିଲେ ମଧ୍ୟ ଏଭଳି କହି ରାହାନେ ତାଙ୍କୁ ହିଁ ଟାର୍ଗେଟ୍ କରିଛନ୍ତି। କାରଣ ଶାସ୍ତ୍ରୀ ଗଣମାଧ୍ୟମ ଆଗରେ ଅଷ୍ଟ୍ରେଲିଆ ଗସ୍ତରେ ଭାରତୀୟ ଦଳର ସଫଳତାର ଶ୍ରେୟ ନେଇଥିଲେ।