ଗୋପ,୨୪।୧୦ (ଡି.ଏନ୍.ଏ.):ବୟସର ଅପରାହ୍ନରେ ପହଞ୍ଚତ୍ ଥିଲେ ସୁଦ୍ଧା ସଂସାର ଚଳାଇବାକୁ ହେଲେ କିଛି ନା କିଛି କରିବାକୁ ପଡ଼ିଥାଏ। ଆଖିକୁ ଭଲ ଦେଖାଯାଉ ନ ଥିଲେ ମଧ୍ୟ ପେଟ ପାଇଁ ସ୍ବାମୀ ସ୍ତ୍ରୀ ଗାଁ ଗାଁ ବୁଲି ବ୍ରତ ବିକ୍ରି କରିଥାନ୍ତି। ଯାହା ଆୟ ହୁଏ, ସେଥିରେ ସଂସାର କଷ୍ଟେମଷ୍ଟେ ଚଳିଯାଏ ବୋଲି କୁହନ୍ତି ପୁରୀ ଜିଲା ନିମାପଡ଼ା ଥାନା ଅନ୍ତର୍ଗତ ନୂଆପାଟଣା ଗ୍ରାମର ୭୦ ବର୍ଷୀୟ ପ୍ରଫୁଲ୍ଲ କୁଣ୍ଡୁ। ସେ ୨୦ ବର୍ଷ ବୟସରେ ଯାତ୍ରା ପାର୍ଟିରେ ଯୋଗ ଦେଇଥିଲେ। ପ୍ରଥମେ ଶାତଶଙ୍ଖ ଅପେରା ଓ ପରେ ଡେଲାଙ୍ଗ, ରାଢ଼ଙ୍ଗ, ଗ୍ରାଜୁଏଟ୍ ଅପେରା ସହିତ ଆଉ କେତେକ ଯାତ୍ରା ପାର୍ଟିରେ ନିଖୁଣ ଅଭିନୟ କରିଥିଲେ। କିନ୍ତୁ ଯାତ୍ରା ପାର୍ଟିର ଉଜ୍ଜ୍ୱଳ ଆଲୋକରେ ତାଙ୍କ ଆଖି ଖରାପ ହେବାରୁ ସେ ୪୨ ବର୍ଷ ବୟସରେ ଯାତ୍ରା ପାର୍ଟି ଛାଡ଼ିଥିଲେ। ସେଠାରେ ପ୍ରଫୁଲ୍ଲ ୨/୩ ଜଣଙ୍କୁ ବିବାହ କରିଥିବାରୁ ତାଙ୍କର ୨ଟି ପୁଅ ଓ ୨ଟି ଝିଅ ଅଛନ୍ତି। ତାଙ୍କ ବଡ଼ଝିଅ ଯାତ୍ରା ପାର୍ଟିର ଆଗ ଧାଡ଼ିରେ ଅଭିନୟ କରୁଥିବାବେଳେ ବଡ଼ ପୁଅ ମଧ୍ୟ ଯାତ୍ରାପାର୍ଟିରେ କାର୍ଯ୍ୟ କରୁଛନ୍ତି। ଅନ୍ୟ ଗୋଟିଏ ଝିଅ ଓ ଗୋଟିଏ ପୁଅ ଘରେ ଅଛନ୍ତି। ପ୍ରଫୁଲ୍ଲ ଏବେ ଗୋପ, ନିମାପଡ଼ା, ବାଲିପାଟଣା ସହିତ ବିଭିନ୍ନ ଗାଁରେ ବୁଲି ବୁଲି ବ୍ରତ ବିକ୍ରି କରୁଛନ୍ତି। ତାଙ୍କ ସହିତ ତାଙ୍କ ସ୍ତ୍ରୀ କନକ କୁଣ୍ଡୁ(୫୦) ମଧ୍ୟ ଏହି ବ୍ରତ ବିକ୍ରି କରୁଛନ୍ତି। ସୁଦସା ବ୍ରତ, ଷଠୀ, ଖୁଦୁରୁକୁଣୀ, ଦଶହରା ଭଳି ବିଭିନ୍ନ ପର୍ବ ପାଇଁ ବ୍ରତ ବିକିଥାନ୍ତି। କେତେକ ବେପାରୀ ତାଙ୍କଠାରୁ ବ୍ରତ ନେଉଥିବା ସେ କହିଛନ୍ତି। ଏଥିସହ ସମୟ ମିଳିଲେ ତାଙ୍କ ସ୍ତ୍ରୀ ମୂଲ ମଜୁରି ଲାଗିବାକୁ ମଧ୍ୟ ଯାଆନ୍ତି। ପ୍ରଫୁଲ୍ଲ ଏବେ ବଡ଼ ଦୁଃଖରେ ପରିବାର ଭରଣପୋଷଣ କରୁଥିବାବେଳେ ସାନ ପୁଅ ଦୋକାନରେ କାମ କରୁଛନ୍ତି। ୧୯୯୯ ମହାବାତ୍ୟାରେ ପ୍ରଫୁଲ୍ଲଙ୍କ କଳାକାର ସାର୍ଟିଫିକେଟଟି ନଷ୍ଟ ହୋଇଯିବାରୁ ସରକାର ଦେଉଥିବା କଳାକାର ଭତ୍ତାରୁ ମଧ୍ୟ ସେ ବଞ୍ଚତ୍ତ ହୋଇଛନ୍ତି। ତାଙ୍କୁ ସରକାରୀ ସହାୟତା ପାଇଁ ଜିଲା ପ୍ରଶାସନ ଦୃଷ୍ଟି ଦେବାକୁ ଦାବି କରାଯାଇଛି। ଏ ପ୍ରସଙ୍ଗରେ ପ୍ରଫୁଲ୍ଲଙ୍କୁ ପଚାରିବାରେ, ସବୁ ସେଇ ମହାପ୍ରଭୁ ଶ୍ରୀଜଗନ୍ନାଥଙ୍କ ଇଚ୍ଛା। ବୃଦ୍ଧ କାଳରେ ଘର ଘର ବୁଲି ଦଶ ପାଞ୍ଚ ଟଙ୍କାରେ ବ୍ରତ ବିକ୍ରି କରି ସଂସାର ଚଳାଇବା କେତେ କଷ୍ଟ କେବଳ ଭଗବାନ ଜାଣିପାରୁଥିବେ। ଏବେ କିନ୍ତୁ ନିଜ ଭାଗ୍ୟକୁ ଦୋଷ ଦେଇ ଅନ୍ତିମ ଯାତ୍ରାକୁ ଅପେକ୍ଷା ବୋଲି ସେ କହିଛନ୍ତି। ଜିଲା ପ୍ରଶାସନ ଓ ଗଣଶିକ୍ଷାମନ୍ତ୍ରୀ ସମୀର ରଞ୍ଜନ ଦାଶ ଦୃଷ୍ଟି ଦେବାକୁ ସାଧାରଣରେ ଦାବି କରାଯାଇଛି।