ନୂଆଦିଲ୍ଲୀ,୧୨।୫: ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ମାର୍ଗଦର୍ଶନକୁ ମିସ୍ କରୁଥିବା ସ୍ବୀକାର କରିଛନ୍ତି ସ୍ପିନର କୁଲଦୀପ ଯାଦବ। ଏହି ଚାଇନାମ୍ୟାନ ସ୍ପିନରଙ୍କୁ ୨୦୧୯ ଠାରୁ ଅନ୍ତର୍ଜାତୀୟ କ୍ରିକେଟରେ ନିୟମିତ ସୁଯୋଗ ମିଳୁନାହିଁ। ଏହି ବର୍ଷ ହିଁ ଧୋନୀ ଖେଳିଥିଲେ ଭାରତ ପାଇଁ ଅନ୍ତିମ ମ୍ୟାଚ୍।
” ବେଳେବେଳେ ମୁଁ ଧୋନୀଙ୍କ ମାର୍ଗଦର୍ଶନକୁ ମିସ୍ କରେ। କାରଣ ସେ ଜଣେ ଅଭିଜ୍ଞ ଉଇକେଟକିପର। ସେ ଉଇକେଟ ପଛରୁ ଆମକୁ ବଡ଼ ପାଟିରେ ଟିପ୍ସ ଦିଅନ୍ତି। ଆମେ ତାଙ୍କ ଅଭିଜ୍ଞତାକୁ ମିସ୍ କରୁଛୁ। ଏବେ ରିଷଭ ପନ୍ତ ଉଇକେଟକିପିଂ କରୁଛନ୍ତି। ସେ ଯେତେ ଅଧିକ ମ୍ୟାଚ୍ ଖେଳିବେ, ଭବିଷ୍ୟତରେ ସେତେ ଅଧିକ ଟିପ୍ସ ଦେବେ। ମୁଁ ସର୍ବଦା ଅନୁଭବ କରେ, ବୋଲରଙ୍କୁ ଧୋନୀଙ୍କ ଭଳି ପାର୍ଟନର ଦରକାର “ ବୋଲି କୁଲଦୀପ କହିଛନ୍ତି।
ଅନ୍ତର୍ଜାତୀୟ କ୍ରିକେଟରୁ ଧୋନୀ ଦୂରେଇବା ପରେ କୁଲଦୀପ ୨୦୨୦ ଓ ୨୦୨୧ରେ ମାତ୍ର ୭ଟି ଦିନିକିଆ ଖେଳିଛନ୍ତି। ଏହା ତୁଳନାରେ କେବଳ ୨୦୧୯ରେ ଖେଳିଥିଲେ ୨୩ଟି ମ୍ୟାଚ୍। ଉଲ୍ଲେଖଯୋଗ୍ୟ, ଆଇସିସି ବିଶ୍ୱକପ୍ ସେମିଫାଇନାଲରେ ନ୍ୟୁଜିଲାଣ୍ଡଠାରୁ ପରାଜୟ ପରେ କ୍ରିକେଟରୁ ଦୂରେଇ ଯାଇଥିଲେ ଧୋନୀ। ଏହାପରେ ୨୦୨୦ ଅଗଷ୍ଟ ୧୫ ତାରିଖରେ ଘୋଷଣା କରିଥିଲେ ସନ୍ନ୍ୟାସ।
” ମାହି ଭାଇ ଦଳରେ ଥିବାବେଳେ ମୁଁ ଓ ୟୁଜବେନ୍ଦ୍ର ଚହଲ ଖେଳୁଥିଲୁ। ସେ ଅନ୍ତର୍ଜାତୀୟ କ୍ରିକେଟରୁ ଦୂରେଇବା ପରେ ଆମେ କଦାପି ଏକାଠି ଖେଳିନାହୁଁ। ମୋତେ ହାତଗଣତି ମ୍ୟାଚ୍ରେ ସୁଯୋଗ ମିଳିଛି। ମୁଁ ହ୍ୟାଟ୍ରିକ ମଧ୍ୟ ନେଇଛି। ଅନ୍ତର୍ଜାତୀୟ କ୍ରିକେଟରେ ମୋଟାମୋଟି ପ୍ରଦର୍ଶନ ସେତେଟା ଖରାପ ନାହିଁ। ଅବଶ୍ୟ କିଛି ମ୍ୟାଚ୍ରେ ମୋ ପ୍ରଦର୍ଶନ ଭଲ ନାହିଁ “ ବୋଲି କୁଲଦୀପ ଏକ ସାକ୍ଷାତ୍କାରରେ ସ୍ବୀକାର କରିଛନ୍ତି।