ବମ୍ବେ: ନବେ ଦଶକର ଅଭିନେତ୍ରୀ ସୋମି ଅଲି ଏବେ ଲାଇମ୍ଲାଇଟ୍ରୁ ଦୂରରେ। ଏକଦା ସେ ଦବଙ୍ଗ ଖାନ୍ ସଲମାନଙ୍କ ପ୍ରେମିକା ଥିବାବେଳେ ଆଜିଯାଏ ବିବାହ କରିନାହାନ୍ତି। ଏହା ପଛରେ କି କାରଣ ରହିଛି ସେ ନେଇ ସୋମିଙ୍କୁ ପଚରାଯାଇଥିଲା। ନିକଟରେ ସେ ସଲମାନଙ୍କ ସହ ସମ୍ପର୍କ, ଚଳଚ୍ଚିତ୍ରକୁ ଫେରିବା ଭଳି ଅନେକ ପ୍ରସଙ୍ଗରେ ଖୋଲାଖୋଲି ଭାବେ କହିଛନ୍ତି।
ଏକ ସାକ୍ଷାତକାରରେ ସୋମି ପ୍ରେମରେ ପଡ଼ିବା ନେଇ କହିଛନ୍ତି, ସେତେବେଳେ ସଲମାନ ନିଜର ପ୍ରଯୋଜନା ସଂସ୍ଥା ଆରମ୍ଭ କରିଥିଲେ। ସେ ଫିଲ୍ମ ‘ବୁଲନ୍ଦ’ରେ ତାଙ୍କ ବିପରୀତ ନାୟିକା ଖୋଜୁଥିଲେ। ନେପାଳର ରାଜଧାନୀ କାଠମାଣ୍ଡୁରେ ଫିଲ୍ମର ଶୁଟିଂ କରାଯାଇଥିଲା। ଦୁର୍ଭାଗ୍ୟବଶତଃ ସେତେବେଳେ ମୁଁ ଫିଲ୍ମଜଗତ ପାଇଁ ନୂଆ ଥିଲି। ଏଣୁ ଫିଲ୍ମର ପ୍ରଯୋଜକଙ୍କ ସହ ମତଭେଦ ହୋଇଥିଲା। ଏହା ଆମ ସମ୍ପର୍କର ଆରମ୍ଭ ଥିଲା।
ଏବେ ସଲମାନଙ୍କ ସହ ସମ୍ପର୍କରେ ଅଛନ୍ତି କି ପ୍ରଶ୍ନରେ ସୋମି କହିଛନ୍ତି, ମୁଁ ଗତ ପାଞ୍ଚ ବର୍ଷ ଧରି ସଲମାନଙ୍କ ସହ କଥା ହୋଇନାହିଁ। ଜୀବନରେ ଆଗକୁ ବଢ଼ିବା ଜରୁରୀ ବୋଲି ମୁଁ ଭାବୁଛି। ଡିସେମ୍ବର ୧୯୯୯ରେ ଆମେ ଅଲଗା ହୋଇଥିଲୁ। ଏହାପରେ ତାଙ୍କର କେତେଜଣ ପ୍ରେମିକା ଆସିଛନ୍ତି ସେ ବିଷୟରେ ଜାଣିନାହିଁ। କେବଳ ଏତିକି ଜାଣେ ତାଙ୍କ ଏନ୍ଜିଓ ବିଙ୍ଗ୍ ହ୍ୟୁମାନ ବହୁତ ଭଲ କାମ କରୁଛି। ମାନସିକସ୍ତରରେ ମଧ୍ୟ ସଲମାନଙ୍କ ସହ ଯୋଗାଯୋଗ ନ କରିବା ମୋ ପାଇଁ ଭଲ ବୋଲି ସୋମି କହିଛନ୍ତି।
ବିବାହକୁ ନେଇ ଏବେ କୌଣସି ଯୋଜନା ନ ଥିବା ସୋମି କହିଛନ୍ତି। ସେ ବାହା ହେବାକୁ ଚାହାନ୍ତି ନାହିଁ। ୨୪ ବର୍ଷ ପରେ ସେ ସମୟ ଅତିବାହିତ ହୋଇଯାଇଥିବା ତାଙ୍କୁ ଲାଗୁଛି। ଯଦି କେହି ସାଥୀ ମିଳନ୍ତି ତେବେ ସେ ରହିବାକୁ ପ୍ରସ୍ତୁତ ବୋଲି କହିଛନ୍ତି।