କୋରାପୁଟ,୬।୮(ସ୍ବ.ପ୍ର.): ନାନାଦି ଦୁଃଖ, କଷ୍ଟ, ଯନ୍ତ୍ରଣା ସହି ପିଲାମାନଙ୍କୁ ଛୋଟରୁ ବଡ଼ କରିଥାନ୍ତି ମାତାପିତା। ହେଲେ ସେମାନେ ପରିଣତ ବୟସରେ ପିଲାମାନଙ୍କ ପାଇଁ ଅଲୋଡା ହୋଇପଡ଼ନ୍ତି। ଏପରି ଏକ ହୃଦୟ ବିଦାରକ ଘଟଣା କୋରାପୁଟରେ ଦେଖିବାକୁ ମିଳିଛି। ଜିଲାର ଲକ୍ଷ୍ମୀପୁର ଥାନା ଅଧିନସ୍ଥ ଉପରକୁଟିଙ୍ଗାରେ ପୁଅବୋହୂ ମିଶି ବୃଦ୍ଧ ବାପାଙ୍କୁ ପିଟିପିଟି ହତ୍ୟା କରିଛନ୍ତି। ମୃତକ ହେଲେ କୃଷ୍ଣ ମ୍ୟାଣିଆକା। ତେବେ ଘଟଣାର ଭିଡିଓ ଭାଇରାଲ ହେବା ପରେ ଏହା ଚର୍ଚ୍ଚାର ବିଷୟ ପାଲଟିଛି।
ସୂଚନାନୁଯାୟୀ, ଶୁକ୍ରବାର ଉପରକୁଟିଙ୍ଗାରେ ଜଣେ ବୃଦ୍ଧଙ୍କୁ ପୁଅ ଏବଂ ବୋହୂ ମିଶି ଗାଁ ଦାଣ୍ଡରେ ଥିବା ବିଦ୍ୟୁତ ଖୁଣ୍ଟରେ ବାନ୍ଧି ନିର୍ଧୂମ ପିଟିଥିଲେ। ଏଥିରେ ବୃଦ୍ଧଙ୍କ ମୃତ୍ୟୁ ଘଟିଥିଲା। ପରେ ଉଭୟ ତାଙ୍କର ମୃତଦେହ ନେଇ ସତ୍କାର କରିଦେଇଥିଲେ। ଶୁକ୍ରବାର ଘଟଣାଟି ଘଟିଥିବା ବେଳେ ଶନିବାର ସକାଳେ ଏହାର ଭିଡିଓ ଭାଇରାଲ ହୋଇଥିଲା। ଏନେଇ ଜାଣିବା ପରେ ଲକ୍ଷ୍ମୀପୁର ଥାନା ଅଧିକାରୀଣୀ ଶ୍ୱେତପଦ୍ମା ସେଠ ପୋଲିସ ଟିମ୍ ସହ ଉପରକୁଟିଙ୍ଗାରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଉଭୟ ପୁଅ ଏବଂ ବୋହୂଙ୍କୁ ଥାନାରେ ଅଟକ ରଖି ପଚରାଉଚରା କରାଯାଉଛି। ତେବେ କେଉଁ କାରଣ ଯୋଗୁ ନିଜ ବାପାଙ୍କୁ ଏଭଳି ପିଟିପିଟି ହତ୍ୟା କରାଯାଇଛି ତା’ର କାରଣ ଖୁବ୍ଶୀଘ୍ର ଜଣାପଡ଼ିବ ବୋଲି ପୋଲିସ କହିଛି।