ପରଜଙ୍ଗ,୭।୪(ଡି.ଏନ୍.ଏ): ଶ୍ୱଶୁରଘର ଗାଁରୁ ଜ୍ୱାଇଁଙ୍କ ମୃତଦେହ ଉଦ୍ଧାର ହୋଇଛି। ଏଭଳି ଏକ ଅଭାବନୀୟ ଘଟଣା ଘଟିଛି ଢେଙ୍କାନାଳ ଜିଲା ପରଜଙ୍ଗ ଥାନା ସାଆନ୍ଦା ଫାଣ୍ଡି ଅଧୀନ ଖଇରପଶି ଗ୍ରାମରେ। ବିଲ ମଝିରୁ ଯୁବକଙ୍କ ମୃତଦେହ ମଙ୍ଗଳବାର ସାରେ ପୋଲିସ ଉଦ୍ଧାର କରିଛି। ମୃତ ଯୁବକ ଜଣକ ହେଉଛନ୍ତି ତାଳଚେର ଥାନା ହାଣ୍ଡିଧୂଆ ଅଞ୍ଚଳର ମିଥୁନ ବେହେରା (୩୦)।
ସୂଚନାଯୋଗ୍ୟ, ମିଥୁନ ଦୁଇ ବର୍ଷ ହେବ ତାଙ୍କ ସ୍ତ୍ରୀଙ୍କ ସହ ଶ୍ୱଶୁରଘର ଖଇରପଶିରେ ରହି ଆସୁଥିଲେ। ତେବେ ଶ୍ୱଶୁରଘର ଲୋକେ ମିଶି ତାଙ୍କୁ ହତ୍ୟା କରିଥିବା ମିଥୁନଙ୍କ ମା’ ଝରି ବେହେରା ପରଜଙ୍ଗ ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ପୋଲିସ ସ୍ତ୍ରୀ ଲକ୍ଷ୍ମୀ ବେହେରା, ଶାଶୁ ଅଖରୀ ବେହେରା, ଶଳା ବୁଲୁ ବେହେରା ଓ ନବ ବେହେରାଙ୍କ ନାମରେ ମାମଲା ରୁଜୁ କରି ତଦନ୍ତ ଜାରି ରଖିଛି । ଘଟଣାସ୍ଥଳରେ ପରଜଙ୍ଗ ଥାନାଧିକାରୀ ସୌଭାଗ୍ୟ ସ୍ବାଇଁ, ଏସ୍ଆଇ ସସ୍ମିତା ପାଲ ଓ ସାଇଣ୍ଟିଫିକ ଟିମ୍ ପହଞ୍ଚି ଅଧିକ ତଦନ୍ତ ଜାରି ରଖିଛନ୍ତି। ତେବେ ପାରିବାରିକ କଳହକୁ ନେଇ ଦୁଇଦିନ ହେଲା ମିଥୁନ ନିଖୋଜ ଥିବା ବେଳେ ଅନ୍ୟ କେହି ତାଙ୍କୁ ମାରିଦେଇଥିବା ମିଥୁନଙ୍କ ସ୍ତ୍ରୀ କହିଛନ୍ତି। ଏସଂକ୍ରାନ୍ତରେ ପରଜଙ୍ଗ ଥାନାରେ ୧୩୧/୨୧ରେ ମାମଲା ରୁଜୁ ହୋଇଛି । ମୃତକଙ୍କ ଦୁଇ ଶଳାଙ୍କୁ ପୋଲିସ ଅଟକ ରଖିଥିବା ସୂଚନା ମିଳିଛି।
