ଲହଣୀପଡ଼ା,୨୫।୧୦(ଡି.ଏନ.ଏ): ପୁଅର ଠେଙ୍ଗା ମାଡ଼ରେ ବାପର ମୃତ୍ୟୁ। ଏଭଳି ଏକ ଅଭାବନୀୟ ଘଟଣା ଘଟିଛି ସୁନ୍ଦରଗଡ଼ ଜିଲା ଲହୁଣୀପଡ଼ା ଥାନା ଅନ୍ତର୍ଗତ କୁଡେଇକଳା ପଞ୍ଚାୟତ ଘଣିଘଷା ଗ୍ରାମରେ। ମୃତକ ହେଲେ ଭୁବନ ମୁଣ୍ଡା (୪୮)। ସୂଚନାଯୋଗ୍ୟ, ପ୍ରତ୍ୟେକ ଦିନ ଭଳି ଭୁବନ ସୋମବାର ଦିନ ମଧ୍ୟ ନିକଟସ୍ଥ ଜଙ୍ଗଲକୁ ଗାଈ ଚରାଇବାକୁ ଯାଇଥିଲେ। ହେଲେ କୌଣସି କାରଣରୁ ସେ ଜଙ୍ଗଲରେ ଗାଈଗୁଡିକ ଛାଡ଼ି ଦେଇ ଘରକୁ ପଳାଇ ଆସିଥିଲେ। ଏହା ଦେଖି ଘରେ ଥିବା ନିଶାସକ୍ତ ଅବସ୍ଥାରେ ଥିବା ଭୁବନଙ୍କ ପୁଅ ଆକାଶ ମୁଣ୍ଡା (୧୯) ରାଗିଯାଇ ତାଙ୍କ ସହିତ ଝଗଡା କରିବା ସହିତ ଏକ ଠେଙ୍ଗାରେ ପିଟି ପିଟି ଘରୁ ସେହି ଜଙ୍ଗଲକୁ ନେଇଥିଲେ। ଏହାପରେ ସେଠାରେ ନିସ୍ତୁକ ମାଡ଼ ମାରିବାରୁ ଭୁବନ ତଳେ ପଡି ଯାଇଥିଲେ। ଫଳରେ ନିଶାସକ୍ତ ପୁଅ ଆକାଶ ମୁଣ୍ଡା ହିତାହିତ ଜ୍ଞାନ ଭୁଲି ତଳେ ପଡିଥିବା ବାପା ଭୁବନଙ୍କୁ ପଥରରେ ବାରମ୍ବାର ଛେଚି ଜୀବନରେ ମାରିଦେଇ ସେଠାରୁ ପଳେଇ ଯାଇଥିଲେ। ଗ୍ରାମର କିଛି ଲୋକ ଦେଖି ଭୁବନଙ୍କ ଘରକୁ ଖବର ଦେବାରୁ ପରିବାର ଲୋକ ଘଟଣାସ୍ଥଳରେ ପହଞ୍ଚିବା ସହିତ ପୋଲିସକୁ ଖବର ଦେଇଥିଲେ। ଖବରପାଇ ଲହୁଣୀପଡ଼ା ପୋଲିସ ଓ ସାଇଣ୍ଟିଫିକ ଦଳ ପହଞ୍ଚି ଘଟଣାର ତଦନ୍ତ କରିବା ସହିତ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ଲହୁଣୀପଡ଼ା ଡାକ୍ତରଖାନାକୁ ପଠାଇଥିବା ଜଣାପଡିଛି। ଏହାସହିତ ଅଭିଯୁକ୍ତ ପୁଅ ଆକାଶ ମୁଣ୍ଡାଙ୍କୁ ପୋଲିସ ଗିରଫ କରି ପଚରାଉଚରା କରୁଥିବା ସୂଚନା ମିଳିଛି।