ଭବାନୀପାଟଣା,୫।୧(ସ୍ବ.ପ୍ର.): କଳାହାଣ୍ଡି ଜିଲା ଭବାନୀପାଟଣା ସଦର ଥାନା ଅଧୀନ କାଡମ ଗାଁରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ବାପାଙ୍କୁ ହତ୍ୟା କରି ଏକ ଭଙ୍ଗା ଦଦରା ଘରେ ପୋତି ଦେଇଥିଲେ ଜହ୍ଲାଦ ପୁଅ। ଏହି ଘଟଣା ୧ ତାରିଖରେ ଘଟିଥିବା ବେଳେ ଗୁରୁବାର ଲୋକ ଲୋଚନକୁ ଆସିଛି।
ମିଳିଥିବା ସୂଚନା ମୁତାବକ, ଗାଁର ପରମା ହରିଜନ ଏବଂ ତାଙ୍କ ସାନ ପୁଅ ସୁମନ୍ତ ହରିଜନଙ୍କ ମଧ୍ୟରେ ପ୍ରାୟ ସମୟରେ ଝଗଡ଼ା ଲାଗି ରହୁଥିଲା। ସେହିପରି ନୂଆବର୍ଷ ୧ ତାରିଖରେ ବାପ ପୁଅ ମଧ୍ୟରେ ବଚସା ହୋଇଥିଲା । ଏଥିରେ ପୁଅ ସୁମନ୍ତ ଉତ୍କ୍ଷିପ୍ତ ହୋଇ ବାପା ପରମାଙ୍କୁ ପିଟିପିଟି ହତ୍ୟା କରି ଏକ ଭଙ୍ଗା ଘରେ ପୋତି ଦେଇଥିଲେ । ଘଟଣାର ୫ ଦିନ ପରେ ବାପାଙ୍କ ଦେଖା ନ ମିଳିବାରୁ ମଝିଆ ପୁଅ ଓ ବଡ଼ପୁଅ ସମ୍ପର୍କୀୟଙ୍କ ଘରେ ଖୋଜା ଖୋଜି କରି ନିରାଶ ହୋଇଥିଲେ। ତେବେ ସାନ ଭାଇ ସୁମନ୍ତଙ୍କ ସାମ୍ନା ଭଙ୍ଗା ଘରେ ସିମେଣ୍ଟ ରଖାଯାଇଥିବାରୁ ସେମାନେ ଦେଖି ଯାଉଥିଲେ। ହେଲେ ଘରୁ ଦୁର୍ଗନ୍ଧ ବାହାରୁ ଥିବାରୁ ସନ୍ଦେହ କରି ମାଟି ଖୋଳିବା ପରେ ବାପାଙ୍କ ମୃତଦେହ ଦେଖିବାକୁ ପାଇଥିଲେ। ଏହା ଦେଖି ଚକିତ ହୋଇପଡିଥିଲେ । ବାପାଙ୍କୁ କିଏ ହତ୍ୟା କରିଛି ବୋଲି ପରିବାର ଲୋକେ ଖୋଜିବା ବେଳକୁ ସାନ ଭାଇ ସୁମନ୍ତ ଫେରାର ହୋଇଯାଇଥିଲେ। ଏନେଇ ମଝିଆ ପୁଅ ମଦନ ଭବାନୀପାଟଣା ସଦର ଥାନାରେ ଲିଖିତ ଅଭିଯୋଗ କରିଥିଲେ। ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା। ମୃତଦେହ ବ୍ୟବଚ୍ଛେଦ ପରେ ପୋଲିସ ପରିବାର ଲୋକଙ୍କୁ ହସ୍ତାନ୍ତର କରିଛି। ପୋଲିସ ମୃତକ ପରମାଙ୍କ ସ୍ତ୍ରୀ ଏବଂ ସୁମନ୍ତଙ୍କ ସ୍ତ୍ରୀଙ୍କୁ ପଚରାଉଚରା ଜାରି ରଖିଛି। ଏ ନେଇ ଭବାନୀପାଟଣା ସଦର ଥାନାରେ ଏକ ମାମଲା (ନଂ.୮/୨୩) ରୁଜୁ ହୋଇଛି। ତେବେ ହତ୍ୟାକାରୀ ପୁଅ ସୁମନ୍ତ ଏବେ ବି ଫେରାର ଥିବା ସୂଚନା ମିଳିଛି।