ଭୁବନେଶ୍ୱର,୧୯। ୭(ବ୍ୟୁରୋ): ସନ୍ଦେହରୁ ପାରିବାରିକ ଅଶାନ୍ତି। ସ୍ଥିତି ଏପରି ହେଲା ଶେଷରେ ବାପାଙ୍କୁ ବିଧାମାରି ହତ୍ୟାକଲେ ଡାକ୍ତର ପୁଅ। ଖଣ୍ଡଗିରି ଥାନା ଅନ୍ତର୍ଗତ ଜଗମୋହନ ନଗରରେ ଏଭଳି ଏକ ସ୍ପର୍ଶକାତର ଘଟଣା ଘଟିଛି। ମୃତକ ହେଲେ କୃଷି ବିଭାଗର ପୂର୍ବତନ ଅତିରିକ୍ତ ନିର୍ଦ୍ଦେଶକ ରାଜକିଶୋର ମିଶ୍ର (୭୩)। ପୋଲିସ ଆଇପିସି ଦଫା ୩୦୨ରେ ହତ୍ୟା ମାମଲା (ନଂ.୪୧୬/୨୦) ରୁଜୁ କରି ଅଭିଯୁକ୍ତ ପୁଅଙ୍କୁ ଗିରଫ କରିଛି। ସେ ହେଲେ ଡା. ରଞ୍ଜନ ମିଶ୍ର(୪୧)। ପୋଲିସ ରଞ୍ଜନଙ୍କୁ କୋର୍ଟ ଚାଲାଣ କରିଥିଲା। ଜାମିନ ନ ମିଳିବାରୁ ତାଙ୍କୁ ବିଚାର ବିଭାଗୀୟ ଜେଲ୍ ହାଜତକୁ ପଠାଇ ଦିଆଯାଇଛି। ତେବେ ସବୁଠୁ ବଡ଼ କଥା ହେଲା ଘଟଣା ୧୬ ତାରିଖରେ ଘଟିଥିବାବେଳେ ୩ଦିନ ପରେ ବ୍ୟବଚ୍ଛେଦ ରିପୋର୍ଟ ପର୍ଦ୍ଦାଫାଶ କରିଛି। ଏଥିସହ ଅଭିଯୁକ୍ତ ରଞ୍ଜନ ମଧ୍ୟ ସ୍ବୀକାର କରିଛଥିବା ପୋଲିସ କହିଛି।
ପୋଲିସ ସୂଚନାନୁଯାୟୀ, ଅଭିଯୁକ୍ତ ରଞ୍ଜନ ଆୟୁଷ ଡାକ୍ତର ଭାବେ ବାଣପୁରରେ କାର୍ଯ୍ୟ କରନ୍ତି। ଅଧିକାଂଶ ସମୟ କାର୍ଯ୍ୟସ୍ଥଳ ବାଣପୁରରେ ରହୁଥିବାବେଳେ ଜଗମୋହନ ନଗରରେ ତାଙ୍କ ବାପା ରାଜକିଶୋର, ସ୍ତ୍ରୀ ଓ ୨ ପୁଅ ଘରେ ରୁହନ୍ତି। କରୋନା ପରିସ୍ଥିତି ଓ କୌଣସି କାରଣ ପାଇଁ ରଞ୍ଜନ ଏକ ମାସ ହେବ ଛୁଟିରେ ଆସି ଘରେ ରହୁଥିଲେ। ଏହି ସମୟରେ କୌଣସି ଏକ କାରଣକୁ ନେଇ ତାଙ୍କର ମାନସିକ ଚିନ୍ତା ବଢ଼ି ଯାଇଥିଲା। ତେଣୁ ସେ ଗତ ୯ ତାରିଖରେ ଚାକିରିରୁ ଇସ୍ତଫା ଦେଇ ଘରେ ରହିଥିଲେ। ଏହାମଧ୍ୟରେ ସ୍ବାମୀ ଓ ସ୍ତ୍ରୀଙ୍କ ମଧ୍ୟରେ ବାରମ୍ବାର ଝଗଡ଼ା ହୋଇଥିଲା। ରଞ୍ଜନ ତାଙ୍କ ସ୍ତ୍ରୀଙ୍କୁ ମଧ୍ୟ ମାଡ଼ ମାରିଥିଲେ। ୧୬ ତାରିଖରେ ରଞ୍ଜନ ଓ ବାପା ରାଜକିଶୋର ମଧ୍ୟରେ ବଚସା ହୋଇଥିଲା। ଏହି ସମୟରେ ରଞ୍ଜନ ଅତ୍ୟଧିକ ରାଗି ଯାଇ ବାପା ରାଜକିଶୋରଙ୍କ ଛାତିକୁ ୩ଟି ବିଧା ମାରିବାରୁ ସେ ତଳେ ପଡିଯାଇଥିଲେ। ତାଙ୍କୁ ପରିବାର ଲୋକେ କ୍ୟାପିଟାଲ ହସ୍ପିଟାଲ ନେଇଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ। ଶରୀରରେ କୌଣସି କ୍ଷତ ନ ଥିବାରୁ ହୃଦ୍ଘାତରେ ମୃତ୍ୟୁ ଘଟିଥିବା ରଞ୍ଜନ ପୋଲିସକୁ କହିଥିଲେ। ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଥିଲା। ହେଲେ ଶୁକ୍ରବାର ଶବ ବ୍ୟବଚ୍ଛେଦ ରିପୋର୍ଟ ଆସିଥିଲା। ଛାତିରେ ୩ଟି ଗଭୀର ଆଘାତ ଯୋଗୁ ମୃତ୍ୟୁ ଘଟିଥିବା ରିପୋର୍ଟରେ ଉଲ୍ଲେଖ ଥିଲା। ପୋଲିସ ରଞ୍ଜନଙ୍କ ସହ ଭଉଣୀ ଓ ସ୍ତ୍ରୀଙ୍କୁ ପଚରାଉଚରା ପରେ ପ୍ରକୃତ ଘଟଣା ପଦାକୁ ଆସିଥିଲା।
