ଭଦ୍ରକ ଅଫିସ,୧୯।୧୨: ମୋବାଇଲରେ ଅନ୍ଲାଇନ ଗେମ୍ ଖେଳି ଜଣେ ଯୁବକ ତାଙ୍କ ବାପାଙ୍କ ଆକାଉଣ୍ଟ ଖାଲି କରି ଦେଇଛନ୍ତି। ଆଉ ଗାଳି ଭୟରେ ଘର ଛାଡ଼ି ପଳାଇଛନ୍ତି। ଏଭଳି ଘଟଣା ଦେଖିବାକୁ ମିଳିଛି ଭଦ୍ରକ ଜିଲା ଧାମନଗର ଥାନା ଅଧୀନ ଦେହୁଡ଼ି ଆନନ୍ଦପୁରର ହାତିବାଡ଼ି ଗଁାରେ।
ସୂଚନା ଅନୁଯାୟୀ, ଗ୍ରାମର ଖଗେଶ୍ୱର ନାୟକ(୧୯) ମୋବାଇଲରେ ଅନ୍ଲାଇନ ଗେମ୍ ଖେଳି ତାଙ୍କ ବାପା ପଦ୍ମନାଭ ନାୟକଙ୍କ ଆକାଉଣ୍ଟରୁ ୨୩, ୭୭୫ ଟଙ୍କା ହରାଇଛନ୍ତି। ପଦ୍ମନାଭଙ୍କ ବ୍ୟାଙ୍କ ଆକାଉଣ୍ଟକୁ ଫୋନ ପେ’ ସହ ଲିଙ୍କ୍ କରାଇ ସେ ଏଭଳି ଟଙ୍କା ଖର୍ଚ୍ଚ କରି ଦେଇଛନ୍ତି। ଘଟଣା ସମ୍ପର୍କରେ ଜଣାପଡ଼ିବା ପରେ ୩ ଦିନ ହେଲା ସେ କେଉଁଆଡ଼େ ଚାଲି ଯାଇଛନ୍ତି। ଏପଟେ ଚାଷବାସ କରି କଷ୍ଟ ଉପାର୍ଜିତ ଟଙ୍କା ହରାଇଥିବା ବେଳେ ଅନ୍ୟପଟେ ପୁଅର ପତ୍ତା ମିଳୁ ନ ଥିବାରୁ ମା’ ବାପା ଭାଙ୍ଗି ପଡ଼ିଛନ୍ତି।
ପୁଅର ଫଟୋ ପୋଷ୍ଟର ଧରି ସେମାନେ ଚାରିଆଡ଼େ ଘୂରି ବୁଲୁଛନ୍ତି। ବହୁ ଖୋଜାଖୋଜି କରିବା ପରେ ମଧ୍ୟ ପୁଅକୁ ପାଉ ନାହାନ୍ତି। ପରିବାର ଲୋକଙ୍କ କହିବା ଅନୁଯାୟୀ ଖଗେଶ୍ୱର ଏକ ଦୋକାନରେ ରହି କାମ କରୁଥିଲେ। ଘରେ ଜିଦ୍ ଧରିବାରୁ ଅଳ୍ପ ସଞ୍ଚୟରୁ ପଦ୍ମନାଭ ତାଙ୍କୁ ସ୍ମାର୍ଟଫୋନ୍ କିଣି ଦେଇଥିଲେ। କିଛିଦିନ ତଳେ ଏଭଳି ଗେମ୍ ଖେଳି ବାପାଙ୍କ ଆକାଉଣ୍ଟରୁ କିଛି ଟଙ୍କା ଚାଲିଯିବାରୁ ସମସ୍ତେ ତାଙ୍କୁ ତାଗିଦ୍ କରିଥିଲେ। ତଥାପି ତାଙ୍କର ଅନ୍ଲାଇନ ଗେମ୍ ନିଶା ଯାଇ ନ ଥିଲା। ସେ ଗେମ୍ ଖେଳିବା ଜାରି ରଖିଥିଲେ। ପ୍ରାୟ ମାସେ ଧରି ଏଭଳି ଗେମ୍ ଖେଳି ତାଙ୍କ ବାପାଙ୍କ ଆକାଉଣ୍ଟରୁ ଟଙ୍କା ସାରି ଦେଇଛନ୍ତି। ପଦ୍ମନାଭ ବ୍ୟାଙ୍କ ପାଶ୍ବୁକ ଅପ୍ଡେଟ କରିବାରୁ ଏହି ବିଷୟରେ ଜାଣିବାକୁ ପାଇଥିଲେ। ଏପରିକି ସାଙ୍ଗସାଥୀ ଓ ସମ୍ପର୍କୀୟଙ୍କଠାରୁ ମଧ୍ୟ ଟଙ୍କା ଆଣିଥିବା ଜଣାପଡ଼ିଛି। ଆଉ ଏତେ ଟଙ୍କା ହରାଇବା ପରେ ଖଗେଶ୍ୱର ଘରେ ମୋବାଇଲ ରଖି କେଉଁଆଡ଼େ ପଳାଇଛନ୍ତି।