କୋରାପୁଟ, ୧୨ା୧୦(ସ୍ବ.ପ୍ର.): କୋରାପୁଟ ସହରର ଗୌତମନଗରରେ ମଙ୍ଗଳବାର ଏକ ଅଭାବନୀୟ ଘଟଣା ଘଟିଛି। ମୋବାଇଲ ଖେଳ ପାଇଁ ଜଣେ ନାବାଳକଙ୍କ ଜୀବନ ଯାଇଛି। ପରିବାର ଲୋକେ ମୋବାଇଲ ନ ଦେବାରୁ ସେ ଆତ୍ମହତ୍ୟା କରିଛନ୍ତି। ସେ ହେଉଛନ୍ତି ଗୌତମନଗର ନିବାସୀ ଶ୍ରୀନିବାସ ରାଓଙ୍କ ପୁଅ ବି. ମନୋହାର (୧୩)।
ମିଳିଥିବା ସୂଚନା ମୁତାବକ, ମନୋହର ଅଷ୍ଟମ ଶ୍ରେଣୀରେ ପାଠ ପଢୁଥିଲେ। କରୋନା ଯୋଗୁ ବିଦ୍ୟାଳୟରେ ପାଠପଢା ବନ୍ଦ ଥିବାରୁ ସେ ମୋବାଇଲରେ ଅନ୍ଲାଇନ କ୍ଲାସ୍ କରୁଥିଲେ। ହେଲେ ଏହି ସମୟ ମଧ୍ୟରେ ସେ ଅଧିକାଂଶ ସମୟ ମୋବାଇଲରେ ଗେମ୍ ଖେଳୁଥିଲେ। ପରିବାର ଲୋକେ ତାଙ୍କୁ ଗେମ୍ ନ ଖେଳିବାକୁ ବୁଝାଇଥିଲେ ମଧ୍ୟ ସେ ଶୁଣୁ ନ ଥିଲେ। ମଙ୍ଗଳବାର ପରିବାର ଲୋକେ ତାଙ୍କଠାରୁ ମୋବାଇଲ ଫୋନ ଛଡାଇ ନେଇଥିଲେ। ଏଥିରେ ରାଗିଯାଇ ମନୋହର ଘରେ ଏକ ରୁମ୍ରେ ପଶି ଭିତରୁ କବାଟ ବନ୍ଦ କରି ବେକରେ ଶାଢ଼ି ବାନ୍ଧି ଫ୍ୟାନରେ ଓହଲି ପଡିଥିଲେ। ପରିବାର ଲୋକେ ବହୁ କଷ୍ଟରେ କବାଟ ଖୋଲି ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି ଚିକିତ୍ସା ପାଇଁ କୋରାପୁଟ ମେଡିକାଲକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବରପାଇ ଟାଉନଥାନା ପୋଲିସ ମେଡିକାଲଠାରେ ପହଞ୍ଚତ୍ ମୃତଦେହ ବ୍ୟବଚ୍ଛେଦ ପାଇଁ ପଠାଇଥିଲା। ଏନେଇ ଏକ ଅପମୃତ୍ୟୁ ମାମଲା(୧୦୫/୨୧) ରୁଜୁହୋଇ ତଦନ୍ତ ଜାରି ଥିବା ଏସ୍ଆଇ ସୁଦର୍ଶନ ଅଧିକାରୀ କହିଛନ୍ତି।
