ବ୍ରହ୍ମପୁର ଅଫିସ୍/ଗୋପାଳପୁର,୨୬ା୧୨:ଗୋପାଳପୁର ବେଳାଭୂମି ମହୋତ୍ସବର ଗୁରୁବାର ଦ୍ୱିତୀୟ ସନ୍ଧ୍ୟାରେ ମୁଖ୍ୟ ଆକର୍ଷଣ ସାଜିଥିଲେ ବଲିଉଡ ଗାୟିକା ସୋନା ମହାପାତ୍ର। ପ୍ରଥମେ ‘ଜିୟା…ଲାଗେ ନା….’ ଗୀତ ଗାଇ ସୋନା ଦର୍ଶକଙ୍କ ମନ ମୋହିନେଇଥିଲେ। ଏହାପରେ ‘ରସରକେଲି…’ ସମ୍ବଲପୁରୀ ଗୀତ ବୋଲି ନିଜେ ନାଚିବା ସହ ଦର୍ଶକଙ୍କୁ ମଧ୍ୟ ନଚାଇଥିଲେ। ଏହିପରି ସେ ଗୋଟିଏ ପରେ ଗୋଟିଏ ହିଟ୍ ଗୀତ ଗାଇ ଦର୍ଶକଙ୍କ ମନ ଜିଣିଥିଲେ।
ଏଥିସହ ଆସାମ ଶାସ୍ତ୍ରୀୟ ନୃତ୍ୟ, କନ୍ଧମାଳ ଆଦିବାସୀ ନୃତ୍ୟ, ନବରଙ୍ଗପୁର ଗୋଣ୍ଡୁ ନୃତ୍ୟ ସମେତ ଛତ୍ରପୁର ନୃତ୍ୟ କଳାକାରଙ୍କ ଦ୍ୱାରା ପରିବେଷିତ ହୋଇଥିଲା। ସେହିପରି ଓଡିଶୀ, ପ୍ରଗତି କଳା କେନ୍ଦ୍ରର କାଠଉ ନୃତ୍ୟ, ଆରାଧ୍ୟା ନୃତ୍ୟ ଏକାଡେମୀ ଦ୍ୱାରା ଲୋକନୃତ୍ୟ, ବେଲଗୁଣ୍ଠା ତରୁଣ କଳାକାର ସଂଘ ଦ୍ୱାରା ମଣିଷ ବାଘ, କାଞ୍ଜିଆମା ନଟରାଜ ଡ୍ୟାନ୍ସ ଗ୍ରୁପ ଦ୍ୱାରା ସମ୍ବଲପୁରୀ ନୃତ୍ୟ, ଛତ୍ରପୁର ଡ୍ରିମ ଡ୍ୟାନ୍ସ ଏକାଡେମୀ ଦ୍ୱାରା ମଡର୍ଣ୍ଣ ନୃତ୍ୟ, ବ୍ରହ୍ମପୁର ରିୟଲ ଷ୍ଟାର ଡ୍ୟାନ୍ସ ଗ୍ରୁପ ଦ୍ୱାରା ୱେଷ୍ଟର୍ଣ୍ଣ ଫ୍ରି ନୃତ୍ୟ ପରିବେଶିତ ହୋଇଥିଲା। ଦ୍ୱିତୀୟ ସନ୍ଧ୍ୟାରେ ମୁଖ୍ୟ ଅତିଥି ଭାବେ ମହିଳା ଓ ଶିଶୁ ବିକାଶ ମନ୍ତ୍ରୀ ବାସନ୍ତୀ ହେମ୍ବ୍ରମ, ଆସିକା ଏମ୍ପି ପ୍ରମିଳା ବିଶୋୟୀ ଯୋଗଦେଇଥିବା ବେଳେ ବିଇଏମ୍ସି ଡେପୁଟି ମେୟର ଇ.ବିବେକ ରେଡି, ଗୋପାଳପୁର ଏନ୍ଏସି ଅଧ୍ୟକ୍ଷ ଏ.ଜାନକୀ ରାମ ଓ ଗଞ୍ଜାମ ଜିଲାପାଳ ଦିବ୍ୟଜ୍ୟୋତି ପରିଡ଼ା ସମ୍ମାନିତ ଅତିଥି ଭାବେ ଯୋଗ ଦେଇଥିଲେ।