ବମ୍ବେ: ଅଭିନେତା ସୁଶାନ୍ତ ସିଂ ରାଜପୁତଙ୍କ ନିଧନ ପରେ ବଲିଉଡ୍ରେ ନେପୋଟିଜିମ୍ ଉପରେ ତର୍କ ବିତର୍କ ଲାଗିଛି। ଏହା ଉପରେ ବଲିଉଡ କଳାକାରମାନେ ସ୍ବର ଉଠାଉଛନ୍ତି। ଏହି କ୍ରମରେ ଗାୟକ ସୋନୁ ନିଗମ ଏକ ଭିଡିଓ ପୋଷ୍ଟ କରି ସଂଗୀତ ଜଗତ ସହ ଜଡ଼ିତ କିଛି ଲୋକଙ୍କୁ ଟାର୍ଗେଟ କରିଥିଲେ। ଏହାର ଜବାବ ରଖିଥିଲେ ଦିବ୍ୟା ଖୋସଲା। ଏବେ ଗାୟିକା ସୋନା ମହାପାତ୍ରା ମଧ୍ୟ ସୋନୁଙ୍କୁ କରିଛନ୍ତି କଟାକ୍ଷ।
ଏକ ଟୁଇଟ୍ କରିଛନ୍ତି ସୋନା। ସେ କହିଛନ୍ତି, ସୋନୁ ନିଗମ ସେହି ବ୍ୟକ୍ତି ଯିଏ ଏକଦା #ମିଟୂ ମାମଲାରେ ଅଭିଯୁକ୍ତ ଅନୁ ମଲ୍ଲିକଙ୍କୁ ସମର୍ଥନ କଥିଥିଲେ। ଆଜି ସେ ନେପୋଟିଜିମ୍ ଉପରେ ଏବଂ ସଂଗୀତ ଜଗତରେ ଥିବା ମ୍ୟୁଜିକ୍ ମାଫିଆମାନଙ୍କ ସମ୍ପର୍କରେ କଥା ହେଉଛନ୍ତି। ଏବେ ସେ ଆଉ ଏକ ଦାବି ରଖୁଛନ୍ତି। ଆଉ ତାଙ୍କ ପାଖରେ ପ୍ରମାଣ ସ୍ବରୂପ ଏକ ଭିଡିଓ ଅଛି। କ’ଣ ଆମେ ସତରେ ସଂଗୀତ ଜଗତ ଭଲ ସ୍ଥାନ ହେଉ ବୋଲି ଚାହୁଁଛେ ବୋଲି ସୋନା ପ୍ରଶ୍ନ କରିଛନ୍ତି।
କହିରଖୁଛୁ, ନିକଟରେ ନିଜ ଇନ୍ଷ୍ଟା ଆକାଉଣ୍ଟରେ ଏକ ଭିଡିଓ ଶେୟାର କରି ସୋନୁ ଟି-ସିରିଜ୍ ମୁଖ୍ୟ ଭୂଷଣ କୁମାରଙ୍କୁ ନେଇ କଟୁ ମନ୍ତବ୍ୟ ଦେଇଥିଲେ। ଅପରପକ୍ଷେ ସୋନା ଅନୁଙ୍କୁ ଇଣ୍ଡିଆନ୍ ଆଇଡଲ ଶୋ’ରୁ ବହିଷ୍କାର କରିବାକୁ ଅପିଲ କରିଥିଲେ। ସେତେବେଳେ ସୋନୁ ଅନୁଙ୍କ ସପକ୍ଷରେ କଥା କହିଥିଲେ।
