ପଣଜୀ,୩୦ ।୮: ଟିକ୍ଟକ୍ ଷ୍ଟାର ତଥା ଭାରତୀୟ ଜନତା ପାର୍ଟି(ଭାଜପା) ନେତ୍ରୀ ସୋନାଲି ଫୋଗାଟଙ୍କ ମୃତ୍ୟୁ ଓ ଡ୍ରଗ୍ସ ମାମଲାର ଯାଞ୍ଚ କରିବାକୁ ଗୋଆ ପୋଲିସର ଏକ ଟିମ ମଙ୍ଗଳବାର ହରିୟାଣା ଯିବାର କାର୍ଯ୍ୟକ୍ରମ ରହିଛି । ଗୋଆ ପୋଲିସର ୪ ଜଣିଆ ଟିମ ହରିୟାଣା ଗସ୍ତ କରିବେ । ଗୋଆ ପୋଲିସ ହରିୟାଣାରେ ସୋନାଲିଙ୍କ ଘରକୁ ଯାଇ ପରିବାର ସଦସ୍ୟଙ୍କୁ ପଚରା ଉଚରା କରିବ । ଏହି ଘଟଣାରେ ଅଭିଯୁକ୍ତ ସନ୍ଦିପ ଓ ସୁଖବିନ୍ଦରଙ୍କ ଘରକୁ ବି ଟିମ ଯିବ । ଟଙ୍କା ଓ ସମ୍ପତ୍ତି ସମ୍ପର୍କରେ ପୀଡ଼ିତ ପରିବାରରୁ ସମସ୍ତ ତଥ୍ୟ ସଂଗ୍ରହ କରିବ ପୋଲିସ । ସୋନାଲିଙ୍କ ବ୍ୟାଙ୍କ ଆକାଉଣ୍ଟ ଓ ଲେଣଦେଣର ତଥ୍ୟ ବି ଗୋଆ ପୋଲିସ ଏକାଠି କରିବ । ଇତିମଧ୍ୟରେ ହରିୟାଣା ସରକାର ଗୋଆ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ଏହି ମାମଲାର ଯାଞ୍ଚ ସିବିଆଇକୁ ଦେବାକୁ ଅପିଲ କରିଛନ୍ତି । ସୂଚନାଯୋଗ୍ୟ, ସୋନାଲିଙ୍କ ପରିବାର ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟରଙ୍କୁ ଭେଟି ସମ୍ପୂର୍ଣ୍ଣ ମାମଲାର ଯାଞ୍ଚ କେନ୍ଦ୍ରୀୟ ଯାଞ୍ଚ ବ୍ୟୁରୋ(ସିବିଆଇ)କୁ ଦେବାକୁ କହିଥିଲେ । ଏହାପରେ ହରିୟାଣା ସରକାର ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତଙ୍କୁ ଏ ସମ୍ପର୍କିତ ଏକ ପତ୍ର ପଠାଇଛନ୍ତି । ତେବେ ହରିୟାଣା ମୁଖ୍ୟମନ୍ତ୍ରୀଙ୍କୁ ଦେଇଥିବା ପତ୍ରରେ ସୋନାଲିଙ୍କ ପରିବାର ଏକ ବଡ ଅଭିଯୋଗ ଆଣି କହିଛନ୍ତି ସୋନାଲିଙ୍କ ହତ୍ୟାକାଣ୍ଡ ପଛରେ କେତେଜଣ ବଡ ବଡ ଲୋକଙ୍କ ହାତ ରହିଛି ।