ଭୁବନେଶ୍ୱର,୩୦।୪(ବ୍ୟୁରୋ): ଗୁରୁ-ଶିଷ୍ୟ ପରମ୍ପରା ସତରେ ନିଆରା। ଏହି ପରମ୍ପରାକୁ ଉଚ୍ଚକୋଟିର ଢଙ୍ଗରେ ଉପସ୍ଥାପନା କରିଥିଲେ ନୃତ୍ୟଗୁରୁ ଶାଶ୍ୱତ ଯୋଶୀ। ଏକଲବ୍ୟ କାର୍ଯ୍ୟକ୍ରମର ପ୍ରଥମ ଉପସ୍ଥାପନାରେ ଦେଖିବାକୁ ମିଳିଥିଲା ଏକ ନୂତନ ନୃତ୍ୟ ପରମ୍ପରା। ପ୍ରଥମଥର ପାଇଁ ଜଣେ କାହାଣୀ କହୁଥିବା ବେଳେ ଜଣେ ଓଡ଼ିଶୀ ନୃତ୍ୟ ମାଧ୍ୟମରେ ନିଜ ଅଙ୍ଗଭଙ୍ଗୀର ପ୍ରଦର୍ଶନରେ ଆକର୍ଷିତ କରୁଥିଲେ ଉପସ୍ଥିତ ଦର୍ଶକଙ୍କୁ। ଷ୍ଟୋରି ଟେଲର ପ୍ରାଚୀ ତାରା ନିଜର ଶବ୍ଦ ଦ୍ୱାରା ଭାବମୟ ପରିବେଶ ସୃଷ୍ଟି କରିଥିବା ବେଳେ ନୃତ୍ୟଗୁରୁ ଯୋଶୀ ସେହି ଭାବକୁ ନୃତ୍ୟ ମାଧ୍ୟମରେ ପରିବେଷଣ କରିଥିଲେ। ମହାଭାରତର ଏକଲବ୍ୟ ଓ ଗୁରୁ ଦ୍ରୋଣାଚାର୍ଯ୍ୟଙ୍କୁ ନେଇ ପରିବେଷିତ ହୋଇଥିଲା ସାର ପ୍ରଥମ କାର୍ଯ୍ୟକ୍ରମ। ବିଶ୍ୱ ନୃତ୍ୟ ଦିବସ ଓ ଆଜାଦୀ କା ଅମୃତ୍ ମହୋତ୍ସବ ଉପଲକ୍ଷେ ଲାସ୍ୟକଳା ଡ୍ୟାନ୍ସ ଭିଜନ ପକ୍ଷରୁ ଶୁକ୍ରବାର ଗୁରୁଶିଷ୍ୟର ପରମ୍ପରାକୁ ନେଇ ‘ଏକଲବ୍ୟ’ କାର୍ଯ୍ୟକ୍ରମ ସୂଚନାଭବନଠାରେ ଅନୁଷ୍ଠିତ ହୋଇଯାଇଛି। ଅତିଥି ଭାବେ ପଦ୍ମଶ୍ରୀ ଡ. ଇଲିଆନା ଚିତାରିଷ୍ଟ, ପଦ୍ମଶ୍ରୀ ଶ୍ୟାମାମଣି ଦେବୀ, ନୃତ୍ୟଗୁରୁ ଶରତ ଦାସ ଓ ସୁହାଗ ନଳିନୀ ଦାସ ଯୋଗଦେଇଥିଲେ। କାର୍ଯ୍ୟକ୍ରମ ଅବକାଶରେ ଓଡ଼ିଶୀରେ ଖ୍ୟାତିଲାଭ କରିଥିବା ସୋନାଲିକା ପୁରୋହିତ ଓ ଶ୍ରୀନିକା ପୁରୋହିତଙ୍କୁ ଏକଲବ୍ୟ ସମ୍ମାନରେ ସମ୍ମାନିତ କରାଯାଇଥିଲା। ପରେ ଶ୍ରେୟାନଭି ଯୋଶୀ ଓ ସାଇ ପ୍ରସାଦ ପଣ୍ଡା ଶ୍ରୀମନ୍ଦିରର କଥାବସ୍ତୁକୁ ନେଇ ଓଡ଼ିଶୀ ପରିବେଷଣ କରିଥିଲେ। ସେହିପରି ସୋନାଲିକା ଓ ଶ୍ରୀନିକା ଶ୍ରୀକୃଷ୍ଣଙ୍କ ଶ୍ଳୋକ, ଭକ୍ତିକୁ ନେଇ ମଧୁରାଷ୍ଟକମ୍ ଏବଂ ମେଘ ପଲ୍ଲବୀ ପରିବେଷଣ କରିଥିଲେ। ଅନୁଷ୍ଠାନର ସଦସ୍ୟା ସାଗରିକା ମହାନ୍ତି ଓ ଶିଷ୍ୟା ସୋନାଲ ଆଚାର୍ଯ୍ୟ ଓଡ଼ିଶୀ ସଙ୍ଗୀତର ଈଶ୍ୱର ଚନ୍ଦ୍ର ନନ୍ଦ ଚମ୍ପୂ ଉପସ୍ଥାପନା କରିଥିଲେ। ଚିନ୍ମୟୀ ମାଲ୍ଲିଆ ଓ ତୃପ୍ତିତା ପଟ୍ଟନାୟକଙ୍କ ଓଡ଼ିଆ ଅଭିନୟ ମଧୁରବଚନ ଦର୍ଶକଙ୍କ ମନକୁ ଛୁଇଁଥିଲା। ରାଗ ମେଘ ମହ୍ଲାର ଓ ମିଆଁ ମହ୍ଲାରକୁ ନେଇ ‘ବର୍ଷା’ରେ ଉଭୟ ଚମତ୍କାର ପ୍ରଦର୍ଶନ କରିଥିଲେ। ଏହି କାର୍ଯ୍ୟକ୍ରମରେ ରାଜେଶ କୁମାର ଲେଙ୍କା ସ୍ବର, ତାରିଣୀ ପ୍ରସାଦ ଦାସ ପଖୌଜ, ପ୍ରଦୀପ କୁମାର ମହାରଣା ଭାଓଲିନ୍ ଓ ରୁଦ୍ର ପ୍ରସାଦ ପରିଡ଼ା ବଂଶୀରେ ସହଯୋଗ କରିଥିଲେ।
