ନୂଆଦିଲ୍ଲୀ,୮ ।୧୧: ସରିଛି ବିହାର ବିଧାନସଭା ନିର୍ବାଚନ । ଏବେ ଏକ୍ଜିଟ୍ ପୋଲ୍ର ଫଳାଫଳକୁ ଦେଖିଲେ ମହାମେଣ୍ଟ ସମସ୍ତଙ୍କ ଉପରେ ଭାରି ପଡିବ ବୋଲି କୁହାଯାଉଛି । ଆଉ ଏହି ମହାମେଣ୍ଟର ଅଂଶ ହେଉଛି କଂଗ୍ରେସ । ତେଣୁ ଏକ୍ଜିଟ୍ ପୋଲ୍କୁ ଦେଖି ଏବେ କଂଗ୍ରେସ ତତ୍ପର ହୋଇ ପଡିଥିବା ଦେଖାଯାଇଛି । ଇତିମଧ୍ୟରେ ହାଇ କମାଣ୍ଡର କଂଗ୍ରେସ ନେତା ରଣଦୀପ ସୁରଜେୱାଲା ଓ ଅବିନାଶ ପାଣ୍ଡେଙ୍କୁ ଗୁରୁ ଦାୟିତ୍ୱ ଦେଇଛନ୍ତି । ୧୦ ନଭେମ୍ବରରେ ବିହାର ବିଧାନସଭା ନିର୍ବାଚନର ଫଳାଫଳ ଆସିବାକୁ ଥିବା ବେଳେ ଏହା ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ପାଇଁ ଏକ ଚ୍ୟାଲେଞ୍ଜ ହେବ ବୋଲି କୁହାଯାଉଛି । କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଇତିମଧ୍ୟରେ ରଣଦୀପ ସୁରଜେୱାଲା ଓ ଅବିନାଶ ପାଣ୍ଡେଙ୍କୁ ବିହାରର ପର୍ଯ୍ୟବେକ୍ଷକ ଭାବେ ନିଯୁକ୍ତ କରିଛନ୍ତି । ଏହି ଦୁଇ ନେତା ରବିବାର ପାଟନା ପହଞ୍ଚିବାର କାର୍ଯ୍ୟକ୍ରମ ରହିଛି । ବିହାର ନିର୍ବାଚନ ଫଳାଫଳ ପରେ ସେଠାକାର ସ୍ଥିତିକୁ ନେଇ ଏମାନେ କେନ୍ଦ୍ରୀୟ ନେତୃବୃନ୍ଦଙ୍କ ସହ କଥା ହେବେ ଓ ଯାହା ନିଷ୍ପତ୍ତି ନିଆଯିବ ତାହାହିଁ ଚୁଡାନ୍ତ ବୋଲି କୁହାଯାଉଛି । ସୂଚନାଯୋଗ୍ୟ, ବିହାର ବିଧାନସଭା ପାଇଁ ଶନିବାର ତୃତୀୟ ତଥା ଅନ୍ତିମ ପର୍ଯ୍ୟାୟ ଭୋଟ ଗ୍ରହଣ ପରେ କିଛି ଏଜେନ୍ସି ନିଜ ନିଜ ଏକ୍ଜିଟ୍ ପୋଲ୍ ପରିଣାମ ଘୋଷଣା କରିଛନ୍ତି । ଏଥିରେ ଏନ୍ଡିଏଠାରୁ ମହାମେଣ୍ଟ ଆଗରେ ରହିବ ବୋଲି ଦର୍ଶାଯାଇଛି । ଆହୁରି ମଧ୍ୟ ସମସ୍ତ ଏକ୍ଜିଟ୍ ପୋଲ୍ରେ ରାଷ୍ଟ୍ରୀୟ ଜନତା ଦଳ(ଆର୍ଜେଡି)କୁ ସବୁଠାରୁ ବଡ ଦଳ ଭାବେ ଉଭା ହେବ ବୋଲି ଅନୁମାନ କରାଯାଇଛି ।
