ଅହମ୍ମଦାବାଦ,୧୩।୯: ଆମ ଆଦମୀ ପାର୍ଟି (ଏଏପି) ସୁପ୍ରିମୋ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ମଙ୍ଗଳବାର ଭାଜପାକୁ ଟାର୍ଗେଟ କରିଛନ୍ତି। ଆଗାମୀ ଗୁଜରାଟ ବିଧାନସଭା ନିର୍ବାଚନରେ ଏଏପି ମେଧା ପାଟେକରଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରିବ ବୋଲି ଭାଜପା ପକ୍ଷରୁ କରାଯାଇଥିବା ଆକଳନ ଉପରେ କେଜ୍ରିଓ୍ବାଲ କହିଛନ୍ତି, ମୋଦିଙ୍କ ପରେ ସୋନିଆ ଗାନ୍ଧୀ ଭାଜପାର ପ୍ରଧାନମନ୍ତ୍ରୀ ପ୍ରାର୍ଥୀ ହେବାକୁ ଯାଉଛନ୍ତି।
ଗୁଜରାଟରେ କେଜ୍ରିଓ୍ବାଲଙ୍କୁ ଜଣେ ଖବରଦାତା ପ୍ରଶ୍ନ କରିଥିଲେ ଯେ, ଭାଜପା ନେତାମାନେ କହୁଛନ୍ତି ଗୁଜରାଟରେ ନର୍ମଦା ଆନ୍ଦେଳନର ଚେହେରା ଥିବା ମେଧା ପାଟେକରଙ୍କୁ ଏଏପି ମୁଖ୍ୟମନ୍ତ୍ରୀ ପ୍ରାର୍ଥୀ କରିବ ଏନେଇ ଆପଣଙ୍କ ମତ କ’ଣ। ଏହାର ଜବାବରେ କେଜ୍ରିଓ୍ବାଲ୍ ସମ୍ପୃକ୍ତ ଖବରଦାତାଙ୍କୁ କହିଛନ୍ତି, ମୁଁ ଶୁଣିଛି ମୋଦି ଜୀଙ୍କ ପରେ ଭାଜପା ସୋନିଆ ଗାନ୍ଧୀଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ କରୁଛି। ଏ ବିଷୟରେ ତାଙ୍କୁ ପଚାରିବ ସେ କ’ଣ କହିବେ? ମୁଁ ଜାଣିଛି ତୁମକୁ ଡର ଲାଗିବ, କିନ୍ତୁ ସାହସର ସହ ପଚାରିବ। ଏ ବିଷୟରେ ସେମାନେ କ’ଣ କହିବେ ମୁଁ ତାହା ଜାଣିବାକୁ ଚାହୁଁଛି। ଭାଜପା ଜାଣିସାରିଛି ଆଗାମୀ ନିର୍ବାଚନରେ ତାଙ୍କ ପରାଜୟ ସୁନିଶ୍ଚିତ। ତେଣୁ ସେମାନେ ଏଭଳି ମନ୍ତବ୍ୟ ସବୁ ଦେଉଛନ୍ତି। ରାଜ୍ୟରେ ୨୭ ବର୍ଷ ମଧ୍ୟରେ ଭାଜପା କିଛି କରିନାହିଁ। ଏଏପି ଗୁଜରାଟର ସମସ୍ତ ଆସନରେ ଲଢିବାକୁ ଯାଉଛି ବୋଲି କେଜ୍ରିଓ୍ବାଲ କହିଛନ୍ତି।
