ନୂଆଦିଲ୍ଲୀ,୨୭ ।୧୦: ଏବେ ବିହାର ବିଧାନସଭା ନିର୍ବାଚନ ଉପରେ ସାରା ଦେଶର ନଜର । ଗୋଟିଏ ଦିନ ପରେ ଅର୍ଥାତ୍ ୨୮ ଅକ୍ଟୋବରରେ ଏଠାରେ ଅନୁଷ୍ଠିତ ହେବାକୁ ଯାଉଛି ପ୍ରଥମ ପର୍ଯ୍ୟାୟ ନିର୍ବାଚନ । ଆଉ ତା’ ପୂର୍ବରୁ ମହାମେଣ୍ଟରେ ଲଢୁଥିବା କଂଗ୍ରେସ ପକ୍ଷରୁ ରାହୁଲ ଗାନ୍ଧୀ ସେଠାରେ ରାଲି କରି ଭୋଟରଙ୍କୁ ନିଜ ଆଡକୁ ଆକର୍ଷିତ କରିବାକୁ ଚେଷ୍ଟା କରିଥିବା ବେଳେ ଏବେ ଦଳର ଅସ୍ଥାୟୀ ଅଧ୍ୟକ୍ଷା ସୋନିଆ ଗାନ୍ଧୀ ମଙ୍ଗଳବାର ବିହାରବାସୀଙ୍କ ଉଦ୍ଦେଶ୍ୟରେ ଏକ ଭିଡିଓ ବାର୍ତ୍ତା ଦେଇଛନ୍ତି । ଏଥିରେ ସେ କେନ୍ଦ୍ରର ମୋଦି ସରକାର ଓ ବିହାରର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି ସରକାର ଏବେ ଦିଲ୍ଲୀ ଓ ବିହାର ଭିତରେ ବନ୍ଦୀ ହୋଇ ଯାଇଛନ୍ତି । କିନ୍ତୁ ଏବେ ପରିବର୍ତ୍ତନର ସମୟ ଆସିଛି । ସେ କହିଛନ୍ତି ଏପର୍ଯ୍ୟନ୍ତ ରାଜ୍ୟକୁ ଶାସନ କରୁଥିବା ସରକାରଙ୍କ ନାଁ କାମ ଠିକ୍ ଅଛି ନା କଥା ଠିକ୍ ଅଛି । ଶ୍ରମିକ ଆଜି ହତାସ, କୃଷକ ଆଜି ଚିନ୍ତିତ, ଯୁବବର୍ଗ ଆଜି ନିରାଶ । ଅର୍ଥବ୍ୟବସ୍ଥାର ଗମ୍ଭିର ପରିସ୍ଥିତି ଏବେ ଲୋକଙ୍କ ଉପରେ ପ୍ରଭାବ ଦେଖାଉଛି । ଦଳିତ ଓ ମହଳାଙ୍କ କଥାତ ନ କହିବା ଭଲ । ତେଣୁ ଏଥର ବିହାରବାସୀ ନିଶ୍ଚିତ ନୂତନ ବିହାର ଗଠନ କରିବାକୁ ଆଗେଇ ଆସିବେ ବୋଲି ସୋନିଆ ତାଙ୍କ ବାର୍ତ୍ତାରେ କହିଛନ୍ତି । ଏବେ ବିହାର ଜନତାଙ୍କ ସ୍ୱର କଂଗ୍ରେସ ମହାମେଣ୍ଟ ସହ ରହିଛି ତେଣୁ ଏଥର ବିହାରରେ ପରିବର୍ତ୍ତନ ନିଶ୍ଚିତ ଭାବେ ହେବ ।