ନୂଆଦିଲ୍ଲୀ,୬।୨: ୨୦୨୩ ବଜେଟକୁ ସମାଲୋଚନା କରି ପୂର୍ବତନ କଂଗ୍ରେସ ସଭାପତି ସୋନିଆ ଗାନ୍ଧୀ ଏହାକୁ ଗରିବ ବିରୋଧୀ ବୋଲି କହିଛନ୍ତି। ସୋନିଆ ଗାନ୍ଧୀ କହିଛନ୍ତି, ମୋଦି ସରକାର ୟୁପିଏ ସମୟରେ କରାଯାଇଥିବା ସାମାଜିକ ଯୋଜନାର ଖର୍ଚ୍ଚ ହ୍ରାସ କରିଛନ୍ତି। ଗରିବ ଏବଂ ମଧ୍ୟବିତ୍ତ ଶ୍ରେଣୀର ମୂଲ୍ୟରେ ତାଙ୍କ ବନ୍ଧୁମାନଙ୍କୁ ଉପକୃତ କରିବା ପାଇଁ ପ୍ରଧାନମନ୍ତ୍ରୀଙ୍କ ନୀତି ଦେଶକୁ ବିନାଶ ଆଡକୁ ନେଉଛି। ବଜେଟରେ ଗରିବଙ୍କ ପାଇଁ ଆବଣ୍ଟନ ହ୍ରାସ କରି ସେମାନଙ୍କ ସ୍ଥିତିକୁ ସରକାର ଆହୁରି ବିଗାଡି ଦେଇଛନ୍ତି। ମୋଦି ସରକାରଙ୍କ ଗରିବଙ୍କ ଉପରେ ଏହା ଏକ ‘ସାଇଲେଣ୍ଟ୍ ଷ୍ଟ୍ରାଇକ୍’ ବୋଲି କହିଛନ୍ତି। ସ୍ବାଧୀନତାର ପ୍ରତିଶୃତି କେବଳ ଲୋକଙ୍କ ମୌଳିକ ଆବଶ୍ୟକତା ପୂରଣ କରିବା ନୁହେଁ ବରଂ ପ୍ରତ୍ୟେକ ଭାରତୀୟଙ୍କୁ ଭଲ ଜୀବନ ଦେବା।
ଆଦାନୀ ମାମଲାକୁ ସୂଚାଇ ସୋନିଆ କହିଛନ୍ତି, ସାଧାରଣ ଲୋକଙ୍କ ଜମା ବିପଦରେ ଅଛି କାରଣ ସରକାର ଏଲଆଇସି ଏବଂ ଏସବିଆଇ ଭଳି ବିଶ୍ୱସ୍ତ ସରକାରୀ ଅନୁଷ୍ଠାନ ଉପରେ ପ୍ରଧାନମନ୍ତ୍ରୀଙ୍କ ସାଙ୍ଗମାନଙ୍କ ସହ ନିବେଶ କରିବାକୁ ଚାପ ପକାଉଛନ୍ତି। ଗୋଟିଏ ପଟେ ପ୍ରଧାନମନ୍ତ୍ରୀ ଏବଂ ତାଙ୍କ ମନ୍ତ୍ରୀମାନେ ଅମୃତ କାଳ ଏବଂ ବିଶ୍ୱଗୁରୁଙ୍କ ସ୍ଲୋଗାନ ଦେଉଛନ୍ତି, ଅନ୍ୟ ପଟେ ପ୍ରଧାନମନ୍ତ୍ରୀଙ୍କ ପ୍ରିୟ ଶିଳ୍ପପତିଙ୍କ ସହ ଜଡିତ ଆର୍ଥିକ ଘୋଟାଲା ପ୍ରଘଟ ହେବାରେ ଲାଗିଛି।