ଆଜି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ୭୪ ବର୍ଷରେ ପାଦ ଦେଇଛନ୍ତି। ସେ ହେଉଛନ୍ତି ଭାରତୀୟ ରାଜନୀତିର ସବୁଠାରୁ ସଫଳ ବୋହୂ। ଆଜି ମଧ୍ୟ କଂଗ୍ରେସ ଯେତେବେଳେ ଖରାପ ସମୟ ଦେଇ ଗତି କରେ ସେତେବେଳେ ଦଳୀୟ କର୍ମୀମାନେ କେବଳ ସୋନିଆଙ୍କ ନିଷ୍ପତ୍ତିକୁ ଚାହିଁ ରହିଥାନ୍ତି। ସୋନିଆ ଭାରତ ଆସି ଦେଶର ସବୁଠାରୁ ଶକ୍ତିଶାଳୀ ମହିଳା ହୋଇପାରିଛନ୍ତି। ତେବେ ଆଜିର ଏହି ଖାସ୍ ଦିନରେ ସୋନିଆଙ୍କ ସହ ଜଡ଼ିତ କିଛି ରୋଚକ କାହାଣୀ ସମ୍ପର୍କରେ ଜାଣନ୍ତୁ…
ଇଟାଲୀରେ ରହୁଥିବା ସୋନିଆ ପ୍ରଥମେ କେମ୍ବ୍ରିଜ ବିଶ୍ୱବିଦ୍ୟାଳୟରେ ରାଜୀବ ଗାନ୍ଧୀଙ୍କୁ ଭେଟିଥିଲେ। ପ୍ରଥମ ଦେଖାରେ ହିଁ ସେ ରାଜୀବଙ୍କ ପ୍ରେମରେ ପଡ଼ିଯାଇଥିଲେ। ରାଜୀବ ଇଂରାଜୀ ଶିଖିବା ପାଇଁ ସେଠାକୁ ଯାଇଥିଲେ। ସୋନିଆଙ୍କୁ ଜଣା ନ ଥିଲା ରାଜୀବ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ପୁଅ ବୋଲି। ଯେହେତୁ ସୋନିଆଙ୍କର ରାଜନୀତି ପ୍ରତି ଘୃଣା ମନୋଭାବ ଥିଲା ରାଜୀବ ମଧ୍ୟ ସୋନିଆଙ୍କୁ ଦୀର୍ଘଦିନ ପର୍ଯ୍ୟନ୍ତ ଏହି କଥା ଲୁଚାଇ ରଖିଥିଲେ। ପ୍ରେମ ସମ୍ପର୍କ ଆଗକୁ ବଢ଼ିବା ପରେ ସୋନିଆ ପ୍ରଥମଥର ପାଇଁ ଇନ୍ଦିରାଙ୍କୁ ଭେଟିଥିଲେ। ଯେତେବେଳେ ସେ ଇନ୍ଦିରାଙ୍କୁ ଭେଟିଥିଲେ ସେତେବେଳେ ସୋନିଆ ଛାନିଆରେ ଗୋଟାପଣ ଥରିଥିଲେ। କାରଣ ସୋନିଆ ପ୍ରଥମଥର ପାଇଁ ଏହିଦିନ ଶାଢ଼ି ପିନ୍ଧିଥିଲେ।
୧୯୬୮ରେ ସୋନିଆ ରାଜୀବଙ୍କୁ ବିବାହ କରିଥିଲେ। ସୋନିଆ ଚାହୁଁ ନ ଥିଲେ ରାଜୀବ ରାଜନୀତି କରନ୍ତୁ ବୋଲି। କିନ୍ତୁ ଇନ୍ଦିରାଙ୍କ ମୃତ୍ୟୁ ପରେ ଦେଶର କାର୍ଯ୍ୟଭାର ସମ୍ଭାଳିଥିଲେ ରାଜୀବ। ସୋନିଆ କିନ୍ତୁ ଏଥିରେ ଖୁସି ନ ଥିଲେ। କାରଣ ସେ ଚାହୁଁ ନ ଥିଲେ ଶାଶୁଙ୍କ ପରି ତାଙ୍କ ସ୍ବାମୀଙ୍କ ଜୀବନ ଯାଉ ବୋଲି। ମାତ୍ର ସୋନିଆ ଯାହାକୁ ଡରୁଥିଲେ ଶେଷରେ ସେଇୟା ହିଁ ହୋଇଥିଲା। ରାଜୀବଙ୍କୁ ମଧ୍ୟ ଗୁଳି କରି ହତ୍ୟା କରିଥିଲେ ଆତଙ୍କବାଦୀ।
