ନୂଆଦିଲ୍ଲୀ, ୫ା୫ : ସ୍ବାସ୍ଥ୍ୟଗତ କାରଣରୁ ନିର୍ବାଚନ ପ୍ରଚାରରୁ ଦୂରେଇ ରହିଥିବା ପୂର୍ବତନ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଶନିବାର କର୍ନାଟକର ହୁବ୍ବଲିରେ ଏକ ସାଧାରଣ ସଭାରେ ଉଦ୍ବୋଧନ ଦେବେ। କର୍ନାଟକରେ ଏହା ସୋନିଆଙ୍କ ପ୍ରଥମ ନିର୍ବାଚନୀ ସଭା ହେବ। ୧୦ରେ ଭୋଟ ଗ୍ରହଣ ହେବାକୁ ଥିବା ଏହି ଦକ୍ଷିଣ ଭାରତୀୟ ରାଜ୍ୟରେ କଂଗ୍ରେସ ନେତା ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଭଦ୍ରା ଜୋର୍ଦାର ପ୍ରଚାର ଚଳାଇଛନ୍ତି। ଗତବର୍ଷ ଅକ୍ଟୋବର ୬ରେ ସୋନିଆ କର୍ନାଟକର ମାଣ୍ଡ୍ୟାରେ ଭାରତ ଯୋଡ଼ୋ ଯାତ୍ରାରେ ସାମିଲ ହୋଇ ରାହୁଲଙ୍କ ସହ ପଦଯାତ୍ରାରେ ଯାଇଥିଲେ। ଗତବର୍ଷ ଜୁନ୍ରେ ସୋନିଆ କୋଭିଡ୍ ସଂକ୍ରମିତ ହୋଇଥିବାବେଳେ ଗତ ମାର୍ଚ୍ଚ ୨ରେ ଜ୍ୱର କାରଣରୁ ସାର୍ ଗଙ୍ଗାରାମ ହସ୍ପିଟାଲରେ ଭର୍ତ୍ତି ହୋଇଥିଲେ। ସ୍ବାସ୍ଥ୍ୟଗତ କାରଣରୁ ସେ କିଛିଦିନ ହେଲା ସାଧାରଣ ଜନତାଙ୍କଠାରୁ ଦୂରେଇ ରହିଥିଲେ। ତେବେ କର୍ନାଟକରେ କ୍ଷମତାକୁ ଆସିଲେ ବର୍ଷକ ମଧ୍ୟରେ ଭାଜପା ସରକାର ଗୃହୀତ କରାଇଥିବା ସମସ୍ତ ଅନୈତିକ ଓ ଜନବିରୋଧୀ ଆଇନକୁ ରଦ୍ଦ କରିବ ବୋଲି କଂଗ୍ରେସ ଏହାର ଇସ୍ତାହାରରେ ପ୍ରତିଶ୍ରୁତି ଦେଇଛି।