ମୁମ୍ବାଇ: କନ୍ନଡ ସୁପରଷ୍ଟାର କିଚ୍ଚା ସୁଦିପ ଏବେ ଖୁବ୍ ଚର୍ଚ୍ଚାରେ । ହିନ୍ଦୀ ରାଷ୍ଟ୍ରୀୟ ଭାଷାକୁ ନେଇ ସେ ଦେଇଥିବା ବିବାଦୀୟ ବୟାନ ମଧ୍ୟରେ ଏବେ ସାଉଥ ଓ ନର୍ଥ ଫିଲ୍ମ ଇଣ୍ଡଷ୍ଟ୍ରିରେ ହଇଚଇ ସୃଷ୍ଟି ହୋଇଛି । କିଚ୍ଚା ସୁଦିପ ହିନ୍ଦୀକୁ ରାଷ୍ଟ୍ରୀୟ ଭାଷା ନ ମାନିବାରୁ ଏବେ ଫିଲ୍ମ ଇଣ୍ଡଷ୍ଟ୍ରି ଦୁଇ ଭାଗ ହୋଇଯାଇଛି । ତେବେ ଏହି ବୟାନକୁ ନେଇ ଯେତେବେଳେ ବଲିଉଡ ଷ୍ଟାର ଅଜୟ ଦେବଗନ ରିଆକ୍ଟ କଲେ ସେତେବେଳେ ଏହା ଖୁବ୍ ଚର୍ଚ୍ଚାକୁ ଚାଲି ଆସିଛି । ବୁଧବାର ଏହି ଦୁଇ ଅଭିନେତାଙ୍କ ମଧ୍ୟରେ ହୋଇଥିବା ଟୁଇଟର ୱାର ପରେ ଏବେ ବଲିଉଡ ଅଭିନେତା ସୋନୁ ସୁଦ ମୁହଁ ଖୋଲିଛନ୍ତି ।
ସୋନୁ ସୁଦ ବଲିଉଡ ସହ ସାଉଥ୍ ଇଣ୍ଡିଆନ ଫିଲ୍ମରେ ବି ଖୁବ୍ ଆକ୍ଟିଭ । ଗତ କିଛି ବର୍ଷ ହେବ ସେ ସାଉଥ୍ ଇଣ୍ଡଷ୍ଟ୍ରିରେ କାମ କରୁଛନ୍ତି । ହିନ୍ଦୀ ଭାଷା ବିବାଦକୁ ନେଇ ସୋନୁ ଇଣ୍ଡିଆନ୍ ଏକ୍ସପ୍ରେସ ସହ କଥା ହେବା ସମୟରେ ଏକ ହୃଦୟ ଜିତିବା ଭଳି ବୟାନ ଦେଇଛନ୍ତି । ସେ କହିଛନ୍ତି ଭାରତର ଗୋଟିଏ ଭାଷା, ତାହା ହେଉଛି ଏଣ୍ଟରଟେନମେଣ୍ଟ । ଫରକ ପଡେନି ଯେ ଆପଣ କେଉଁ ଇଣ୍ଡଷ୍ଟ୍ରିର । ଯଦି ଆପଣ ଦର୍ଶକଙ୍କୁ ଏଣ୍ଟରଟେନ୍ କରୁଛନ୍ତି ତେବେ ସେମାନେ ଆପଣଙ୍କୁ ଭଲ ପାଇବେ, ଆପଣଙ୍କର ସମ୍ମାନ କରିବେ ଓ ଆପଣଙ୍କୁ ସ୍ୱୀକାର କରିବେ । ଏହାସହ ସେ ସାଉଥ୍ ଫିଲ୍ମର ସକସେସକୁ ନେଇ ବି କଥା ହୋଇଥିଲେ ।
ସେ କହିଛନ୍ତି ସାଉଥ୍ ଫିଲ୍ମର ସଫଳତା ହିନ୍ଦୀ ମୁଭି ନିର୍ମାଣର ଶୈଳିକୁ ବଦଳାଇ ଦେବ । ଏହାସହ ସାନୁ ସୁଦ କହିଛନ୍ତି ଏବେ ଫିଲ୍ମ ମେକର୍ସଙ୍କୁ ଦର୍ଶକଙ୍କ ସେନ୍ସିବିଲିକୁ ବୁଝିବା ଦରକାର । ସେ ଦିନ ଚାଲିଯାଇଛି ଯେତେବେଳେ ଲୋକେ କହୁଥିଲେ ନିଜ ଦିମାଗ ଛାଡି ମୁଭି ଦେଖିବାକୁ ଯାଆନ୍ତୁ । ଏବେ ଲୋକେ ତାଙ୍କ ଦିମାଗ ପଛରେ ଛାଡୁ ନାହାନ୍ତି, ଆଉ ଏକ ଆଭରେଜ ଫିଲ୍ମ ଉପରେ ନିଜର ହଜାର ହଜାର ଟଙ୍କା ଖର୍ଚ୍ଚ କରୁ ନାହାନ୍ତି । ଭଲ ସିନେମାକୁ ସ୍ୱୀକାର କରାଯାଉଛି । ସୋନୁ ସୁଦ ଖୁବଶୀଘ୍ର ଏକ ତେଲଗୁ ମୁଭି ‘ଆଚାର୍ଯ୍ୟ’ରେ ନଜର ଆସିବେ । ଏହାସହ ସେ ତାମିଲ ଫିଲ୍ମ ‘ଥାମିଲାରସନ’ରେ ନଜର ଆସିବେ ।