ଚଣ୍ଡିଗଡ଼,୨୨।୨: ସବୁବେଳେ ମହତ୍ କାର୍ଯ୍ୟ କରି ଚର୍ଚ୍ଚାରେ ରହୁଥିବା ବଲିଉଡ୍ ଅଭିନେତା ସୋନୁ ସୁଦ ଏବେ ରାଜନୈତିକ ପ୍ରସଙ୍ଗକୁ ନେଇ ଚର୍ଚ୍ଚାର ପରିସରକୁ ଆସିଛନ୍ତି। ତାଙ୍କ ବିରୋଧରେ ପଞ୍ଜାବର ମୋଗାରେ ଏକ ମାମଲା ରୁଜୁ ହୋଇଛି। ସୋନୁ ସୁଦ ତାଙ୍କ ଭଉଣୀ ମାଲଭିକା ସୁଦଙ୍କ ସପକ୍ଷରେ ଭୋଟରଙ୍କୁ ପ୍ରବର୍ତ୍ତାଇଥିବା ଅଭିଯୋଗରେ ଏହି ମାମଲା ରୁଜୁ ହୋଇଛି। ସୂଚନାଯୋଗ୍ୟ, ଅଭିନେତା ସୋନୁ ସୁଦଙ୍କ ଭଉଣୀ ମାଲଭିକା ସୁଦ ମୋଗା ବିଧାନସଭା ନିର୍ବାଚନମଣ୍ଡଳୀରୁ କଂଗ୍ରେସର ପ୍ରାର୍ଥୀ ରହିଛନ୍ତି। ଏଥିପାଇଁ ସୋନୁ ପ୍ରାୟ ୧ମାସ ଧରି ଉକ୍ତ ବିଧାନସଭା ନିର୍ବାଚନମଣ୍ଡଳୀରେ ଅଛନ୍ତି। କାଳେ ସୋନୁ ଭୋଟରଙ୍କୁ ପ୍ରବର୍ତ୍ତାଇ ନିଜ ଭଉଣୀଙ୍କ ସପକ୍ଷରେ ଭୋଟ ହାତେଇନେବେ ସେହି ଭୟରେ ଅନ୍ୟ ରାଜନୈତିକ ଦଳର ନଜର ନେଇ ତାଙ୍କ ଉପରେ ରହିଥିଲା। ଏହିକ୍ରମରେ ଯେତେବେଳେ ସୋନୁ ମୋଗା ଗାଁର ଲଣ୍ଢେକେ ଗାଁରେ ବୁଥ୍ ନମ୍ବର ୨୦୫ରେ ପହଞ୍ଚିଲେ, ସେତେେବେଳେ ସେଠାରେ ଉପସ୍ଥିତ ଥିବା ଲୋକମାନେ ତାଙ୍କ ସହ ସେଲ୍ଫି ନେବାକୁ ଆରମ୍ଭ କରିଥିଲେ। ତାଙ୍କ ବିରୋଧରେ ଆଚରଣ ବିଧି ଉଲ୍ଲଂଘନ ଏବଂ ମତଦାନ କେନ୍ଦ୍ରରେ ଭୋଟରଙ୍କୁ ପ୍ରବର୍ତ୍ତାଇବାକୁ ଉଦ୍ୟମ କରିଥିବା ନେଇ ନିର୍ବାଚନ ପର୍ଯ୍ୟବେକ୍ଷକଙ୍କ ନିକଟରେ ଶିରୋମଣିି ଅକାଲୀ ଦଳର ସମର୍ଥକମାନେ ଅଭିଯୋଗ କରିଥିଲେ। ଅଭିଯୋଗକୁ ଆଧାର କରି ମୋଗା ଥାନାରେ ତାଙ୍କ ବିରୋଧରେ ଏକ ମାମଲା ରୁଜୁ ହୋଇଛି। ଏହାପୂର୍ବରୁ ଫେବୃଆରୀ ୨୦ରେ ଏହି ସମାନ ପ୍ରସଙ୍ଗରେ ସୋନୁଙ୍କ ଗାଡ଼ିକୁ ଜବତ କରାଯାଇଥିଲା। ବର୍ତ୍ତମାନ ତାଙ୍କ ଗାଡ଼ି ସହରର ଥାନା ସିଟି ୧ରେ ରଖାଯାଇଛି।