ଭୁବନେଶ୍ୱର,୨୪ା୧୧: ରାଜ୍ୟର ଯୁବପିଢ଼ିଙ୍କ ମଧ୍ୟରେ ଜଳବାୟୁ ପରିବର୍ତ୍ତନ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ସଚେତନତା କରିବା ପାଇଁ ଶୁକ୍ରବାର ରେଳ ଅଡିଟୋରିୟମ୍ଠାରେ ‘ଧରିତ୍ରୀ’ ପକ୍ଷରୁ ‘ୟୁଥ୍ କନ୍କ୍ଲେଭ୍’ର ତୃତୀୟ ସଂସ୍କରଣ ଆରମ୍ଭ ହୋଇଛି। ‘ଧରିତ୍ରୀ’ର ୫୦ତମ ଜନ୍ମବାର୍ଷିକୀ ପାଳନ ଅବସରରେ ଏହି ୟୁଥ୍ କନ୍କ୍ଲେଭ୍ ପ୍ରଥମ ଅଧିବେଶନରେ ମୁଖ୍ୟ ଆକର୍ଷଣ ସାଜିଛନ୍ତି ଅଭିନେତା ତଥା ୟୁଥ୍ ଆଇକନ ସୋନୁ ସୁଦ୍। ସୋନୁ ଜୟ ଜଗନ୍ନାଥରୁ ତାଙ୍କର ଅଭିଭାଷଣ ଆରମ୍ଭ କରିଛନ୍ତି। ସେ ତାଙ୍କର ପିଲାଦିନ କଥା କହିବା ସହ ତାଙ୍କ ମା’ ଦିନେ ତାଙ୍କୁ କହିଥିଲେ ତୁ ହାତ ମୁଠା ଖୋଲା କର ତୁ ବି ଅନ୍ୟମାନଙ୍କ ଅନ୍ୟମାନଙ୍କ ଜୀବନ ବଞ୍ଚାଇ ସେମାନଙ୍କ ମୁହଁରେ ହସ ଫୁଟାଇପାରିବୁ। ମା’ଙ୍କ ଏହି କଥା ମୋ’ ଜୀବନକୁ ବଦଳାଇ ଦେଇଛି ବୋଲି ସୋନୁ କହିଛନ୍ତି। ଅନ୍ୟପକ୍ଷରେ ଜଳବାୟୁ ପରିବର୍ତ୍ତନକୁ ନେଇ ନିଜ ମତ ରଖିଛନ୍ତି ସୋନୁ। ସେ କହିଛନ୍ତି, ପୃଥିବୀର ସୁରକ୍ଷା କଥା ଚିନ୍ତା କରିବା ଆମ ସମସ୍ତଙ୍କର କର୍ତ୍ତବ୍ୟ। ଏନେଇ ସମସ୍ତେ ସଚେତନ ହେବା ଦରକାର।