ବଲିଉଡ ଅଭିନେତା ସୋନୁ ସୁଦ କେବଳ ଜଣେ ମହାନ ଅଭିନେତା ନୁହଁନ୍ତି ବରଂ ଜଣେ ଦୟାଳୁ ବ୍ୟକ୍ତି ମଧ୍ୟ। କୋଭିଡ ସମୟରେ ସେ ଅନେକ ଲୋକଙ୍କୁ ସାହାଯ୍ୟ କରି ପ୍ରଶଂସା ସାଉଁଟି ଥିଲେ। ଏହା ପରେ ସୋନୁ ସୁଦ ଖୁବ ଶୀଘ୍ର ରାଜନୀତିରେ ଯୋଗଦେବେ ବୋଲି ଚର୍ଚ୍ଚା ହୋଇଥିଲା। ଏବେ ସେ ଏନେଇ ନିଜ ମତ ରଖିଛନ୍ତି।
ନିକଟରେ ଏକ ସାକ୍ଷାତକାରରେ ସୋନୁ ସୁଦଙ୍କୁ ରାଜନୀତିରେ ପ୍ରବେଶ ବିଷୟରେ ଏକ ପ୍ରଶ୍ନ ପଚରାଯାଇଥିଲା। ଏହାର ଜବାବରେ ସେ କହିଥିଲେ, ମୋତେ ଦୁଇଥର ରାଜ୍ୟ ସଭା ଏମ୍ପି ଏବଂ ଉପମୁଖ୍ୟମନ୍ତ୍ରୀ ପଦ ଅଫର ମିଳିଛି, କିନ୍ତୁ ମୁଁ ଗ୍ରହଣ କରି ନାହିଁ। ଏସବୁ ଜିନିଷ ମୋତେ ଉତ୍ସାହିତ କରେ ନାହିଁ। ମୁଁ ମୋର ନିଜସ୍ବ ନିୟମ କରିବାକୁ ଚାହୁଁଛି କାରଣ ମୁଁ କାହା ଦ୍ୱାରା ନିର୍ମିତ ପଥ ଅନୁସରଣ କରିବାକୁ ଚାହେଁ ନାହିଁ।
ସୋନୁ ସୁଦ ଶେଷଥର ପାଇଁ ଅକ୍ଷୟ କୁମାରଙ୍କ ସହ ‘ସମ୍ରାଟ ପୃଥ୍ବୀରାଜ’ରେ କାମ କରିଥିଲେ। ତେବେ ଏହି ଫିଲ୍ମଟି ବକ୍ସ ଅଫିସରେ ଫ୍ଲପ୍ ହୋଇଥିଲା। ଆଜିକାଲି ସୋନୁ ସୁଦ ତାଙ୍କର ନୂଆ ଚଳଚ୍ଚିତ୍ର ‘ଫତେହ’କୁ ନେଇ ଚର୍ଚ୍ଚାରେ ଅଛନ୍ତି।
