ଭୁବନେଶ୍ୱର,୪।୧୦(ବ୍ୟୁରୋ): ରାଜ୍ୟରେ କୋଭିଡ୍ ମହାମାରୀ ରୂପ ଧାରଣ କରିଛି। ଆଂଶିକ ଲକ୍ଷଣ ଥିବା ଅଧିକାଂଶ ସଂକ୍ରମିତଙ୍କୁ ନିଜ ଘରେ ସଙ୍ଗରୋଧରେ ରହିବାକୁ ଅନୁମତି ଦିଆଯାଇଛି। ତେବେ ଏହି ରୋଗୀମାନଙ୍କୁ ରୋଗ ପ୍ରତିରୋଧ ପାଇଁ ଫାଭିପିରାଭିର୍ ଟାବ୍ଲେଟ ଖାଇବାକୁ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅନୁମତି ଦେଇଛି। ତେବେ ଡାକ୍ତରଙ୍କ ପରାମର୍ଶ ନେଇ ରୋଗୀମାନେ ଏହି ଟାବ୍ଲେଟ ବ୍ୟବହାର କରିପାରିବେ। ଘରେ ସଙ୍ଗରୋଧରେ ରହିଥିବା ରୋଗୀମାନଙ୍କର ସ୍ବାସ୍ଥ୍ୟକୁ ଦୃଷ୍ଟିରେ ରଖି ଏହି ଟାବ୍ଲେଟ ବ୍ୟବହାର କରିବାକୁ ଅନୁମତି ଦିଆଯାଇଛି। ତେବେ ଟାବ୍ଲେଟ କିପରି ଯୋଗାଇ ଦିଆଯିବ ଓ ବ୍ୟବହାର କରାଯିବ ସେ ନେଇ ସ୍ବାସ୍ଥ୍ୟ ବିଭାଗ ପକ୍ଷରୁ ଶନିବାର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର(ଏସ୍ଓପି) ଜାରି କରାଯାଇଛି। ଏସ୍ଓପିକୁ କଡ଼ାକଡ଼ି ପାଳନ କରିବାକୁ ସ୍ବାସ୍ଥ୍ୟ ବିଭାଗ ପକ୍ଷରୁ ସମସ୍ତ ଜିଲାପାଳ, ମହାନଗର ନିଗମ, ଜିଲା ମୁଖ୍ୟ ଚିକିତ୍ସା ଅଧିକାରୀ, ସ୍ବାସ୍ଥ୍ୟକେନ୍ଦ୍ରର ସ୍ବାସ୍ଥ୍ୟ ଅଧିକାରୀ ଏବଂ ସମସ୍ତ ସରକାରୀ ମେଡିକାଲ କଲେଜ ଓ ହସ୍ପିଟାଲର ସୁପରିଣ୍ଟେଣ୍ଡେଣ୍ଟଙ୍କୁ ଜଣାଇ ଦିଆଯାଇଛି। ଘରେ ରହିଥିବା ରୋଗୀଙ୍କ ପାଖରେ ଯେପରି ପର୍ଯ୍ୟାପ୍ତ ପରିମାଣର ଫାଭିପିରାଭିର୍ ଟାବ୍ଲେଟ ପହଞ୍ଚିବ ସେ ନେଇ ନିଶ୍ଚିତ କରିବାକୁ କୁହାଯାଇଛି।
କୋଭିଡ୍ ସଂକ୍ରମଣର ଜରୁରିକାଳୀନ ପରିସ୍ଥିତିକୁ ମୁକାବିଲା କରିବା ଲାଗି ସେଣ୍ଟ୍ରାଲ ଡ୍ରଗ୍ସ ଷ୍ଟାଣ୍ଡାର୍ଡ କଣ୍ଟ୍ରୋଲ ଅର୍ଗାନାଇଜେଶନ (ସିଡିଏସ୍ସିଓ) ଉକ୍ତ ଟାବ୍ଲେଟକୁ କୋଭିଡ୍ ରୋଗୀଙ୍କ ବ୍ୟବହାର ପାଇଁ ଅନୁମୋଦନ କରିଛନ୍ତି। ଏହି ଟାବ୍ଲେଟକୁ ରାପିଡ ରେସପନ୍ସ ଟିମ୍(ଆର୍ଆର୍ଟି) ଡାକ୍ତରଙ୍କ ପରାମର୍ଶ ନେଇ ଗୃହ ସଙ୍ଗରୋଧରେ ଆଂଶିକ ଲକ୍ଷଣ ଥିବା କୋଭିଡ୍ ରୋଗୀଙ୍କୁ ଯୋଗାଇବେ। ଏହି ଟିମ୍ ରୋଗୀ କିପରି ଔଷଧ ଖାଇବେ ପରାମର୍ଶ ଦେବେ। ପାର୍ଶ୍ୱ ପ୍ରତିକ୍ରିୟା, ସାବଧାନତା ଏବଂ କାର୍ଯ୍ୟ ସମ୍ପର୍କରେ ରୋଗୀଙ୍କ ପରିବାର ସଦସ୍ୟଙ୍କୁ ମଧ୍ୟ ବୁଝାଇବେ। ରାପିଡ ରେସପନ୍ସ ଟିମ୍ ଫାଭିପିରାଭିର୍କୁ ୫ ଦିନ ପର୍ଯ୍ୟନ୍ତ ଖାଇବାକୁ ପରାମର୍ଶ ଦେବା ସହ ଟାବ୍ଲେଟ ଖାଇବା ନେଇ ଥିବା ସୂଚନାପତ୍ର ମଧ୍ୟ ପ୍ରଦାନ କରିବେ। ଯଦି ପାର୍ଶ୍ୱପ୍ରତିକ୍ରିୟା ହେଲା ତେବେ କାହାକୁ ଜଣାଇବେ ସେ ନେଇ ଟିମ୍ ସଦସ୍ୟମାନେ ଅବଗତ କରାଇବେ। ଯଦି ଔଷଧ ଖାଇବା ପରେ ରୋଗୀ ଗୁରୁତର ହେଲେ ଉକ୍ତ ଟିମ୍ ତାଙ୍କୁ କୋଭିଡ୍ ହାସ୍ପିଟାଲ ନେବା ପାଇଁ ସହଯୋଗ କରିବେ। ରୋଗୀଙ୍କୁ ନିୟମିତ ନଜର ରଖାଯିବା ସହ ଟେଲିଫୋନ କିମ୍ବା ଅନ୍ଲାଇନରେ ଯୋଗାଯୋଗ କରିବାକୁ କୁହାଯାଇଛି। ସେଥିପାଇଁ ପ୍ରତ୍ୟେକ ଜିଲାରେ ଏକ ସ୍ବତନ୍ତ୍ର ଟେଲିଫୋନ ନମ୍ବର ପାଇଁ ନିର୍ଦ୍ଦେଶ ଦିଆଯାଇଛି। ଏ ନେଇ ଆର୍ଆର୍ଟିର ତାଲିମ କାର୍ଯ୍ୟ ତୁରନ୍ତ ଆରମ୍ଭ କରିବାକୁ କୁହାଯାଇଛି।
ଟାବ୍ଲେଟ କିପରି ଗ୍ରହଣ କରିବେ ସେ ନେଇ ମଧ୍ୟ ଏସ୍ଓପିରେ ରୋଗୀମାନଙ୍କୁ ପରାମର୍ଶ ଦିଆଯାଇଛି। ଯେଉଁ ରୋଗୀମାନଙ୍କର ଫାଭିପିରାଭିର୍ ଟାବ୍ଲେଟ ଆବଶ୍ୟକ ହେବ ସେମାନେ ଲିଖିତ ଆକାରରେ ଆର୍ଆର୍ଟିକୁ ଜଣାଇବେ। ଡାକ୍ତରଙ୍କ ବିନା ପରାମର୍ଶରେ ଔଷଧ ନ ଖାଇବାକୁ ପରାମର୍ଶ ଦିଆଯାଇଛି। ଏହି ଟାବ୍ଲେଟର ପାର୍ଶ୍ୱ ପ୍ରତିକ୍ରିିୟା ଥିବାରୁ ରୋଗୀମାନେ ଡାକ୍ତରଙ୍କ ବିନା ପରାମର୍ଶରେ ନ ଖାଇବାକୁ କୁହାଯାଇଛି।