ନୂଆଦିଲ୍ଲୀ, ୩ା୭: ପ୍ରଥମ ମହିଳା ଖେଳାଳି ଭାବରେ ଫର୍ମୁଲା-୩ ଗ୍ରାଁ ପ୍ରିରେ ପଏଣ୍ଟ ସ୍କୋର କରି ଇତିହାସ ରଚିଛନ୍ତି ଜର୍ମାନୀର ସୋଫିଆ ଫ୍ଲୋରେସ। ରବିବାର ଶେଷ ହୋଇଥିବା ଅଷ୍ଟ୍ରିଆନ୍ ଗ୍ରାଣ୍ଡ ପ୍ରିରେ ସେ ନବମ ସ୍ଥାନରେ ରହି ରେସ୍ ଫିନିଶ କରିଥିଲେ। ପିଏଚ୍ଏମ୍ ରେସିଂ କମ୍ପାନୀ ପକ୍ଷରୁ ସେ ରେସ୍ କରିଥିଲେ। ୨୦ତମ ସ୍ଥାନରୁ ରେସ୍ ଆରମ୍ଭ କରିଥିବା ବେଳେ ନବମ ସ୍ଥାନରେ ରେସ୍ କରିଥିଲେ। ଏହି ପ୍ରଦର୍ଶନ ସହିତ ତାଙ୍କ ଟିମ୍କୁ ୨ ବିଶ୍ୱ ଚାମ୍ପିୟନଶିପ୍ ପଏଣ୍ଟ ମଧ୍ୟ ମିଳିଛି। ୨୬ ଲାପ୍ ସମାପ୍ତ କରିବା ପାଇଁ ସୋଫିଆଙ୍କୁ ୩୮:୦୫.୭୬୫ ସେକେଣ୍ଡର ସମୟ ଲାଗିଥିଲା। ପ୍ରେମା ପାଓ୍ବାର ଟିମ୍ର ବ୍ରିଟନ୍ ଜ୍ୟାକ୍ ଓ ସୁଲିଭାନ୍ ପ୍ରଥମ ସ୍ଥାନରେ ରହିଥିଲେ। ଟ୍ରାଇଡେଣ୍ଟର ଗାବ୍ରିଏଲ ବୋର୍ଟୋଲେଟୋ ଦ୍ୱିତୀୟ ସ୍ଥାନରେ ରହିଥିବା ବେଳେ ସି କୋଲେଟ୍ ତୃତୀୟ ସ୍ଥାନରେ ରହିଥିଲେ। ଫର୍ମୁଲା-୩ ରେସ୍ରେ ପଏଣ୍ଟ ହାସଲ କରିଥିବା ସୋଫିଆଙ୍କୁ ଫର୍ମୁଲା ଓ୍ବାନ୍ ସୋସିଆଲ ମିଡିଆ ଆକାଉଣ୍ଟରୁ ଶୁଭେଚ୍ଛା ପ୍ରଦାନ କରାଯାଇଛି। ସୋଫିଆ ଆଲପିନ୍ ଡ୍ରାଇଭର ଏକାଡେମୀରେ ପ୍ରଶିକ୍ଷଣ ଗ୍ରହଣ କରନ୍ତି।